Sunna 6 ára

Hún er alltaf jafn yndisleg þessi prinsessa sem er öllum svo góð og allt virðist vera henni mögulegt. Ég held ég þekki fáa einstaklinga sem eru jafn góðir og tilbúnir að hjálpa til og gera næstum hvað fyrir aðra eins og þessi litla snót. Það er frábært að eiga svona litla stelpu á heimilinu og fá að sjá hana vaxa úr grasi, litla skólastelpan.

Dagný 4 ára

Þessi stelpa er orðin 4 ára...og það er merkilegt að hún sé ekki eldri hún er svo fyrirferðamikil ;) Það er aldrei lognmolla í kringum hana og alltaf sama stuðið. Á morgnanna er vaknað í hressu skapi og því er haldið í gegnum daginn og jafnvel þó hún sé þreytt og pirruð þá er hún alltaf fljót að snúa öllu uppí grín og hafa gaman að hlutunum. Stórt knús á hana sem er alltaf svo dugleg að knúsa & kyssa...þó svo að strákarnir á leikskólanum séu ekki jafn hrifnir því og ég ;)

Lúðvík XII

Lúðvík er einstaklega góður, hreinasta sælgæti og hverrar krónu virði ;)

Skipulagsdagur

Einn af 6 skipulagsdögum í Hafnarfirði var í dag. Það hentar ekkert sérstaklega vel að eiga leikskólakennara þegar að hún getur aldrei verið heima þegar þessir dagar koma upp ;)
En á móti verð ég að taka mér frí og það er ekki leiðinlegt að skella sér í sund með þessu liði í haustsólinni og stússast um bæinn. Bjartur hafði reyndar engan áhuga enda er hans líf farið að færa æ meira í Minecraft með hverjum deginum. Nokkuð magnað hvað hann er klár í þessum leik og þeir fá oft að vera 2-3 að spila saman heima þannig að skiljanlega er það meira spennandi en margt annað ;)
Ég, Sunna, Dagný & Sindri skellum okkur í sund og veðrið var einstaklega gott þar sem við lágum í sólinni í "gömlu" Kópavogslauginni í góðan tíma og allir voru sáttir þó að yngstu (sérstaklega Sindri) væru orðin þreytt...enda tóku þau góðan lúr í bílnum á meðan ég og Sunna stússuðumst smá.
Þau vöknuðu svo tímanlega til að kíkja með í nýju vinnuna og síðan var farið í ísbúð á leiðinni heim sem er aldrei leiðinlegt.
Myndina tók Bína af stelpunum einhvern af síðustu morgnum, hún er bara svo skemmtileg að ég var að nota hana =)

Skólafólk

Þau voru afskaplega mikil krútt á leiðinni í skólann þegar ég rakst á þau fyrir utan leikskólann...ekki leiðinlegt að eiga stóran bróður til að hjálpa til við að byrja skólagönguna =)

Hugsmiðjan heilsar

Aðeins örfáir dagar komnir hjá Hugsmiðjunni og mér líst rosalega vel á staðinn og fólkið. Ég er mjög spenntur að komast inní málin og taka virkan þátt í framtíðinni með þeim og það er margt sem liggur fyrir að koma í fastari skorður og verður gaman að takast á við. Andinn virkar mjög vel á mig og ég fæ ekki betur séð en að þarna sé saman komið einstaklega gott og skemmtilegt fólk sem ég hlakka til að kynnast betur á næstunni og um ókomna tíð =)

Síðasti vinnudagurinn...

...í Landsbankanum í dag eftir á 3ja ár sem ég hef lært margt af. Á þessum tíma hef ég kynnst mjög vel Agile hugmyndafræðinni auk þess að hafa verið í þremur teymum sem hafur gefið mér mikið. Full af frábæru fólki og góðar minningar sem ég tek með mér. Hlakka til að sjá hvert þau fara með bankann minn =)

Gamification

Skráði mig í námskeið á netinu í Gamification sem byrjar mjög vel. Þegar eru tvær vikur búnar og fyrsta verkefnið sem var aðeins 5 spurningar en þó þurfti ég að hugsa mig vel um á 2 þeirra og önnur fannst mér snúin, en þetta endaði allt rétt eftir smá íhugun.

Námskeiðið er skemmtilega sett upp:

• Myndskeið í hverri viku (um 5 stykki sem eru um 10 mín að lengd) og í þeim koma spurningar inná milli sem hægt er að svara, svona til að sjá hvort allir eru ekki öruglega að meðtaka ;)
• 4 krossapróf þar sem niðurstöðurnar birtast strax og búið er að svara og skýring á möguleikunum. Reyndar er hægt að taka það oftar en einu sinni, á eftir að sjá hvernig það virkar.
• 3 skrileg verkefni sem aðrir nemendur fara yfir og gefa einkunn (það verður fróðlegt, amk nóg af fólki en það voru 8000 nemendur búnir að skrá sig)
• Lokapróf sem er krossapróf með áherslu á seinni hluta námskeiðsins

Fyrirlestrarnir eru stuttir og skemmtilegir og þægilegt að sjá kennarann samhliða (inná) glærunum og hann er líka aðeins að brjóta þetta upp t.d. með að hafa falin skilaboð í fyrstu myndböndunum...sem ég á enn eftir að reyna að leysa ;)
Mæli með að skoða Coursera því þarna eru námskeið af öllum toga og allir ættu að geta fundið eitthvað við sitt hæfi.

