Klifurapar

Bjartur er alltaf í klifrinu og í dag fengum við að mæta og allir krakkarnir fengu að spreyta sig. Það var mishátt farið en allir höfðu gaman og frábært að fá þetta tækifæri að prófa <3

Lært út á svölum í sólinni

Ekki slæmt að nýta sólina í að skella sér út á svalirnar með félaga og læra :)

Súkkulaðiskálar

Sunna og Bjartur að sprengja blöðrurnar sem voru notaðar til að mynda skapasón utan um súkkulaði til að mynda súkkulaðiskálar þegar þær voru sprengdar...síðan voru þær fylltar með ís =)

Bjartur 11 ára

Afmlisstrákurinn var vakinn með söng og pökkum og var hinn ánægðasti að fá dróna í afmælisgjöf sem er núna hægt að leika sér með =)

Afmælisveisla í LazerTag

Það var svaka stuð hjá Bjarti og bekkjarfélögum þegar farið var í LazerTag í Smáralindinni...öll komu þau vel sveitt og út keyrð eftir hasarinn og gæddu sér á smá kræsingum til að ná aftur upp vökva og orkutapi =)

Bjartur býr til gúmmínammi

Bjartur (ásamt krökkunum) fékk nokkra poka af gúmmíböngsum sem enduðu í örbygljuofninum (eftir að hafa verið litaflokkaðir) og síðan var farið í að hella bráðnu gúmmíinu í ný form og búa til ný gúmmí.
Það höfðu allir gaman að þessu og sérstaklega að kjammsa á gúmminu og var það stórkostlega sóðalegt á tímabili...þó svo að foreldrarnir hafi ekki haft jafn gaman af þrifunum ;)

Fólkið skapar menninguna

Á UTMessunni í ár var margt áhugavert og sérstaklega gaman að taka Bjart (litla nördinn minn) með. Hann fær þar að hjálpa til í kaffinu og einnig að skoða eins og honum sýnist og ráfa um. Í ár var ég með smá fyrirlestur og sá nokkra áhugaverða og hitti fullt af góðu fólki...alltaf skemmtilegur (nörda)viðburður =)

Bjartur á leið í Hrekkjavökuafmæli

Sá alveg sjálfur um að græja sig sem vampíra og skreyta kortið...litli snillingurinn =)

Bjartur 10 ára

Bjartur var vakinn með tvemur Minecraft ljósum og nýja heyrnatólum í tilefni dagsins. Hann er hinn mesti tölvunörd eins og pabbi sinn og ekki leiður með að vakna við svona gjafir. Hann og Óli héldu uppá afmælið saman í Smáratívolí þar sem bekkurinn fór í LazerTag og var mikil hiti, sviti og keppnisskap í gangi þar eins og vera ber =)
Hann er meira að segja kominn með sitt eigið blog og gaman að sjá hans hlið á málunum líka...en það er nú ekki allt sem ratar þarna inn hjá honum. Hann er víst að setja einhver video á youtube en það er ekki fyrir alla að horfa nema með link á það eins og sjá má á fréttinni hans um nýju heyrnatólin.

Bjartur útskrifast úr Grábræðrum

Bjartur kláraði Grábærður í Skátunum í dag. Hann sýndi okkur eitthvað af starfi vetrarins og síðan var súpa & skátabrauð í boði hjá Hraunbúum. Hann hefur alveg fundið sig í skátunum sem er meira heldur er hin íþróttaáhugamálin sem hafa dottið fljótt uppfyrir.

Svala frænka fermd

Finnst merkilega stutt síðan að ég kynntist Svölu Birnu þegar ég hitti Bínu. Hún fermdist í dag og Bjartur var í réttum litum við hliðina á stóru frænku sinni =)

Nördabörn

Ekki leiðinlegt að til sé nóg af tölvum á heimilinu þegar allir vilja spila saman Minecraft ;)

Það hefur sína kosti að hafa undarlegan áhuga á að gera upp gamlar Apple tölvur. Þess vegna er ein auka til og ég gæti meira að segja dottið inn með þeim þar sem þau fá ekki að leika sér í vinnuvélinni "minni", enda er hún ekki "mín" ;)

UTMessan

Hugsmiðjan var með bás á UTMessunni í ár og Bjartur kom með mér. Honum finnst nú ekki leiðinlegt að hjálpa til við að hella uppá kaffi því hann fékk að aðstoða við það í fyrra líka.
Síðan gat hann skottast um og skoðað allt sem var í boði á meðan ég var að hella uppá og spjalla við gesti & gangandi.
Ég náði aðeins að kíkja með honum og koma honum í biðröðuna hjá CCP. Gaman að sjá hann sitjandi að leika sér í þrívíddarheimi...gaman hvað það er mikil tækni sem þau alast upp við.
Eftir daginn var hann alveg klár á hvað ætit að kaupa næst inná heimilið...þrívíddarprentara. Það hafði verið eitt það mest spennandi sem hann sá og varði miklum tíma í að fylgjast með því. Sjálfur er ég alveg sammála honum og hlakka til að þeir verði orðin almenningseign, margt sem mun breytast með tilkomu þeirra =)

Minecraft Bjartur

Bjartur fór á námskeið hjá Skema í Minecraft. Tveggja daga námskeið og frábært að læra aðeins meira og aðallega að hitta fleiri sem eru áhugasamir um þennan skemmtilega leik.

