Sumarfrí 2009

Ekkert var farið til útlanda í ár heldur var bara farið beinstu leið á Seyðisfjörð. Innanlands ferðalag var nú ekki tilkomið vegna kreppunnar, heldur var mig farið að langa að ná góðu fríi þar og var ákveðið síðasta sumar að vera bara í rólegheitum heima í ár. Ekki fengið við nú alveg veðurblíðuna sem við höfðum óskað okkur þannig að við enduðum ekki nema 2 vikur á Seyðifirði en fórum svo aftur heim í blíðuna þar sem er búin að vera að hrella gróður á suð-vesturhorninu, þótt að mannfólkið kunni nú flest vel við og bleyti sig bara að innan ef þar ;)

Einhverjar myndir úr júlí og fleiri að austan sumarfríinu fyrir austan sem og svo smá annáll yfir hvað var gert:

Föstudagur 3. júlí
Þar sem veður var svo fínt stakk ég snemma af úr vinnunni og við fórum í bústað í Grímsnesinu með Bödda&Bekku og co.

Laugardagur 4. júlí
Veðurblíða og farið var í smá heimsókn í bústaðinn til Einars&Indu og svo haldið kyrru fyrir í bústaðnum, spilað kubb og farið í pottinn.

Sunnudagur 5. júlí
Fórum á Gullfoss & Geysi þar sem að Sunna sló í gegn hjá asískum ferðamönnum sem vildu ólmir fá teknar myndir af sér með henni. Þeim fannst hún eitthvað óskaplega mikið krútt, pínulitil að dandalast um hverasvæðið.

Mánudagur 6. júlí
Keyrðum á Slakka og þá kom þessi líka rjómablíða. Tókum okkur góðan tíma þar að skoða dýrin, borða og spila minigolf.
Kíktum á Nonna&Begs sem voru í búðast á Hellu hjá Þórunni og rúlluðum svo í bæinn.

Þriðjudagur 7. júlí
Skoðuðum raðhús í Hafnarfirði. Leist vel á, þarfnast viðhalds en gæti verið endanleg eign...ef það væri ekki bara "ástand" þá myndi maður jafnvel gera tilboð þar sem þetta væri alveg fullkomin eign þar til krakkarnir væru farnir að heiman ;)

Miðvikudagur 8, júlí
Veðurspá morgundagsins var svo góð að ég kom því í gegn að keyra austur í dag. Reyndar var það ekki ákveðið fyrr en að ganga 11 um morguninn.
Fórum úr bænum kl. 13:30 og vorum mætt á EGS 21:30. Keyrðum nokkuð greitt og tókum smá stopp á Höfn og síðan Öxi uppá hérað þar sem við hittum Helgömmu og co. hjá Degi og co.

Fimmtudagur 9. júlí
Nóg að gera í garðinum á Múlaveginum í góðu veðri.

Föstudaguri 10. júlí
Skruppum í sund á Egilsstöðum og fórum svo niður á Seyðisfjörð og sóttum lykla að húsi við ánna sem við leigðum í viku. Gafst reyndar ekki tíma til að sofa þar í nótt, enda ekkert stress. Höfðum upphaflega ætlað að létta undir gistiaðstöðunni á Múlaveginum þar sem von var á slatta af fólki yfir Lunga en fengum húsið bara fram að Lunga helginni. En það var gaman að prófa þetta, þótt að það sé nú alltaf besta að vera á Múlaveginum ;)

Laugardagur 11. júlí
Byrjað að grisja aðeins í trjáræktinni kringum húsið sem veitti heldur betur af þótt að lítið hafi nú sést að eitthvað hafi verið gert. Sundferð með Monsa&strákunum og Sól.

Sunnudagur 12. júlí
Henti saman smá trjáhelliskofa fyrir krakkana. Þar var nú bara greinum hent kringum runna, en nóg til að gott rými var til að hafa sem hús. Kíktum í heimsókn til Monsa&Ástu og hittum þar Óla með Grím og Sigrúni. Ég skrapp á straumkajak á meðan Bjartur lék við Ara Björn.