Sunna fótboltastelpa

Fyrsta fótboltamótið hjá Sunnu var í dag. Við mættum snemma og fljótlega fylltist allt af ungum fótboltakeppendum og foreldrum. Þær voru nú ekki alveg með á nótunum hvað var að gerast í fyrsta leik og gaman að því hvað það þurfti að útskýra allt fyrir þeim. En þær voru fljótar að ná þessu og næsti leikur var á móti "gestaliði" sem vildi svo vel til að vera foreldrar. Þeim tókst nokkuð auðveldlega að sigra okkur og skemmtilegt að fá að taka þátt í mótinu með þeim (eða móti þeim).
Leikirnir voru kláraðir og gaman að sjá að leik loknum tókust þær í hendur og síðan dönsuðu liðin sem voru að spila saman í hring og sungu "Ole". Ég er ekki viss um það verði alltaf svo mikil samheldni í framtíðinni hjá þessum fótboltastelpum ;)
Síðan var verðlaunaafhending og myndataka af liðinu. Frábært mót og gaman að taka þátt og sjá þessar upprennandi fótboltastjörnur taka sín fyrstu skref.

Snorri

Nonni&Begs redduðu mér Snorra sem er aðeins fáanlegur í flugstöðinni...veit ekki hvort Snorri sjálfur væri ánægður með það ;)
Einstaklega íslenskur bjór með blóðbergi sem gerir hann einstaklega "náttúrulegan". Bína var mjög hrifin af honum en það eru enn aðrir Borgara sem ég tek fram yfir hann, en skemmtileg viðbót við fjölskylduna.

Gleðiganga í rigningu

Við létum okkur ekki vanta í gleðigönguna í ár, frekar en síðustu ár. Full mikil rigning var og var myndavélin skilin eftir en það náðist þó ein mynd af krökkunum tilbúnir í pollagöllum áður en haldið var út í rigninguna og tekið þátt í gleðinni =)

Vann mér inn broskall

Ég þurfti reyndar ekki að hafa mikið fyrir því að vinna mér inn þennan broskall um daginn. Í Fjölskyldu- & Húsdýragarðinum hafa í sumar verið uppblásnar kúlur sem hægt er að fara út á vatn. Ég fór...og fékk þennan broskall...þetta er reyndar til að merkja þar sem hver dagspassi má bara fara einu sinni...en ég held að þessi broskall hafi átt vel við því áhorfendur virtust skemmta sér vel. Ég tók nú ekki mikið eftir því en allir foreldrar voru mjög brosmildir þegar ég kom úr kúlunni og margir ábyggilega haft gaman af að horfa á mig veltast um. Þetta var samt alveg merkilega erfitt og var ég alveg búinn í góðan tíma á eftir =)

Opið eða lokað

Ég set ýmsar upplýsingar hingað á netið og einnig ljósmyndir af fjölskyldunni fyrir hvern sem er til að sjá og skoða. Ég spái ekki mikið um réttindi upplýsinga og trúi því að allt efni á sig sjálft og hver sem er ætti að geta notað það til að byggja á. Þetta var vel orðað hjá góðum kennara sem kenndi mér við Háskóla Íslands þegar hann sagði Góðar hugmyndir eru til tvenns nýtilegar: að græða á þeim eða stela þeim.
Hvernig hugmyndir þarfnast annara hugmynda er mjög vel lýst í þessum fyrirlesti og einnig annar skemmtilegur um kynlíf hugmynda sem styður þetta.

En þó að ég trúi á fresli hugmynd og myndi vilja að efni væri merkt með opnum leyfum þá er spurning hvort það réttlætir það að ég setji myndir (eða upplýsingar) af börnunum mínum á netið?
Þó að ég geti sagt að ég eigi þessi börn þá eiga þau sig sjálf (að mestu) en ég ber ábyrgð á þeim og hagur þeirra er vissulega framar öllu. Því velti ég fyrir mér hvort þeirra gögn ættu að vera lokuð...flest allt eru þetta upplýsingar fyrir mig, þau, okkur, fjölskyldu og vini sem ættu jafnvel ekki að vera opnar fyrir hverjum sem er? Eða þá að ég ætti að minnsta kosti að stjórna því hver hefur aðgang að þeim?

Ekki nóg með að ég þarf að lifa með þessari ákvörðun heldur þurfa þau líka að lifa með henni og ég vil ekki að þetta geti á nokkurn hátt skaðað þau.

Er ég of auðtrúa að það sé í lagi að hafa allt opið og aðgengilegt eða er það ofsóknaræði að loka allar upplýsingarnar af?

Að horfa á eftir börnunum

Fylgdi Sunnu í dag á leikjanámskið áður en að hún byrjar í grunnskóla. Merkilegt hvað tíminn líður hratt og þau vaxa fljótt upp. Ekki nóg með að hún hjólaði sjál alla leiðina heldur ætlaði Bjartur að fylgja henni heim, en hann mætir klukkutíma seinna á sitt leikjanámskeið.

Þegar ég fylgist með krökkunum vildi ég geta gefið þeim allt og uppfyllt allar þeirra óskir...en sem betur fer get ég það ekki. Þetta er þeirra líf og þau verða að upplifa það á sínum forsendum og hafa lítið að gera með að fá allt uppí hendurnar. Ég mun vissulega gera allt sem í mínu valdi stendur til að hjálpa þeim og vil allt fyrir þau gera en ég verð líka að leyfa þeim að vaxa í friði.

Stundum dettur maður í það far að reyna að stjórna þeim og "móta" þau eftir mínum hugmyndum. Í staðin þarf ég að reyna að leiðbeina þeim í rétta átt ef þau fara ranga leið og vera til staðar ef þau þarfnast mín. En ég þarf reyndar líka að gefa mér tíma til að verja með þeim í þeirra "heimi". Það er merkilegt hvað ég get verið upptekinn við að sinna hlutum sem mér finnst mikilvægir og vissulega finnst mér ég eiga að gera það...en í raun skipta þeir engu máli þegar krakkarnir vilja hafa mann nálægt og gera (nánast) hvað það sem hugmyndaflugið dregur þau áfram í. Ef þau hafa áhuga á einhverju ætti það að vera nóg og ættu bara að fá stuðning í því, hversu óþolandi eða skítugt það kann að vera ;)

Stundum verð ég þó að ráða, en ég verð að komast inná að gera það að sameiginlegri niðurstöðu í stað þess að vera alltaf að stjórna og vinna með þeim að lausnum sem allir eru sáttir við (win-win).

