Sætar systur

Kom fram í morgun og fann stelpurnar að
lita hvor aðra =)
Þetta var svo gaman hjá þeim og alltaf jafn frábært hvað þær eru góðar saman. Seinna um daginn var skellt upp danssýningu þar sem þær systur æfðu dans við nokkur vel valin Katy Perry lög og heldu sýningu fyrir foreldrana...þær eru æði =)

Dagný 6 ára

Miss D orðin sex ára skólastelpa. Óendanlega gaman að eiga svona hressa og skemmtilega skvísu sem getur lífgað uppá alla daga með sínu góðu skapi =)
Hún vanknar oft í sólkinsskapi og það væri svo gaman að geta séð hvað er í gangi í hugarheimi hennar...stundum er eins og brosið sé fast á henni :)

Regla #1

Þessi regla (sjá á myndinni fyrir ofan) var sett á fyrir nokkru þegar að forstofan var iðulega yfirfull af yfirhöfnum. Það var orðin venjan hjá smáfólkinu að koma inn og láta þær detta af sér og halda svo áfram inn.

Reglan var skýð fyrir fólkinu og allir meðtóku og fóru eftir þessu...til að byrja með...

Það kom svo fyrir að ein tók ekki upp úlpuna sína...og sagðist ekki ætla að gera neitt í því þegar hún var spurð...þannig að ég þreif klósettið með höndunum á henni við lítinn fögnuð viðkomandi. Með því var búið að sýna öllum að það væri full alvara með viðlögunum og eins gott að fylgja þessu ;)

Síðan þá hafa yfirhafnir ekki sést á gólfinu, þannig að þessi regla með viðurlögum hefur alveg skilað sér =)

Minecraft með krökkunum

Það kemur fyrir að við skellum okkur saman í Minecraft enda nóg af tölvum á heimilinu. Bjartur er með þetta allt á hreinu og hjálpar að halda öllu gangandi. Þessi leikur er frábær fyrir alla þar sem það er hægt að finna alls konar borð/leiki sem er hægt að spila saman og hafa gaman...

Óvissuferð Bóner 2014

Það var flottur hópur sem safnaðist saman í óvissuferðina með H&I skipulögðu í þaula í ár. Skipt var í tvö lið og síðan hófust æsispennandi leikar fram eftir degi. Ferðuðumst um Reykjanesið og komum víða við og á einhverjum tímapunkti þurfti að gera myndband (þannig að það var skellt í það á Keflavíkurveginum ;)
Góður dagur í góðra vina hóp =)

Á "nýjum" bíl í bústað

Loksins komumst við á Previa eins og við ætluðum að fá okkur 2008 en létum Verso-inn duga. Datt einn inná sölu sem var ekki eins mikið keyrður og voru einmitt búin að vera að leita.
Fór með hann í smá tékk og þá vildi sá sem afgreiddi mig endilega að Gísli myndi skoða hann því hann ætti líka Prevíu. Gísli kom á hlaupum og sagðist ekki hafa tíma...þegar afgreiðslumaðurinn sagði að þetta væri Prevía stoppaði hann og spurði "Hvað er hún keyrð mikið?" og þegar fékk svarið "80" hélt hann áfram ferð sinni og sagði "Hann er í topp standi, mín er keyð 300" og hann haðfi alveg rétt fyrir sér, allt kom vel út úr skoðuninni =)
Nú erum við strax mætt á "nýja" bílnum í bústað með Birnu&Ingó þar sem við skoðuðum nágrennið (eitthvað smá í misgóðu veðri), hittum gott fólk, höfðum það kósy og lékum okkur með þessu æðislega fólki.