Mánudagur 13. júlí
Hent í pizzur á Múlaveginum og svo ætlaði Bjartur að gista. Helgama hringdi rétt f. 12 og kom svo með B, ekkert vandamál, bara kominn yfirum og nóg annað að gera en að sinna honum. Þá var hann víst búinn að vera hlaupandi um á fullu...eitthvað sem hann er farinn að gera þegar hann finnur að hann er þreyttur og vill ekki fara að sofa ;)

Þriðjudagur 14. júlí
Sóttum tjaldvagn út í Norðursíld með hjálp frá Monsa.
Ég og Bjartur fórum í göngutúr með Monsa og co. upp fyrir bræðslu og kíktum á gamla stigann.
Sami hópur auk Sunnu fór í sund. Síðan var farið á Múlaveginn að borða og niðrí hús að sofa( sem tók nú smá tíma, aðallega hjá prinsinum sem var orðinn vel þreyttur, enda vakinn kl. 8 í morgun til að passa uppá að snúa sólahringnum ekki alveg við ).

Miðvikudagur 15. júlí
Skellti mér í sláttur á brekkunni við Múlaveginn. Ekki klukkutíma verk og tók samt bara vel á, endaði auðvitað ber að ofan við að heyja( enda er ég perri ;).
Ákveðið að nýta daginn og fara á steinasafn Petru á Stöðvarfirði.
Fengum okkur kaffi á tjaldstæðinu og gengum uppá leikvöll fyrir ofan.
Kíktum til Dags og co. en vorum ekki komin þangað fyrr en um 19:30 þannig að stoppið var stutt, enda var hringt í Helgu og heimilið ekki að höndla það að vera án hennar í nokkra klukkutíma( enginn fékk neitt að borða og Bragi að detta niður í sykrinum ).

Fimmtudagur 16. júlí
Fórum uppí EGS fyrir hádegi til að fara í búð. aldrei lent í jafn mikilli umferð á leiðinni yfir, enda var Norræna að koma og var lengja af bílum niður alla hlíðina EGS megin( við síðust ). Eftir búð fengum við okkur að borða í sjoppunni og heldum svo heim.
Skrapp á sjókajakinn, það var mun skemmtilegra heldur en straumkajakinn, á þessum var maður ekkert að fara að velta svo auðveldlega. Fór í neðra lóðið, yfir grynningar og svo aðeins út fyrir höfnina, en þ.s ég var einn á ferð og í fyrsta skiptið í kajak þá vildi ég nú ekki fara of langt né þreyta mig of mikið. Komst ekki upp grynningarnar þannig að ég dró bátinn bara nokkra metra uppfyrir þær. Tók smá hring kringum hólmann og svo aftur heim. Væri til í að skella mér í fyrramálið með myndavél ef að veður/nenna leyfir ;)
Góður hópur fór í sund þ.s. Bjartur var full mikill að flakka um kútalaus.
Tískusýning Lunga - Rakel - náði ekki að fara þ.s. hún var svo seint og það þurfti að koma stelpunum í svefn.
Strákarnir( Bjartur, Kristján og Leifur ) fóru að veiða með mér og Braga út á Bræðslubryggju. Bjartur náði 2 litlum( einum Marhnút eftir að hafa spurt hvernig hann liti út, ég sagði honum að þeir væru ljótir fiskar en hann var nokkuð ánægður með hvað þessi litli var lítill og sætur =) Bragi náði svo einum vænum og einn mávur lenti í lífshættu þegar hann flæktist og var húkkaður í en slapp eftir að hoppa fram af bryggjunni og ná einhvernvegin að losa sig í leiðinni.

Föstudagur 17. júlí
Skiluðum húsinu og ég fór ekkert aftur á kajak þ.s. ég svaf eitthvað illa um nóttina og nóg var að gera að taka til og þrífa um morguninn.
Kom blíða þannig að það var bara hangið heim á pallinum á Múlaveginum.
Þoka læddist yfir áður en byrjað var að grilla hamborgarafjallið ofan í allan herinn sem gistir á Múlaveginum, hátt í 20 manns.
Monsi & Böggi kíktu og drógu mig út um miðnætti...ráfuðum um, fórum á Láruna, Tjaldstæðið, Láran, pylsa( ekki alltaf sem það er pyslusala á Seyðisfirði ) og svo heim að sofa kl. 5...síðasti maður heim ;)

Laugardagur 18. júlí
Fórum á uppskeruhátið Lunga. Dagný var reyndar vökuð þannig að ég missti af seinni hlutanum, en lék bara við hana frammi á meðan.
Gengum um bæinn, en full kalt kom frá sjó.
Fórum í smá veiði út á bryggju, Sunna kom með, ég veiddi einn stóran sem hafði gleypt öngulinn og þurfti að aflífa. Sunna brjáluð yfir að fá ekki að veiða fisk( þ.e. að fá engann ). Hún var ekki að skilja af hverju ég fékk en ekki hún.
Læri um kvöldið og síðan gengum við Bína um bæinn fullan af fólki á Lunga hátíðinni.