Um daginn fékk Dagný martröð að pabbi(ég) væri skrímsli og mamma talaði við eins og ekkert væri eðilegra. Ég vil ekki vera skrímsli í augum barna minna og þarf að hugsa hvernig ég er kem fram við þetta yndislega fólk "mitt" þannig að ég verði aldrei skrímsli í þeirra augum...nema bara í stakri martröð =)

Sumarfrí á Seyðis

Eftir nokkra góða saga í sólinni heima fyrir skelltum við okkur með skarann í bílferð austur á Seyðisfjörð. Náðum að keyra með smástoppum alla leið á Akureyri þar sem við skelltum okkur í sund. Að baðferð lokinni fengum við okkur að borða og héldum ferðinni áfram og komum óvænt á Múlaveginn undir kvöld.
Blíðviðri tók á móti okkur á Seyðisfirði og mörg ár síðan við höfum fengið lengt í góðu veðri þar…ætli það hafi ekki verið svona gott því enginn vissi af komu okkar ;)
Sindri var með streptó og eitthvað þurfti ég nú að ná mér í pest og þrátt fyrir að reyna að halda henni í skefjum með verkjatöflum var ég orkulítill næstu vikuna.
Þrátt fyrir að við gerðum nú ekkert merkilegt þá er alltaf gott að vera í fríi (heima) á Seyðis. Hefði viljað hitta meira fólk og drekka meiri bjór, en það tókst að taka kortu með Snorra, fá spákaffi, njóta veðursins, sundferðir, hoppa á trampólínu, lækjarferðir, leikvellir, út að borða á Skaptfell (loksins fengum við okkur pizzu þar) og síðan haft það gott eins og hægt er að sjá af myndunum frá fríinu á Seyðis.
Eftir um 2 vikur lögðum við af stað heim og ákváðum að fara suðurleiðina. Vorum nú ekki jafn snemma á ferðinni eins og þegar við komum og lögðum ekki af stað fyrir rétt fyrir hádegi. Eftir klukkutíma ældi fyrsti krakkinn og næsti klukkutíma seinna þannig að það leit nú ekki út fyrir að þetta yrði auðveld ferð. Tókum sundferðina á Höfn þar sem við vorum svo "sein" fyrir og þurfti að þrífa suma eftir bílveikina.
Sindri var þá kominn einhverja augnsýkingu sem ágerðist yfir daginn og þegar við renndum inní bæinn fórum við með hann beint uppá vakt þar sem hann fékk lyf við auganu og var hann þá orðinn eins og vel kýldur slagsmálahundur en alveg merkilegt hvað hann var duglegur og lét ekki í sér heyra fyrr en þegar við renndum í hlað á vaktinni.
Hann náði sér svo strak og við áttum notalega daga heima þar til nú er sumarfríið á enda í ár og myndirnar í júlí eru bara af ferðum í húsdýragarðinn (enda fínt að nýta kortið). Rólegt og notalegt frí og gott að ná góðum tíma á Seyðis í góðu veðri =)

Sumarfrí

Sumarfríið byrjað og fyrsta verk var að klippa mig...búinn að bíða lengi að létta af hausnum og fór einmitt og keypti nýjar klippur í gær og það fyrsta sem ég gerði þegar ég kom heim var að klippa mig =)
Í dag var tekið aðeins til og létt á geymslunni og síðan skellti ég mér í sund með stelpunum...nú er bara að komast í frí gírinn =)

Fyrsta útilegan í fimm ár

Enduðum í útilegu um helgina við Apavatn. Brakandi blíða og það lá við að allir önduðu léttar þegar skýin dróu sig fyrir ;) Fengum lánað tjald og fleira þannig að við komumst með góðu fólki. Fengum sem betur fer líka lánaðan hitablásara því annars hefði orðið aðeins of kalt og sérstaklega þegar það helliringdi yfir hánóttina. En sem betur fer var ekki rignin á sunnudagsmorgninum og hægt að koma öllu & öllum þurrum í bílinn.

Fjölskyldudagur Víðivalla 2012

Veðrið rétt slapp, það dropaði á okkur og hitinn var rétt nægur þannig að ekki þurfti að klæða sig of mikið. Slapp meira að segja til að Sirkus Íslands gat verið í sínu vanalega dressi og var það hin mesta skemmtun jafnt fyrir börn og fullorðna (ekki síður þá eldri ;)
Nokkurhunduruð pyslur sem við grilluðum ofan í liði og þetta er orðið mjög smurt hjá okkur, enda margir vanir.
Síðan gátum við keypt gjafir fyrir skólann fyrir Skógardeildina sem verður næsta skólaár uppí Kaldárseli og frábært að þessi hugmynd sé loksins orðin að veruleika 2 árum eftir að við héldum að hún yðri. Verður gaman að sjá hvernig skólinn þróast með tilkomu útideildarinnar.

Rómeó & Júlía

Við skelltum okkur á 10 ára afmælissýningu á Rómeó & Júlíu hjá Vesturporti. Það hefur oft staðið til að sjá þessa sýningu og vel við hæfi að ná þessari 10 ára afmælissýningu þar sem við erum einmitt 10 ára ;)
Fengum sæti á sviðinu sem var mjög skemmtilegt að sitja og horfa fram í salinn. Sýningin var frábært og ég væri alveg til í að sjá hana aftur...jafnvel eftir 10 ár ;)
Ætli ég verði ekki að setja hana í fyrsta sæti með Faust en ég get ekki alveg gert uppá milli þeirra.