Ég elska líka Tetris

Á leiðinni framhjá Sundhöll Reykjavíkur rakst ég á þessar gangstéttarhellur með þessari áletrun...mér var skemmt =)

Dagný skólastelpa

Hún er heldur betur búin að vera spennt fyrir að byrja í skóla þessi og gerir það með stæl...enda með eldri systur & bróðir sem fylgja henni þannig að þetta er lítið mál fyrir Miss D =)
Daginn eftir rákumst við á hana og þegar hún var spurð "hvernig var" svaraði hún "GAMAN" eins og henni einni er lagið ;)

Menningarnótt 2014

Við ákváðum að skella okkur á menningarnótt, taka strætó niðrí bæ og sjá hvort við næðum ekki fram yfir flugeldasýningu með allan hópinn. Þannig að byrjað var að finna strætó og ekki var leiðinlegt að sitja aftast í honum og hafa annan beint á eftir.
Við dunuðum okkur niðrí bæ og vorum þó mest til í Hljómskálagarðinum...skruppum aðeins frá þegar fór að rigna en það var nóg um að vera þar og krakkarnir fóru alltaf í leiktækin þegar þau týndust þannig að það hentaði fínt =)
Þegar fór að líða á kvöldið komum við okkur nær miðbænum og skelltum okkur í smá kaffi. Ég er nú ekki mesti kaffidrykkjumaður þannig að Bína benti mér á Frappóchino sem er alveg upphálds "kaffidrykkurinn" minn =)
Sindri gafst upp á þessum tímapunkti í fangi móður sinnar, enda búið að vera mikið að gera í allan dag.
Náðum flugeldasýningunni og gengum svo með öllum hinum uppá Hlemm þar sem við biðum eftir strætó.
Þegar hann opnaði dyrnar byrjaði svo æsingin þegar allir reyndu að komast um borð. Mér tókst að halda tvemur börnum hjá mér og sem betur fer var Bína með hin tvö og allir fóru um borð. Vagnstjórinn reyndi að hafa stjórn á drukknum unglingum og gerði svo sitt besta til að komast á áfangastað þótt hann þekkti greinilega ekki leiðina ;)
Hér fór að verða erfitt fyrir alla að halda sér vakandi og þrengslin um borð hljálpuðu ekki mikið til. Allir komust þó út á leiðarenda og einhverjir voru vaktir til að taka síðustu skrefin heim þar sem foreldrarnir voru líka vel búin á því =)

Dagur við Hvaleyrarvatn

Sannkallað "SUMMER TIME" eins og stendur aftan á stuttbuxun hjá Sindra þarna ;) Áttum góðan dag á Hvaleyrarvatni í blíðunni...drullumallað út í eitt og alltaf gaman að skella sér í smá gúmmíbátsferð. Lilja & Ásthildur voru með okkur og við rákumst á fleiri góða vini yfir daginn...frábært að ná líka góðum sumardegi hérna =)

Gleðiganga í fínasta veðri

Vorum snemma á ferðinni fyrir Gleðigönguna í ár þar sem veðrið var gott. Lögðum í vesturbænum og gengum niðrí bæ þar sem byrjað var á pulsa sig upp. Síðan var horft á gönguna og í fyrsta skiptið fórum við á tónleikana enda orðið aðeins minna umstang í kringum þennan hóp =)

Ströndin

Vorum varla komin heim þegar við drifum okkur á ströndina. Mig langaði svo rosalega þar sem einhvernvegin misstum við af henni síðasta sumar...kannski af því það var ekkert sumar hérna megin á landinu í fyrra ;)
Mér finnst frábært að geta farið á "stöndina"...það er svo mikið útlönd. Reyndar var hálf kalt en við enduðum í skjóli fyrir ofan pottinn og vorum þar góðan hluta dags...Dagný tókst meira að segja að ná sér í gott sundbolafar.