Sunnudagur 19. júlí
Unga fólkið yfirgaf Múlaveginn og hélt heim á leið. Ég, Bjartur, Bragi, Monsi og Ari Björn fórum um fjörðinn í bátnum hjá Monsa.
Um kvöldið fórum við svo út að borða með Monsa&Ástu á Öldunni.


Mánudagur 20. júlí
Fór á Kajak með Sól sem langaði svo að fara á lónið og ég var hæstánægður að komast aftur á kajak sem var leigður hjá Hlyn að þessu sinni. Við f´roum í neðra lónið og rétt komumst aftur upp yfir grynningarnar. Bjartur kom svo niður að lóni og fékk að kíkja með líka.
Rakel eldaði Schmarn, allt of langt síðan ég hef fengið það =)
Gúllassúpa og svo spáð í bolla og kotra...nú var ég að verða búinn að gera allt sem þurfti að gera í ferðinni ;)

Þriðjudagur 21. júlí
Kíktum á Frænku og keyrðum svo heim. Nokkur stopp voru tekin og síðasta stoppið var svo í Kobba kút( sundlaug ) á Selfessi sem við höfðum lengi ætlað að prófa.

Miðvikudagur 22. júlí
Húsdýragarðurinn í blíðu.
Keypti nýja myndavél þar sem sú gamla gaf loksins upp öndina.
Sunna búin á því þegar við komum heim, fór uppí rúm að sofa, vaknaði aftur handónýt og sofnaði frammi.

Fimmtudagur 23. júlí
Bína varð fyrir krakkastóði um nóttina, ég fór með þau fram um 8 og síðan á runtinn. Landbankinn, Sæunn, Beko( ath. hvort hægt væri að gera við gömlu myndavélina, sem var ekki hægt ), Hraunhamar( forvitnast um fasteign ), heim.
Byrjað að taka til eftir ferðalagið. Var kalt framan af degi en sólin lét svo sjá sig og hlýnaði.
Sveitapitlsins draumur hjá B&B um kvöldið

Föstudagur 24. júlí
Skruppum í IKEA skemmtileg tilviljun að við rákumst á Dag & co. í mötuneytinu og ánægjulegt að ná að hitta á þau þ.s. þau voru í smástoppi og áttu ekki von á að ná að kíkja á okkur.
Um kvöldið komu Eyrún&Jobbi&co og Anna&Robbi í pizzu. Alltaf er maður að prófa sig áfram með pizzugerðina ;)

Laugardagur 25. júlí
Lagaði gereftið inná baði( búinn að ætla að gera það síðan síðasta sumar ).
Kjúklingalasagna hjá Bínu sem var alveg rosalega gott.

Sunnudagur 26. júlí
Fórum í sund um morguninn í "gömlu" laugina í Kópavogi og ég fór svo á æfingu með Sambandinu fram á nótt á Borgarnesi.

Mánudagur 27. júlíFór með krakkana á runtinn á meðan að Bína fékk að sofa langleiðina til hádegis eftir að hafa vaknað með þau. Fínasta veður þannig að það var hangið allan daginn í garðinum eins og við gerum svo oft =)

Þriðjudagur 28. júli
Dagný á ferðinni snemma í morgun að reyna að vekja alla.
Haldið áfram að taka til, búrið og bíllinn tekin fyrir í dag.
Grilluðum lambalærissneiðar um kvöldið.

Miðvikudagur 29. júlí
Sund með Monsa&strákunum, en þau eru hér í viku.
Fórum svo í IKEA að pulsa okkur og strákarnir fóru í boltaland.

Fim 30.júl
Húsdýragarðurinn með Monsa&co í rjómablíðu. Vorum mætt fyrir 11 og fórum ekki út úr garðinum fyrr en rétt fyrir 18.

Fös 31. júl
Enn blíða. Fór á smá runt, nennti ekki með bílinn í smurþjónustu þ.s. það var 30 mín. bið og fór heim í garðinn ;)
Hallur og Sæunn komu í pizzu um kvöldið.