Þjóðhátíðardagurinn

Veðrið varð merkilegt gott miðað við hvernig spáði. Héldum að það þyrfti jafnvel pollaföt en það ringdi ekkert, bara sól og blíða.
Slepptum göngunni í ár og fórum beint niður á Víðistaðatún þar sem var leikið og fengið sér nammi áður en við settumst í brekkuna og horfðum á skemmtiatriðin.
Krakkarnir fóru reyndar að leika sér og kíkja uppað sviði, enda skemmtilegra að vera nálægt.
Síðan var haldið í kaffi til Bekku&Bödda seinnipartinn þar sem við náðum í einhverja þó við værum full sein fyrir, enda vorum við að reyna að ná öllum skemmtiatriðunum og Bjartur ekki alveg að skilja hvað það ætti að þýða að vera með kaffi á þessum tíma ;)

Allt Um Póker.com - 1 árs

Fyrir ári síðan opnuðum við Elli AlltUmPóker.com sem griðarstað fyrir pókerefni sem við höfum verið að safna saman meðfram pókerklúbbnum.
Það hefur nú ekki mikið gerst þarna þetta fyrsta ár, en þetta er ágætis byrjun ;)
Í tilefni dagsins bauð ég heim í spil og þangað mættu Bjólfsmenn, fyrrverandi vinnufélgar, nágrannar og vinir.
Bjólfsmenn fóru nú að skjóta á mig að ég væri nú ekki lengur með heppnisstimpilinn á mér og ætti bara að hætta þessu þannig að ég fékk Lady Luck í lið með mér og tókst að næla mér í annað sætið með amk 3 höndum sem ég grísaði á að tapa ekki. Ég var reyndar helvíti kaldur í nokkur skipti að blöffa en þegar ég hélt á 23 á móti Timbrinu og var búinn að byggja upp góðan pott og setti hann næstum allan inn hélt ég að nú væri þetta búið. Hafði skell inn það hárri upphæð að hann gat ekki annað en sett allt sit út. En hann gaf frá sér spilið og af sérstökum kvikindisskap var ég að sýna honum höndina sem bætti ekki einu sinni borðið...ekki mjög fallega gert en það var "sætur" pottur fyrir mig.
Þannig að fyrsta (árlega) afmælismót AlltUmPóker.com gekk bara vel fyrir sig, þó svo að það hafi tekið 5 tíma að klára 8 manna borð. Það var ekki að ástæðu lausu að 16. júní var valinn til að tryggja að alltaf væri frí daginn eftir og vonandi verður næsta mót enn betra, veglegra og skemmtilegra og þakka þeim kærlega sem mættu ;)

Óvissuferð Kanínanna

Tókum smá skrall með Kanínudeild. Fyrst voru það borgarar (reyndar á eftir fótboltaleik ;) og síðan var farið í nokkra hressa og skemmtilega útileiki.
Síðan var haldið áfram í partýinu inni og teknir upp gítarar...þegar Bína benti mér á að við værum að fara var klukkan orðin 2 og við ein eftir með húsráðendum þannig að það var víst orðið tímabært að koma sér ;)

Fjölskyldudagur í Selvík

Alltaf jafn vel heppnaður fjölskyldudagurinn hjá starfsmannafélagi Landsbankans í Selvík. Veðrið gott, matur, nammi, hoppukastali, skemmtiatriði, bátar, ís, candýfloss...

Krakkarnir í vinnuna

Tók eldri krakkana í vinnuna og höfðu þau mjög gaman að. Skottuðumst um hæðirnar í ratleik og síðan fóru stelpurnar að horfa á bíó á meðan Bjartur sökkti sér í tölvuverið sem var sett upp á neðstu hæð.
Dagný var nú hálf hrædd við Sprota þegar hann mætti en hin tvö höfðu gaman að því að "leika við hann" (toga í skottið á honum og hlaupa í burtu flissandi).
Frábært framtak hjá skemmtinefndinni og á leiðinni heim var spurt hvenær við færum aftur í vinnuna til pabba ;)

Fjarfyrirlestur

Við í Agilenetinu stóðum fyrir smá tilraun með fjarfyrirlestur og fengum Henrik Kniberg til að spjalla við okkur, þetta kom vel út og punktaði ég niður smá samantekt og fleira.

Bjartur 8 ára

Hann var hæstánægður með að fá að halda afmælið sitt í Ævintýragarðinum með vinum sínum (bekknum, einum öðrum og svo fengu systkini hans að koma líka ;). Sem betur fer vorum við með kökur með okkur því þau hámuðu pizzurnar fljótt í sig, enda vel svöng eftir daginn. Síðan var hoppað, hlaupið, grátið, leikið og ég veit ekki hvað þarna út um allt.
Um kvöldið var hann svo þreyttur að hann lagist útaf á eldhúsbekkinn og steinsofnaði =)

Austur með stelpunum

Þær eru miklar vinkonur þessar skvísur og rosalega duglegar. Þær fengu að fara með mér austur og hitta Helgömmu á meðan ég var á fermingarmóti og það fór nú ekki mikið fyrir þeim. Á leiðinni í vélinni hitti ég Tomma Tomm og spjallaði við hann alla leiðina á meðan stelpurnar dunduðu sér.
Á Seyðis voru þær bara í góðu yfirlæti hjá Helgu og hitti ég þær varla aftur fyrr en á sunnudagsmorgninum þegar þær báðu um leyfi til að fara út að hoppa. Komu reyndar strax aftur inn að klæða sig betur og ég fór nú einhverntíman fram og bað þær um að hafa ekki svona mikil læti (nágrannanna vegna) en þær hoppuðu fram að hádegi ;) Sunnu hafði tekist að suða trampólínið út daginn áður ;)
Ekki leiðinlegt fyrir þær báðar að eiga góða systur =) Vonandi haldast þessi vinabönd um ókomna tíð hjá þeim.
Nokkrar myndir náðust frá helginni.