Sumarið á Seyðis

Sumarfríið var eins og svo oft áður tekið á Seyðisfirði og það var svo sannarlega yndilsegt. Það var bara rólegt og notalegt í alla staði. Ekkert sérstakt gert eða planað og daganir bara teknir einn í einu...og flestir þeirra fengu sól og hlýju og minnti þetta á sumrin sem ég upplifði á Seyðis sem barn. Held ég láti bara myndirnar frá júlí 2015 tala sýnu máli =)

Á leiðinni í brúðkaup

Okkur var nokkuð óvænt boðið í giftingu hjá #annaoggilsi sem við þáðum og höfðum gaman að. Yndislegt fólk, vel heppnuð veisla (gaman að kíkja aftur í Garðaholt ;), stuð fram og nótt og eftirpartýi hjá brúðhjónunum...alvöru ;)

Skátaferð

Bjartur & Sunna fóru um helgina saman í Skátaferð. Þau voru hæst ánægð með þessa ferð og Sunnu fannst spennandi að fá að fara með Bjarti og honum fannst ábyggilega gott líka að hafa Sunnu með sér. Þau voru algört krútt þegar sagt var skilið við þau og líka þegar þau voru sótt...bara aðeins þreyttari =)

Íþróttaálfar

Dagný & Sindri hittu Íþróttaálfinn og Sollu stirðu í leikskólanum...hún Dagný er nú alltaf meira til í svona félagslíf heldur en hann Sindri og eins og sjá má á myndinni gæti hún vel verið stjarnan á staðnum ;)

Fjölskyldan í strætóferð

Það var fyrir 10 árum síðan sem við fórum fyrst með Bjart út í gönguferð á 17. júní og notuðum barnavagn í fyrsta sinn. Síðan þá hefur barnavagn og fleira alltaf verið með í för þangað til í ár. Nú var bara kallað að þeir sem ætluðu að vera með yrðu að klæða sig og síðan var farið út. Tókum reyndar regnhlífar með en það var til að þoli við úrhellið sem var spáð.
Þannig að við nældum okkur í strætó og fórum niður í bæ þar sem við reyndum að halda okkur þurrum og borða smá nammi þangað til að við heldum svo heim á leið aftur í strætó, full blaut en nokkuð ánægð með "ferðalagið" án barnavagns =)

Dagný í fallturninn

Dagný er búin að vera að bíða svo lengi eftir að verða nógu stór til að fara í fallturninn í Fjölskyldu- og Húsdýragarðinum. Í dag var farið í þeirra von að hún væri orðin nógu stór. Vitir menn, hún náði yfir lágmarkið og mátti fara með þannig að þær systur fóru saman og ég beið niðri eftir þeim.
Ánægjan var fljót að breytast þegar lagt var af stað upp og fljótlega breyttist það í meiri angist heldur en ánægju. Hún var ekki alveg sátt við þessa lífsreynslu...en merkilegt nokk fór hún nú aftur...en þá var nóg komið og engin ástæða til að gera sér meira af þessu =)

Bjartur 10 ára

Bjartur var vakinn með tvemur Minecraft ljósum og nýja heyrnatólum í tilefni dagsins. Hann er hinn mesti tölvunörd eins og pabbi sinn og ekki leiður með að vakna við svona gjafir. Hann og Óli héldu uppá afmælið saman í Smáratívolí þar sem bekkurinn fór í LazerTag og var mikil hiti, sviti og keppnisskap í gangi þar eins og vera ber =)
Hann er meira að segja kominn með sitt eigið blog og gaman að sjá hans hlið á málunum líka...en það er nú ekki allt sem ratar þarna inn hjá honum. Hann er víst að setja einhver video á youtube en það er ekki fyrir alla að horfa nema með link á það eins og sjá má á fréttinni hans um nýju heyrnatólin.

Bjartur útskrifast úr Grábræðrum

Bjartur kláraði Grábærður í Skátunum í dag. Hann sýndi okkur eitthvað af starfi vetrarins og síðan var súpa & skátabrauð í boði hjá Hraunbúum. Hann hefur alveg fundið sig í skátunum sem er meira heldur er hin íþróttaáhugamálin sem hafa dottið fljótt uppfyrir.