Laug 1. ágúst
Blíðan heldur áfram.
Matur hjá B&B
Ég, Monsi og Bjözzi fórum út á smá skrall( heim 4 ;)

Sun 2. ágúst
Þunnur, aðallega að drepast í maganum, kenni bjórnum á Celtic í gær um.
Bjartur eitthvað illa fyrir kallaður í dag sem endaði á því að hann missti af sundferð og Bína&Dagný voru bara heim með honum á meðan ég og Sunna fórum í sund.
Hitti Bjözza um kvöldið. Sátum og glömruðum á gítar&bassa lengi og síðan var rokkaramyndin Pick of Destiny sett í tækið og horft fram á nótt.

Mán 3. ágúst
Já, það var blíða sem við nýttum í göngutúr um Norðurbæinn, nesti í garðinum.
Til að klára sumarfríið var ákveðið að fara á Hereford um kvöldið. Við förum alltaf amk 1 sinni( lágmark ) á ári og höfum verið mjög heppin með að verða okkur ítrekað út um 2fyrir1 þannig að þetta er alltaf vel sloppið kostnaðarlega séð. Þessi máltíð var sú besta sem við höfum fengið þarna( og þá er mikið sagt ), kjötið var fullkomið og allt var bara alveg frábært. Góður endir á góðu sumarfríi =)

Bílinn tilbúinn í ferðalagið

Eftir óteljanlegan fjölda af bílrúðuskermum ákvað ég að hætta að eyða smápeningum á hverju ári í þá og filma afturrúðurnar til að vernda krakkana aðeins gegn sólinni. Þvílíkur munur í staðin fyrir að reyna að festa eitthvað "drasl" á rúðurnar auk þess sem að þetta dregur jafnvel aðeins úr hitanum í bílnum, sem er mikill kostur þegar maður er ekki með loftkælingu.
Atli lánði mér svo tengdamömmubox og Þröstur boga þannig að nú er bíllinn tilbúinn í að fara jafnvel 2 austur í sumar.

Pizzupartý

Hátt í 20 pizzur bakaðar í kvöld. Tekur svoldinn tíma að afgreiða þetta með bara einum litlum pizzaofni...en merkilegt hvað ég hef gaman af pizzugerð ;)

Smíðakvöld

Bónermenn hittust: pizza, áfengi og póker...góður stofnfundur og vonandi verða fundirnir jafn ánægjulegir næstu árin ;)

Karrakot

Hoppandi kát með hafa fengið Karrakot í láni yfir helgina, takk enn og aftur Malla & Þröstur =)

Austurrískar frænkur á ferð um landið

Systur hennar mömmu( Cilli ömmu ) voru á ferð um landið um daginn og náði ég að hitta aðeins á þær þegar þær stoppuðu við í bústað hjá Gauta. Philip( barnabarn Martínu ) var með þeim sem ökuþór...hann var að leikstýra stuttmynd um daginn...þarf að finna hana og tengja inná hérna. Þótt að ég hafi nú ekki séð þau nema eina kvöldstund þá var það mjög gott því ég missti af þeim þegar þau komu aftur í bæinn. En ég þarf bara að fara að kíkja til þeirra í Hof bei Saltzburg hið fyrsta.

Helgi í tónlist

Shape átti 10 ára endurkomu þegar við spiluðum nokkur vel valin lög á minningartónleikunum Helgi í tónlist á Borgarfirði. Það var rosalega gaman að fá að taka þátt í þessum tónleikum og eiga allir sem að komu mikið hrós skilið sem og gestir og aðrir sem lögðu hönd á plóg. Afskaplega skemmtilegt að stíga aftur á svið með Shape félögunum og ekkert hefur gleymst á þessum 10 árum eins og ég hef áður sagt.
Nokkrar myndir má finna inná facebook.
Bjarur & Sunna komu með mér austur og voru í góður yfirlæti hjá Helgömmu á meðan ég var á Borgarfirði og eru nokkrar myndir frá ferðalaginu.