Fermingarmót 2012

Í tilefni 20 ára fermingarafmælis var haldið bekkjamót hjá '78 árgangnum frá Seyðisfirði. 10 ár síðan við hittumst síðast og mest lítið breyst...nema við höfum elst um 10 ár, sumir með minna hár og meiri bumbur og margir orðnir hálf gráhærðir foreldrar ;)
Það var byrjað á því að hittast og skála á Öldunni á föstudeginum í sól og blíðu. Ánægjulegt að sjá fjörðinn í góðu veðri aftur...allt of langt síðan ég hef verið í sólinni þar. Um kvöldið var grillað hjá Ólu Lomm og tekið á því fram eftir nóttu.
Á laugardaginn slepptum við róðrakeppninni og skellum okkur út á Skálanes sem var frábær ferð þar sem Hjalti mætti á rútunni og Óli var leiðsögumaður allan tímann og ánægjulegt að fatta loksins út á hvað þetta gengur hjá honum.
Síðan var það Sjómannadagsball og daginn eftir hittust þeir sem gátu í þynnkumat á sjoppunni áður en haldið var heim.
Frábær hópur og frábær helgi og vel við hæfi það var ákveðið að hittast næst eftir 5 ár svo það líði ekki of langt á milli og við verðum ekki jafn vör við að hversu mikið við höfum elst í hvert skipti...þó svo að við sem vorum þarna tókum reyndar ekkert eftir því en aðrir sem heima sátu og skoðuðu myndir fannst við eitthvað ellileg...enda er heimasetufólkið allt sköllótt og með bumbu =)

Fjölskyldukort í Húsdýragarðinum

Það viðraði svo fínt á Hvítasunnudaginn að við skelltum okkur í Fjölskyldu- og Húsdýragarðinn og fengum okkur á árskort til að hafa góða ástæða til að kíkja nokkrum sinnum í garðinn í sumar og jafnvel yfir veturinn.
Stóru krakkarnir léku sér sjálfir og hlupu um á meðan við fylgdumst með þeim yngri. Sunna var ein í Krakkafossinum að fara hverja ferðina á eftir annari þannig að ég og Dagný fórum með henni. Það var hin mesta skemmtun og var Dagný alveg að missa sig úr spenningi því þetta þótti henni svo skemmtilegt.
Þannig að við eigum ábyggilega eftir að taka nokkrar ferðir í sumar og kíkja á dýrin og leiktækin ;)

Sunna útskrifast af Víðivöllum

Sunna kláraði leikskólann í dag. Þá eru bara nokkrir dagar eftir fram að sumarfríi, þar á meðal útskriftarferð, vorhátið og fleira skemmtilegt og síðan tekur skólinn við hjá henni eftir sumarið. Hún er afskaplega dugleg og á ábyggilega eftir að standa sig með prýði í því verkefni =)

Bjórskólinn

Fór með frábæru fólki í bjórskólann og er búinn að bíða þess lengi að setjast á þennan skólabekk. Ég byrjaði reyndar að spyrja kennarann út í ýmsar staðreyndir sem ég þekki varðandi framleiðsluna hjá Borg. Þegar ég spurði hvort við fengjum Snorra leiðrétti kennarinn mig að það væri Sumarliði sem væri á leiðinni. En þegar ljóst var að Snorri lá einnig á tönkum endaði það þannig að ég fékk viðurnefnið Snorri það kvöldið svona fyrir að vera "besserwisserinn" í bekknum ;)
Eftir skólann fórum við í bæinn að fræðast meira og nýta okkur þann lærdóm sem við meðtókum. Frábært kvöld með frábæru fólki og hin mesta skemmtun. Ég er klár á því að ég muni þurfa að fara í endurmenntun við tækifæri ;)

Sunna í Borgarleikhúsinu

Sunna kláraði ballettinn í dag með sýningu í Borgarleikhúsinu ásamt stórum hóp nemenda í Listdandsskóla Hafnarfjarðar.
Hún var rosalega flott og vorum við afskaplega stolt af stóru stelpunni sem stóð sig með prýði og var rosalega dugleg í öllum undirbúningum og æfingum undanfarið og í dag.
Sindri "litli" fékk að vera heima hjá Svölu, Lilju og Ásthildi en Bekka amma kom í hans stað með okkur að horfa.
Bjartur var nú ekki að nenna þegar við lögum af stað en hann hafði rosalega gaman að kynninum og ekki síður öllum atriðunum. Dagný var ekkert smá spennt að sjá systur sína á sviðinu og veifaði henni og kallaði þegar hún loksins sá hana. Spurði Sunnu í kvöld hvort hún hefði séð okkur og hún sagðist hafa séð höndina hennar Dagný vera að veifa sér ;).
Eftir sýningu afhenti Bjartur henni rauða rós frá okkur til að fagna þessari fyrstu alvöru sýningu hjá ballerínunni. Eftir var svo haldið uppá frammistöðuna með ísbíltúr ;)

Stelpurnar í búðarferð

Systurnar voru í búðarferð með mér. Dagný vildi endilega halda á pokanum en það reyndist ekki jafn auðvelt og hjá pabbanum þannig að Sunna kom til hjálpar og voru þær mjög uppteknar af því að vera að sjá um þetta sjálfar =)

Vatnaveröld

Það er góð fjölskylduferð að skella sér í bílinn, keyra inn í Reykjanesbæ, sund í Vantaveröld og borðað á KFC á eftir...þetta höfum við gert nokkru sinnum og gerðum um daginn.
Vatnaveröld er mjög hentugur sundstaður þegar börnin eru lítil og geta þau haft endalaust gaman að. Reyndar lenti Sunna í að fá sund-körfluboltaspjald ofan á sig og hefði getað endað illa, en ég var sem betur fer nærri og allt fór vel...starfsmaður kom um leið og sagði að þetta gerðist þar sem að botnin sem að hélt spjaldinu læki. Ég var of upptekinn til að benda viðkomandi á að fjarlægja þetta á meðan það væri gert við þetta..
En það voru allir sáttir við ferðina og ekki síður sáttir við að fara á KFC sem hefur RISA stórar klifur- og rennibrautarsvæði sem að verður reynar oft til þess að lítil eirð er að sitja og borða...en það skemmta sér allir vel ;)