Dagný útskrifast úr leikskólanum

Dagný útskrifaðist af Víðivöllum í dag. Þetta er búið að vera eintómt stuð hjá henni og er ekkert smá spennt að byrja í skólanum eftir sumarið =)

Skipulagsnördar

Ég og Sunna settum smá tilraun að mánaðar- & vikuskipulagi uppá vegg inná gangi hjá okkur í dag. Þannig að hægt er að sjá hvaða mánuður er í gangi og hvað er að gerast í vikunni...hugsa að þetta gæti verið þægilegt að sjá hvaða íþróttir eru hjá krökkunum og hvenær hver er að fara hvert...stundum (allt í lagi oft) get ég ekki munað þetta allt =)

Vaskir menn

Fríður hópur vaskra Bandýdos manna sem tók þátt í móti í dag...látum ekkert of mikið sagt um frammistöðuna...það er fyrir öllu að taka þátt og hafa gaman að =)
Alltaf haft mjög gaman af þessu sporti frá því í íþróttum hjá Unni Óskars í Seyðisfjarðaskóla...verður gaman að vita hvað maður nær að verða gamall enn að spila þetta?

Fjórða Bjólfsárinu slúttað

Eins og alltaf er tímabilið hjá Bjólfi klárað með lokamóti í bústað. Það var góð helgi eins og alltaf áður. Ég náði mér í góðan svefn í "svefnbústaðnum" og þess á milli var skemmt sér við pókerspil, eldamennsku, át, heitan pott, sögur, söng í góðum félagssap. Skemmtilegur hópur sem ég er afskaplega ánægður með að vera hluti af =)
Það er alltaf jafn gaman að koma heim á sunnudeginum og hitta aftur fjölskylduna...þó þetta séu 2 heilir dagar þá líða þeir svo fljótt að maður varla nær að hugsa heim nema þegar síminn er tekinn upp...en í dag er það með mynd þannig að maður fær að sjá fólkið og einfaldar það mikið =)

Stelpurnar góðar saman

Það er ótrúlegt hvað Sunna & Dagný eru góðar saman og hafa alltaf verið. Frá því að Dagný mætti á svæðið hefur Sunna alltaf verið svo góð við hana (eins og aðra) og Dagný hefur alltaf grætt svo mikið á því að eiga eldri systur sem hugsar svona vel um hana. Þær geta leikið sér næstum endalaust og stórmerkilegt hvað það verður lítið um árekstra...vonandi verður þetta alltaf svona yndilegt á milli þeirra =)

Helgarferð í Karrakot

Ég fór með krakkana á föstudegi þar sem Bína var að halda stelpupartý og það er nú alltaf gaman að koma í Karrakot. Á laugardeginum mættu og allar skvísurnar eftir að hafa skemmt sér kvöldið áður á meðan framkvæmdir við matjurtargarða voru komnar á fullt. Það var mokað vörubílshlassi af mold, klippir runnar, grafnar holur og ýmsu plantað. Allir voru duglegir að hjálpa til og finnst mér nú aldrei leiðinlegt að komast í smá garðvinnu. Dagný var mjög spennt að fá að sturta af ballinum og fékk svo að "stýra". Bjartur var duglegur að klippa og Sunna að hjálpa til. Sindri var nú ekki mikið að taka þátt...aðallega að frekjast í gönguferðinni eins og sjá má í maíalbúminu ;) Þannig að ferðin endaði lengri en eins dags ferð og var miklu betri fyrir vikið =)

Afmælisdagur sætustu

Ég fór snemma á fætur til að finna til afmælisgjafir handa Bínu sem átti að fara með í rúmmið til hennar. Þegar ég kom fram heyrði ég umgang og fann Dagný að föndra perlur uppá strá. Hún hafði verið að gera það kvöldið áður og ég hafði sagt henni að hún yrði að vakna snemma til að klára...sem hún og gerði =)
Bína hafði boðið í stelpupartý og ég fengið boð frá Þresti að koma í Karrakot með krakkana sem henta einstaklega vel.
Síðar um daginn keypti ég líka loksins hátalara inní stofuna þannig að skvísurnar gætu nú "blastað" aðeins í tónlistinni =) Hún Bína á það svo skilið að fá allt sem hana langar í...vildi að ég gæti gefið henni allan heiminn...en hún fær bara litla hluta af honum í einu =)