Þegar ég spurði hann eftir seinni daginn hvort hann hefði lært eitthvað sagði hann "Nei... eða jú eitt, að hinir strákarnir hlýða ekki" ;)

Hann er merkilega mikill nörd eins og pabbi sinn...veit ekki hvort það er gott fyrir hann að eiga svona nördapabba ;)

Bjartur 9 ára

Bjartur var alsæll með nýtt hjól. Fékk reyndar ekki litinn sem hann vildi, en hann tekur sig vel út í bláu =)
Hann er nú mikið fyrir að nördast í tölvunni eins og pabbi sinn og því upplagt að fá eitthvað sem vekur áhugann á útiveru í sumar.

Skólafólk

Þau voru afskaplega mikil krútt á leiðinni í skólann þegar ég rakst á þau fyrir utan leikskólann...ekki leiðinlegt að eiga stóran bróður til að hjálpa til við að byrja skólagönguna =)

Bjartur 8 ára

Hann var hæstánægður með að fá að halda afmælið sitt í Ævintýragarðinum með vinum sínum (bekknum, einum öðrum og svo fengu systkini hans að koma líka ;). Sem betur fer vorum við með kökur með okkur því þau hámuðu pizzurnar fljótt í sig, enda vel svöng eftir daginn. Síðan var hoppað, hlaupið, grátið, leikið og ég veit ekki hvað þarna út um allt.
Um kvöldið var hann svo þreyttur að hann lagist útaf á eldhúsbekkinn og steinsofnaði =)

Sumardagurinn fyrsti

Fyrsti sumardagur var tekinn snemma þegar að yngsti fjölskyldumeðlimurinn vildi ekkert vera að eyða "morgninum" í eitthvað hangs í rúmminu. Hann fékk nú samt að liggja aðeins uppí þangað til að Dagný mætti og þá var ekkert annað að gera en að byrja daginn með hafgragraut.
Restin skreið svo á fætur á aðeins eðlilegri tíma og síðan var haldið niður á Víðistaðatún þar sem eldri krakkarnir fóru í víðavangshlaup. Stelpurnar hlupu saman og passaði Sunna vel uppá litlu systur: leiddi hana allan tímann og hjálpaði henni upp þegar hún datt. Það var ekkert verið að stressa sig yfir að vera fyrstar heldur bara að vera saman.
Bjartur hljóp svo aðeins lengri leið og þar var takmarkið bara að komast á leiðarenda. Ég var með myndavélina á lofti og hafði gaman að því að heyra hann á spjallinu við bekkjarbróður sinn...það voru engar áhyggjur af því að vera í forystu, enda var hann alveg með það á hreinu að hann var 4 síðasti og sáttur við með sitt.
Ég hafði nú ekki vit á því að klæða mig í hlaupagallann og taka 2km hlaup...kannski á næsta ári ;)

Smá slökun fram eftir degi og fórum svo í kaffi til Bödda&Bekku þar sem ég hlýddi Bjarti og fór í sófann eins og ég geri ALLTAF að hans sögn...sem er jafnvel rétt...en það bara svo rosalega gott að leggja sig í honum ;)

Út að borða og svo fengu allir ís...góður dagur, góð byrjun á sumri.

Karate-Bjartur

Bjartur kláraði fyrstu gráðunina sína í karate á síðasta ári. Það var rosalega gaman að sjá hvað krakkarnir voru flottir og samstilltir. Hann segist nú aðeins vilja vera í þessu til að fá fjólubláa beltið (uppáhalds liturinn)...en það er svo sem jafn góð ástæða og hver önnur. Á meðan hann mætir og hefur gaman að þessu er það bara besta mál. Fékk svo galla á nýju ári þannig sem hann tekur sig rosalega vel út í og verður gaman að sjá hvernig karateiðkun hans verður. Hann er flottur þegar hann klæðir sig heima og tekur æfingar, þannig að ég bíð bara spenntur eftir næstu gráðun að sjá hann.

Gullkorn krakkanna (2004-2011)

Bína hefur verið mjög dugleg að safna saman gullkornum krakkanna á síðunni þeirra og þegar komst upp um daginn að Balli afi hafði ekki séð neitt af þessu skelltum við þeim saman í eina "bók" sem er hægt að sækja og glugga í yfir hátíðirnar ;)