Sumardagurinn fyrsti

Fyrsti sumardagur var tekinn snemma þegar að yngsti fjölskyldumeðlimurinn vildi ekkert vera að eyða "morgninum" í eitthvað hangs í rúmminu. Hann fékk nú samt að liggja aðeins uppí þangað til að Dagný mætti og þá var ekkert annað að gera en að byrja daginn með hafgragraut.
Restin skreið svo á fætur á aðeins eðlilegri tíma og síðan var haldið niður á Víðistaðatún þar sem eldri krakkarnir fóru í víðavangshlaup. Stelpurnar hlupu saman og passaði Sunna vel uppá litlu systur: leiddi hana allan tímann og hjálpaði henni upp þegar hún datt. Það var ekkert verið að stressa sig yfir að vera fyrstar heldur bara að vera saman.
Bjartur hljóp svo aðeins lengri leið og þar var takmarkið bara að komast á leiðarenda. Ég var með myndavélina á lofti og hafði gaman að því að heyra hann á spjallinu við bekkjarbróður sinn...það voru engar áhyggjur af því að vera í forystu, enda var hann alveg með það á hreinu að hann var 4 síðasti og sáttur við með sitt.
Ég hafði nú ekki vit á því að klæða mig í hlaupagallann og taka 2km hlaup...kannski á næsta ári ;)

Smá slökun fram eftir degi og fórum svo í kaffi til Bödda&Bekku þar sem ég hlýddi Bjarti og fór í sófann eins og ég geri ALLTAF að hans sögn...sem er jafnvel rétt...en það bara svo rosalega gott að leggja sig í honum ;)

Út að borða og svo fengu allir ís...góður dagur, góð byrjun á sumri.

Svipaðar systur?

Ég get seint sagt að Sunna & Dagný séu mjög líkar...þó svo að margir segi það og hef meira að segja verið spurður hvort þær væru tvíburar...þá sé ég það ekki...en þegar ég tók þessa mynd af þeim út á svölum átti ég nú hálfgerðum vandræðum að sjá á milli hver væri hvor...en held að það sé nú bara hárið sem var að valda þessum vandræðum hjá mér ;)

Páskabörn

Það var fríður hópur sem hljóp um allt hús í morgun í leit að páskaeggjunum sínum. Bjartur & Sunna földu eggin og Dagný fékk að hjálpa til. Síðan fylgdi Sindri þeim hvert sem þau fóru og hafði ekki smá gaman af því að vera hluti af genginu.
Síðan var öllum stillt upp í ljósmyndatöku og eins og sjá má af myndinni hér fyrir ofan voru sumir alveg með'da ;)
Eggin voru svo opnuð og Sindri sat sem fastast kyrr þarna á gólfinu...enda hæstánægður að moka uppí sig súkkulaði. Hann sat þarna einn og yfirgefinn alveg þangað til að eggið hans var búið. Þá fór hann á stjá og byrjaði að betla súkkulaði af pabba sínum og stela af systkinum og var fljótur að koma sér af vettvangi áður en að nokkurt þeirra tók eftir því að hann náði sér í bita ;)

Páskabjórinn

Þó svo að Benedikt 9. frá Borg hafi verið rosalega góður þá var Páska Bock frá Víking var páskabjórinn hjá mér í ár. Einstaklega vel heppnaður fyrir mína bragðlauka: mildur, sætur og ögn af brenndu bragði en ekki of mikið...hreint sælgæti =)

Páskaeggjaleit

Það var góður hópur af krökkum sem leitaði að páskaeggjum í Hellisgerði eftir vinnu. Baldvin Hrafn og Gústaf Bjarni fóru snemma og földu eggin og síðan mættum við eftir vinnu og þó svo að ekki nema 4 vinkonurnar hittust voru 13 börn sem hlupu út um allt Hellisgerði í ágætis veðri og fundu öll eggin. Reyndar var lengi leitað að auka eggi þangað til að uppgötvaðist að Sindri var með það ;)

Dagný ballerína

Dagný kláraði fyrsta dansárið í dag. Hún var rosalega flott og ekki nóg með að hún kunni og gerði allt heldur var hún einstaklega hjálpsöm og tók ákafan þátt í öllu ;)
Ég fór nú reyndar með hana í einn tíma í vetur og var ekki alveg það sama uppá teningnum þá...meira ekki neitt tekið þátt og endaði það með því að ég varð að lofa sjálfum mér að fara ekki með hana aftur þar sem líklega var það eitthvað undarlegt að hafa pabba allt í einu meðferðis og ekki mömmu.
Hún er yndislegt skrípó þessi stelpa og væri gaman að prófa að kíkja inní hugsanir hennar...dansandi um í sínum eigin heimi eins og sannkölluð ballerína og alltaf í stuði ;)

Borgarar

Eftir að ég fékk einn Surt frá Borg og nældi mér í síðustu 2 Úlfana í ríkinu fór ég að safna saman öllum bjórunum frá þeim. Þó svo að Skógarpúki sé ekki til var hann aðgengilegur í gegnum Þorragull. Stekkjastaurar eru enn til á heimilinu og Benna fékk ég með góðum fyrirvara. Október átti ég nú ekki von á að komast yfir en Rakel átti einn hjá sér þannig að þá var allt komið nema einn, þannig að 8/9 er ágætis árangur ;)
Valgeir & Þyrí komu heimsókn og tók bruggmeistarinn með sér jólabjórinn sinn og annan Surt svona til að halda hinum félagsskap ;) Jólabjórinn passaði vel í þennan hóp og gaman að smakka loksins vel á Surtinum sem stendur vel undir nafni og hefur mjög skemmtilega reykt bragð.
Borg bjórarnir eru hver öðrum betri og þegar þeir hittast allir saman verður úr stórveisla fyrir skynfærin.
Gott kvöld að baki og hlakka til að gera þetta aftur og verður gaman að sjá hvernig næsta Borg söfnun verður, en líklegast verða erlendu bjórarnir úr Kaupmannahafnarferðinni teknir fyrir næst ;)