Júróvisjón

Engin spurning með hverjum var haldið hér á bæ ;)

Alltaf notalegt fjölskyldustund að horfa á Eurovision. Þó svo í ár hafi ég meira verið upptekinn í að fylgjast með umræðunni á twitter um #12stig heldur en að fylgjast með sjónvarpsútsendingunni, enda margt skemmtilegt sem þar kemur fram ;)

Snorri fékk Snorra

Snorri "bróðir" fékk gjafabréf með mynd af sjálfum sér...þannig að hann fékk í raun Snorra (eða sig) í afmælisgjöf frá okkur ;) Að fá Snorra er nú svona eins og að fá Eddu eða Óskar ;)

Ballerínurnar á sama sviði

Þær væru flottar systurnar á sviðinu í Borgarleikhúsinu á uppskerusýningunni hjá Listdansskóla Hafnarfjarðar. Sunna í þriðja sinn og Dagný nú loksins orðin nógu gömul til að taka þátt eftir að hafa horft á systur sína undanfarin ár úr salnum.
Þannig að við Bína, Bjartur & Bekka amma vorum í salnum og nutum þess að horfa á skvísurnar dansa í ár =)

Sárlasið, svikið & svekkt fólk sem engu ræður

S&S voru úrskurðuð með streptókokka í dag. Þeir hafa eitthvað verið að stríða okkur undanfarið og þau vissu að YoYo ís var í nágrenninu þegar við fórum á Domus Medica. Þannig að þau voru staðráðin í því að þau fengju ís...sérstaklega þegar búið var að dæma þau veik og þurfa að fá meðal...þá ættu þau nú ís inni bara fyrir að hafa farið svona veik í bíl.
Þau voru ekki jafn sátt þegar í ljós kom að ísbúiðin var ekki búin að opna snemma á föstudagsmorgni...í mótmælaskyni var sest niður í fýlu og ákveðið að sýna vanþóknun sína á því að engan ís var að fá =)

Páskar með Helgömmu

Það var afskaplega notalegt að hafa Helgömmu í heimsókn um páskana og krakkarnir ekki leiðir að hafa hana hjá sér frá morgni til kvölds.
Loksins voru egg lituð...gott ef það var ekki gert síðast með henni líka =)
Heimsóknir, leikir og gönguferðir og síðan voru allt í einu páskanir búnir og hún farin...allir náðu að halda sér nokkuð vel á flugvellinum og enginn neitt of illa grátinn eftir að kveðja hana ;)

Spil móti mannkyni

Cards Against Humanity er óþægilega skemmtielgt spil sem ég mæli eindregið með.
Það var skellt í prentun á góðan pappír í vinnunni og síðan tók smá tíma hjá mér & Bínu að klippa eitt kvöldið...alveg skemmtilegt hjá þeim að bjóða uppá það...en ég held ég mæli nú samt bara með því að kaupa þetta út í búð...þó það sé nálægt 10þ kallinum í Nexus þá er það alveg tímans virði ;)
En við fórum með heimagerða spjölin með okkur í matarboð í kvöld og það kemur alltaf nóg af skemmtilegum samsetningum fram sem kæta =)

Fjölskyldupáskabingó

Skruppum og keyptum ýmis verðlaun, buðum fjölskyldunni mín megin og krakkarnir stjórnuðu bingóleikjum. Þetta varð fínasta skemmtun þó svo að ekki hafi náðst að taka eitt varúlfaspil sem var búið að stinga uppá.
Bjartur fékk svo klippingu þar sem að Helgamma var á staðnum og þá mátti "snyrta" =)

Fjölskyldan í fiskabúrinu

Það er ekki á hverjum degi sem að öll systkinin eru saman komin...svona þegar ég tel mig með...og Dagur sendi staðgengil í sinn stað ;)
En það var annars raunin þegar við hittumst hjá Jóhanni&Hemmý og endaði fjölskyldan í Fiskabúrinu eftir að krakkarnir fóru að reka alla þar inn =)

Dagný hélt svo smá sýningu þar sem hún klæddi sig í mótorhjólagallann hans Snorra og minnti einna helst á ET.

Eftir þetta var síðan farið í ísbúðina þar sem asískir túristar misstu sig í að ljósmynda krakkana að borða ís...veit ekki hvað var svona merkilegt, að þau væru að fá sér ís í kuldanum...eða hvað það var?

Bingódagurinn mikli

Það var vel pakkað í Víðistaðaskóla þegar að páskabingóið var haldið í dag. Bjartur, Sunan & Dagný voru með í för og fundum við okkur pláss í glugganum. Það var mikill hiti & spenna í spilurum og ekki langt frá því að vera eins og á bestu rokktónleikum þegar að spurt var reglulega hvort ætti að spila eina tölu í viðbót =)
Það tókst að koma öllum verðlaunum út á endanum og við rétt komumst heim til að leggja af stað í páskabingó Skátanna seinnipartinn, þannig að þetta var sannarlega bingódagurinn mikli =)

Svala frænka fermd

Finnst merkilega stutt síðan að ég kynntist Svölu Birnu þegar ég hitti Bínu. Hún fermdist í dag og Bjartur var í réttum litum við hliðina á stóru frænku sinni =)

Fjallganga

Skelltum okkur uppá Ásfjall með alla og er þetta í fyrsta skiptið sem fjölskyldan fer í fjallgögnu. Það þurfti nú að hjálpa minnsta fólkinu en það var nú lítið mál þar sem ferðin er ekki löng þarna upp ;)
Þrátt fyrir kulda og vind var skemmtilegt að sjá fjörðinn frá þessu sjónarhorni og allir ánægðir með að hafa farið =)

Pókerkvöld undirbúið

Fékk hjálp frá einum ungum & upprennandi (með sixpencara) við að undirbúa póker með Bjólfsmönnum.
Hann var síðan aftur á ferðinni daginn eftir...ekki alveg jafn prúður þegar enginn var að fylgjast með honum ;)

Nördabörn

Ekki leiðinlegt að til sé nóg af tölvum á heimilinu þegar allir vilja spila saman Minecraft ;)

Það hefur sína kosti að hafa undarlegan áhuga á að gera upp gamlar Apple tölvur. Þess vegna er ein auka til og ég gæti meira að segja dottið inn með þeim þar sem þau fá ekki að leika sér í vinnuvélinni "minni", enda er hún ekki "mín" ;)

Agile námskeið

Hélt aftur Agile námskeið í samstarfi við Dokkuna. Að þessu sinni var það haldið hátt uppi á 18. hæð í Katrínarturni (hann heitir eitthvað annað en eftir að þeir skiptu um nafn á götunni/torginu get ég ekki munað það gamla ;)
Allt gekk vel, Bjartur var með í för og fékk að vera óáreittur í kaffistofunni á meðan við lékum okkur hinum megin við vegginn ;) Sjá meira á Agile síðunni minni.

Spilahönnun

Hannaði spil fyrir Agile netið til notkunar í Planning Poker. Lagði niður þónokkrar hugmyndir og útfærði nokkrar áður en niðurstaðan varð til. Sem hönnunarlaun útbjó ég nokkra stokka merkta mér ;)