B&L 10 ára

Í tilefni af því að við erum 10 ára skelltum við okkur á gamla góða staðinn ;)
Erum komin með barnapíu þannig að nú verðum við jafnvel dugleg að skreppa út úr húsi...sérstaklega núna þegar við erum að halda uppá 10 ár samstarfsafmælið =)

Flottir afmælisgestir

Þessi krakkahópur var hluti af afmælisgestum hjá Jönu Maríu & Emil Gauta í mars. Hef alltaf jafn gaman að því að horfa á þennan hóp saman =)

Gæðingar

Er búinn að vera að smakka gæðinga undanfarið og held ég sé sáttastur við Lagerinn frá þeim en Státinn finnst mér líka skemmtilegur og get verla gert uppá milli þeirra. Pale Ale-ið finnst mér ekki nógu góður...en verður spennandi að smakka aftur Jólabjórinn sem ég lofsamaði mjög þegar ég smakkaði þann fyrsta (og eina hingað til) rétt fyrir síðustu jól.

Flogin frá Köben

Vorum fyrr á ferðinni en við áttum von á og ferðalagið á flugvöllinn var auðvellt með Metro. Mjög skemmtilegt þetta Metro og samgöngukerfin í Köben virðast vera mjög framarlega, sérstaklega miðað við litla Ísland..
Tókum sleezy burger á flugvellinum, bara fyrir mig, og fengum svo að bíða í full langan tíma eftir að komast að öryggishliðinu...ekki það mest spennandi og aðeins meira að gerast á þessum flugvelli á sunnudegi miðað við Leifsstöð á miðvikudegi...kannski betra að reyna að flúga á virkum dögum næst ;)
Lögðum okkur í vélinni og brunuðum svo beint heim þar sem tekið var á móti okkur með smá veislu í faðmi fjölskyldunnar og skálað fyrir okkur brúðhjónunum ;)
Þannig að nú eigum við kampavínsglösin tilbúin fyrir brúðkaupsveisluna sem plönuð er síðar á árinu.
Fyrsta brúðkaupsferðin á enda og næsta er plönuð á 1. brúðkaupsafmælinu...eftir 4 ár ;)

Týnd í Köben

Byrjuðum á að fara í verslunarferð, nú var verið að versla smá á mig og svo gjafir fyrir krakkaskarann. Við reyndum að hemja okkur í dótainnkaupum en náðum ekki strikið á enda því ég vildi endilega stoppa í bjór á Charlies bar þar sem við fengum pumpaðan bjór sem mér fannst mjög spennandi. Ég var nú á því að vera bara á barnum en ákváðum að fara í smá gönguferð upp Nörrebro og finna þar prinsessukjóla.
Ég ætla að kenna bjórnum um að áttavitinn í mér var ekki alveg réttur sem varð til þess að við enduðum uppá Österbro. Í Österbro stóðum við í strætóskýli eins og tvö spurningarmerki þar sem við vorum engan vegin því hvernig okkur tókst að fara svona út af áætlaðri leið. Þegar við fengum hjálp hvert við ættum að fara tókum við smá kraftgöngu því við vorum einnig í kappi við tímann...ef búðirnar skyldu loka eins og aðrar klukkan fjögur.
Allt hafðist þetta á endanum og þessi "smá" göngutúr var ekki bara til að ná af sér bjórnum heldur skildi hann á endanum einnig meira eftir sig en 2 gylltir prinsessukjólar fóru með okkur á hótelið =)
Þegar við komum á hótelið komum við við á Sushitreat sem er opið inná af hótelinu og tókum með okkur 20 bita uppá herbergi. Ég var rosalega ánægður að ná fá sushi og Bína smakkaði líka og líkaði bara vel þannig að það gæti tekist á endanum að koma henni uppá þetta ;)
Um kvöldið hittum við svo Hörpu&Guðjón á Reef 'n Beef þar sem við skemmtum okkur yfir drykkjum og gæddum okkur á krókódílum og kengúrum. Góður endir á góðri ferð í kóngins Köbenhaven með góðum vinum =)

Túristar í Köben

Hófum daginn fyrr en áður og drifum okkur beint í dýragarðinn. Við vorum hæstánægð með garðinn og vörðum drjúgum tíma í að ganga um og sérstaklega að fylgjast með öpunum. Einnig var umgjörðin utan um fílana mjög skemmtileg og verður gaman að sjá þegar búið verður að klára að taka garðinn í gegn. Eftir margra tíma göngu með dýrunum fórum við aftur niðrí bæ og hafist handa við að fara í búðir. Bína lagði af stað í fyrstu búðina og eftir stutta stund var ég orðinn leiður og fór í bjórleiðangur. Hafði lofað Borg að fara með bjór fyrir þá í Ölbutikken þannig að ég sótti þá uppá hótel og skrapp með strætó þangað. Þó það hafi verið erfitt að skila af mér stóð ég mína pligt og keypti nokkra bjóra sem afgreiðslumaðurinn mælti með (meira um þá síðar þegar þeir verða opnaðir).
Ætlaði reyndar að kíja á Mikkeller bar á leiðinni til baka en fór upp ranga götu og fór á mis við hann (í þetta skiptið ;)
Nennti svo ekki að bíða eftir strætó og gekk til baka, enda ekki svo langt og þegar ég kom á Strikið var Bína enn í sömu búðinni. Henni hafði tekist að kaupa hálfa búðina og var bara nokkuð ánægð með sig og sátt við innkaupin, þannig að þá var sá hluti frá.
Nú var kominn tími til að fá sér eitthvað að borða og planið var að taka eitthvað "létt" og maula svo smá sushi seinna um kvöldið. Enduðum á Hereford village þar sem risaborgari, kjúklingasamloka og bjórar urðu aðeins meira en "létt" máltíð. Ég var næstum fallinn í yfirlið þegar þessu hafði öllu verði gerð skil og þurfti að hafa svoldið fyrir heimferðinni uppá hótel ;) Þannig að við vorum vel góð og ekkert var að sushi um kvöldið. En við tókum Skype heim til ormanna áður en við lögnuðumst útaf eftir annasaman dag sem túristar í Köben.