UTMessan

Hugsmiðjan var með bás á UTMessunni í ár og Bjartur kom með mér. Honum finnst nú ekki leiðinlegt að hjálpa til við að hella uppá kaffi því hann fékk að aðstoða við það í fyrra líka.
Síðan gat hann skottast um og skoðað allt sem var í boði á meðan ég var að hella uppá og spjalla við gesti & gangandi.
Ég náði aðeins að kíkja með honum og koma honum í biðröðuna hjá CCP. Gaman að sjá hann sitjandi að leika sér í þrívíddarheimi...gaman hvað það er mikil tækni sem þau alast upp við.
Eftir daginn var hann alveg klár á hvað ætit að kaupa næst inná heimilið...þrívíddarprentara. Það hafði verið eitt það mest spennandi sem hann sá og varði miklum tíma í að fylgjast með því. Sjálfur er ég alveg sammála honum og hlakka til að þeir verði orðin almenningseign, margt sem mun breytast með tilkomu þeirra =)

Minecraft Bjartur

Bjartur fór á námskeið hjá Skema í Minecraft. Tveggja daga námskeið og frábært að læra aðeins meira og aðallega að hitta fleiri sem eru áhugasamir um þennan skemmtilega leik.

Þegar ég spurði hann eftir seinni daginn hvort hann hefði lært eitthvað sagði hann "Nei... eða jú eitt, að hinir strákarnir hlýða ekki" ;)

Hann er merkilega mikill nörd eins og pabbi sinn...veit ekki hvort það er gott fyrir hann að eiga svona nördapabba ;)

Pizzur & pítsur

Eitt af áhugamálunum er pizzugerð og einhverntíman fékk ég brauðstein frá Nonna&Begs sem kveiki aðeins meira í þessu áhugamáli. Steininn var ég reyndar fljótur að brjóta, virtist ekki þola hitann sem ég vildi hafa hann á, og þá var fjárfest í borðofni sem rúmar eina pizzu og hefur verið mikið notaður.
Í 35 á afmælisgjöf fékk ég svo annan, ásamt flottum pizzaskera og bjór...hvað þarf maður meira ;)
Ekki var þó nóg með það heldur rakst ég á annan notaðan á bland stuttu síðar sem ég bjargaði frá eigandanum og sit því uppi með 3 ofna...sem er fínt þegar er verið að bjóða nokkrum í mat ;)
Nýji vígður í dag, gaman að sjá hvað hann er hvítur...en þar sem ég elda beint á steininum verður hann fljótur að verða svartur og brenndur...sem gerir bargðið af botninum örlítið betra að mínu mati ;)
Síðan er alltaf draumurinn að hlaða pizzaofn...kannski maður verði sér út um einbýlishús fyrst...eða bara pizzastað ;)

Annáll 2013

Ég hef gaman af því að fara yfir liðið ár og rifja upp helstu atriði. Ár er stærsta tímaeining sem ég nota og því finnst mér þetta alltaf skemmtilegt að fara yfir myndir ársins sem og allar blog-færslurnar hér.

Það virðist alltaf verða meira og meira að gera og minni og minni tími, enda ekki að búast við öðru þegar þessi 4 yndislegu börn stækka með hverju árinu. Ekki hjálpaði veikindatíð sem stóð síðasta vetur og vonandi verður aldrei aftur svona mikið af veikindum á heimilinu en Sindri átti erfitt að ná sér í ról og náði yfirleitt í eitthvað í hverjum mánuði.

Í upphafi árs var ég fenginn í smá Agile innleiðingu og hélt síðan námskeið um vorið sem heppnaðist vel og mjög lærdómsríkt. Auk þess var ég í stóru verkefni sem tók góðan tíma frá öðru stóran hluta af árinu en var jafnframt mjög skemmtilegt að halda utan um það og vinna í teyminu sem sá um það þó svo að vinnutíminn hafi oft ekki verið mjög fjölskylduvænn ;)
Einnig komst ég á námskeið hjá manni sem ég er búinn að vera að bíða eftir að kæmi aftur til landsins ;)

Þannig að draumar um frí áttu alveg rétt á sér. Helgamma kom um páskana sem var afskaplega notalegt og mörgum fannst erfitt að horfa á eftir henni í flugvélina.
Við skelltum okkur svo á Seyðisfjörð snemma um sumarið til að ná afmæli hjá Degi sem var ánægjulegt að hafa náð og náðum líka smá sól sem var ekki mikið að sýna sig fyrri sunnar. Skoðaði Tvísöng sem ég hafði aldrei séð og hafi séstaklega gaman af því að sjá hann líka hinu megin úr firðinum...svona eins og Barbapabbahús í fjallinu ;)
Fjallaskokk með Monsa var mjög skemmtilegt og hlakka ég til að taka það aftur næsta sumar.
Fjallaferð með Frænku í Lundarfarinu, afmælishátíð Hugins og gjörningur, dagsferð í Skálanes og margar góðar stundir í þessu annars frekar stutta fríi þar sem ég átti ekki mikið frí inni.

Réðst á baðið einn daginn sem var alveg kominn tími á...en þær framkvæmdir sem voru planaðar kláruðust nú ekki á árinu þannig að þetta verður nokkra ára framkvæmd =)

Ári eftir Brúðkaupspartýið skelltum við okkur í kósy ferð bara tvö sem var einstaklega notalegt.
Okkur tókst líka að hitta fólk og stunda smá félagslíf þar sem við fórum meðal annars 2 óvissuferðir, helgarferð í Veiðileysu og Hrekkjavöku.

Jólin komu svo í öllu sínu veldi þar sem dagatöl fjöskyldunnar, Bínu og mitt töldu niður dagana til jóla og áttum við gott jólafrí þar sem sleðaferðir og notalegheit voru ríkjandi.
Krílin kvöddu svo árið á Sævanginum í góðu yfirlæti og umkringd yndislegu fólki og áramótasprengjum sem krakkarnir fengu að skjóta upp...og Dagný reyndar aðeins of æst í þeim málum. Þegar að stóra kakan var komin út á götu var hún allt í einu búin að redda sér eld á stjörnublys og farin að kveikja á áður en að nokkur gat stoppað hana. Það fór þó allt vel og árið gekk í garð eins og önnur =)

B&L í lok árs 2013

Nokkrar sekúndur frá 2013

Hér er smá brot af 2013 í formi sekúndna sem er skeytt saman...ætla nú ekkert að taka sérstaklega fram hvaða forrit þetta var þar sem það er hálfgert drasl og ég mun ekki notað það aftur...en gaman að gera svona úttekt í þessu formi =)

Gámlársdagur

Rétt áður en við fórum í til Möllu&Þrastar á gamlárs náðum við mynd af okkur. Það er nú ekki alltaf sem við munum eftir því og ekki alltaf sem það tekst heldur að framkvæma það ;)

Sleðaferðir

Einstaklega vel hefur viðrað til sleðaferða og höfum við náð nokkrum ferðum. Stelpurnar hafa verið duglegastar að fara og náðum við einni ferð þar sem allir voru saman í dag. Brekkunar hjá Víðistaðatúni eru helsti staðurinn þar margir eru yfirleitt að renna og lítið sem hægt er að klessa á. Færið er reyndar aðeins of gott, búið að vera smá blautt og frysta þannig að það er ekkert sérstklega auðvellt að fóta sig...eða þægilegt þegar dottið =)

Jólaboð á 2. í jólum

Það er árlegt jólaboð hjá Bödda&Bekku á annan í jólum þar sem systurnar og fjölskyldur mæta + Balli afi.
Það er alltaf gaman að hittast og einnig alltaf gaman að fá hangikjöt (sérstaklega ef það er bara einu sinni ;) Ekki verra þegar það eru nokkrar tegundir í boði og hægt að smakka munninn. Síðan er alltaf eitthvað fleira á boðstólum sem er hægt að gæða sér af...enda eru jólin til þess ;)

Síðan er alltaf sest til við Trivial keppni. Yfirleitt er það nú stelpur vs. strákar en á ár var einnig bætt við ungir vs. aldnir. Það var skemmtileg nýbreytni...en það er nú yfirleitt skemmtilegra í kynakeppninni þar sem þar er rifist svo skemmtilega mikið ;)