Yeah baby (fyrsti dagurinn sem hjón)

Það var vel áliðið á daginn þegar við komum okkur út af hótelinu og eins og allt fræga fólkið stungum við af og enginn vissi af því að við værum að gifta okkur ;)
Gengum beint niður í áttina að Ráðhústorgi en beygðum beint inná Vesúvíó þar sem við gæddum okkur á tvemur stórum og ljúffengum pizzum Berglind&Nonni mæltu með að tékka á þessum og stað og það var vel þess virði...sérstaklega hvítlauskolían...eða hvítlauksmaukið ;)
Södd og sæl gengum við uppá Strikið og enduðum svo í smá verslunarferð í H&M en þegar komið var að kassanum kom babb í bátinn. Auðvitað var kortið komið í "botn" þar sem það er aldrei skuldfært hjá mér fyrr en 2. hvers mánaðar. Ég var nú viðbúinn því og nýbúinn að fá mér Aukakrónukort en þá vildi ekki betur en svo til að ég mundi ekki PIN númerið á því...og númerið á debetkortinu er mér löngu gleymt. Þannig að við stóðum þarna eins og algjörir túristar með enga peninga og létum okkur hverfa =)
Áttum nú samt nóga inneign fyrir klippikorti í strætó þannig að við áttum öruggt far uppí Nörrebro um kvöldið að hitta Hörpu&Guðjón. Áður en við heldum þangað fór ég nú í bankann í tölvunni og fann rétt PIN númer svo við gætum nú reddað okkur.
Við tókum strætó beint fyrir utan hótelið og vorum sem sardínur í dós með öllum hinum farþegunum þegar allt í einu vagnstjórinn tilkynnti að ekki væri keyrt uppá Nörrebro. Þá varð uppi fótur og fit um borð og allir fóru nema við og eldri kona sem stóð hjá vagnstjóranum og tuðaði nokkrar stoppistöðvar. Ég náði svo loksins tali af honum og endaði það með því hann sagði okkur að fara út og ganga bara beint af augum...ég skildi hann varla og grunaði að hann skildi mig ekki heldur en hlýddum bara og gengum og gengum...
Þegar við að lokum fundum Norrebrogötu voru komnir lögrelumenn á mótorhjólum og þyrla sveimandi yfir og augljóst að eitthvað var að gerast. En við gengum rakleitt á áfangastað til Hörpu&Guðjóns. Þar kom í ljós að mótværi voru vegna ungsdómshússins sem var rifið fyrir mörgum árum og skýrði breytingar á leiðakerfinu sem við hittum einmitt á.
H&G buðu uppá local kebab sem við sóttum á stappaðan kebabstað sem virtist vera það heitasta heitt í Norrebro (og er víst alltaf pakkaður og alltaf röð út úr dyrum). Gæddum okkur á kebabinu heima fyrir yfir dýrindis bjórum. Þar var Jakobsen drukkinn yfir matnum sem mér fannst einstaklega sumarlegur og skemmtilegur. Síðan var opnaður Ørbæk Fynsk Forår sem ég var rosalega hrifinn af. Ég var hæstánægður að fá að smakka góða bjóra, aldrei nóg af þeim og alltaf gott að drekka bjór í góðum félagsskap =)
Áður en dagurinn var allur þökkuðum við fyrir okkur og kvöddum H&G&Úlf og fundum strætó-inn okkar sem fór rétta leið í þetta sinn og skilaði okkur fyrir utan hótelið.

Ferðalag til Köben

Eftir brúðkaupskossinn skelltum við okkur uppá flugvöll þar sem við gæddum okkur á Humarpizzu í rólegheitunum ásamt hvítvíni og bjór...þetta hjónaband gat ekki byrjað betur ;)
Afskaplega notalegt að fljúga seinnipart í miðri viku og hafa næstum flugstöðina alveg út af fyrir okkur.
Þegar við lentum í Kaupmannahöfn tókum við Metro beint niðrí bæ á Nörreport og gengum niðra á Fox hótel. Ég hafði skoðað leiðina á Google maps kvöldið áður og séð að það var 7eleven á leiðinni sem við stoppuðum í og keyptum smá snarl í morgunmat. Þegar við tékkuðum okkur inná Fox mundi hressi þjónninn allt í einu eftir því að við áttu eitthvað hjá honum og sagði að við ættum góða vini...vitir menn, kampavínsflaska með kveðju frá Hörpu&Guggz =)
Klukkan var farin að nálgast fimmtudag þegar við komum uppá 4 hæð í japanskt þemaða herbergið.

Gift & farin í brúðkaupsferð

Í tilefni þess að við erum búin að ná 10 árum ákváðum við að láta loksins verða af því að ganga í það heilaga. Skelltum okkur til sýslumanns eftir hádegið og brunuðum svo beint út á flugvöll og verðum úr landi í nokkra daga ;)

Eftir trúlofunina vildi Bína nú gera þetta sem fyrst en ég hafði nú alltaf séð fyrir mér 2010 eða 2012. En óléttur komu í veg fyrir 2008 og 2010 þannig að ég fékk mínu framgengt ;)
Vorum búin að velta mikil fyrir okkur hvar við ætluðum að halda brúðkaup og hvenær. Bína kom um daginn með þá hugmynd að gifta okkur 29. febrúar og fara þá í brúðkaupsafmælisferð á 4ra ára fresti...mér leist vel á það og enduðum við á að bóka flug og athöfn fyrir 2 vikum =)

Það er stefnt á brúðkaupsveislu síðar á árinu þar sem við munum safna fólki saman og halda vel uppá þetta við tækifæri með vinum & vandamönnum...en ætlum að byrja á að njóta þessa bara tvö ;)