Pizzugerðarmaðurinn Logi

Um daginn fengum við brauðstein frá Nonna&Begs sem ég hef verið að nota sem pizzustein með því að hafa á meiri hita en ráðlagt var. Það endaði með því að hann mölbrotnaði og þá var ekkert að gera heldur en að versla pizzaofn. Þetta er kannski ekki alveg pizza fílingurinn, en einhvenrtíman mun ég hlaða minn eigin ofn...þegar ég verð kominn með garð til að hafa ofninn í ;) þá er ekki slæmt að hafa múrara í fjölskyldunni sem geta aðstoða við verkið ;)
Annars er alltaf verið að þróa pizzadegið og er byrjaður á sósunni líka. Reyndar var það nú bara afleiðing kreppunnar þ.s. vöruúrval hefur minnkað og ég fæ ekki lengur pizzusósuna sem mér finnst góð.
Í "ellinni" stofnar maður pizzastað...um leið og að ég finn einhvern sem að bruggar bjórinn til að bera fram með pizzunum ;)

Brúðkaup 2009

Í dag fækkaði syngurum þegar að Eyrún & Jobbi gengu í það heilaga...ég og Bína förum að verða með síðasta ógifta fólkinu í hópnum eftir að við seinkuðum giftingu ótímabundið þegar að Dagný kom undir.
Hér má sjá myndir úr brúðkaupinu og veislunni.

Bjartur 5 ára

Haldið var uppá 5 ára afmæli Bjarts í dag. Ástæða þess að það var haldið daginn fyrir afmælisdaginn var að Sunnu á bókaðan tíma í nefkirtlatöku í fyrramálið og gengur ekki alveg að halda afmæli sama dag. Afmælið tókst bara vel og var stóri strákurinn hæstánægður með allar fínu gjafirnar, veisluna og afmæliskökuna.
Á afmælisdaginn sjálfan fékk hann svo WallE frá okkur og um kvöldið var uppáhaldið hans Bjarts: heitt súkkulaðifondú og niðurskornir ávextir. Myndir frá afmælis- veislunni og deginum.
Merkilegt að maður á FIMM ára strák...enda er maður orðinn gamall ;)

Steggjun 2009

Jobbi var steggjaður í dag. 10 manna hópur sem gerði ýmsilegt af sér í tilefni dagsins og má sjá útdrátt af því hér( þ.s. Jútjúb leyfir ekki misnotkun á Elvislaginu í lokin er ekkert hljóð en glöggir ættu að geta fundið hlekk á skránna með hljóði hjá lýsingunni ;)

Á misjöfnu þrífast börnin best

Síðustu 5 daga hafa krakkarnir verið móðurlaus því hún skrapp til Torronto með vinnuskvísunum. Þau fengu nú Helgömmu í heimsókn á meðan til að leika við og knúsa og hjálpaði það mikið til við að takast á við móðurmissinn. Mér þótti einstaklega gott að hafa Helgu á heimilinu þannig að ég þurfti nú ekki að vera með augun á öllum þremur allan tímann...alltaf nóg að gera á þessu heimili ;)
En veðrið lék við okkur og ýmislegt var brallað, þ.á.m.: Gönguferð í Hellisgerði og á Víðistaðatún, Fjölskyldu- og Húsdýragarðinn, matur hjá Gauta & co., verslunarferð í Smáralind( sem varð nú meira ís- og leikferð fyrir krakkana sem fengu plastsverð til að slást með ), pizzuveisla, kaffi hjá Bekku & Bödda, grillað og leikið.
Allt gekk vel og snemma í morgun kom Bína svo heim og voru mikil hamingja hjá öllum að fá mömmuna sína heim. Helga & Bragi yfirgáfu svo svæðið í hálf grámyglulegu veðri. Það rættist nú úr því og endaði ég í sundi með stærri krakkana í sól og blíðu...og svo náði ég einum bjór í sólbaði á svölunum seinnipart dags ;)

Mörgum verðr bylt við boð

Seyðfirðingafélagið stóð fyrir Seyðfirðingahitting þ.s. tónlist og endurfundir réðu ríkjum. Fannst þetta afskaplega vel til fundið og ég er alltaf ánægður þegar að einhver gerir eitthvað sem mig hefur langað til að gera...en gef mér ekki tíma í ;) Þegar mætt var á staðinn var mér meinaður aðgangur fyrr en ég væri búinn að borga mig inn. Fannst mér það reyndar sjálfsagt mál og hið minnsta, en hinu verra að það hafði aldrei komið fram í neinni tilkynningu sem ég hafði fengið og fannst það svoldið skítt að því var ekki ælt út fyrr og mátti ég þakka fyrir að hafa veskið með í för þ.s. ég var bílandi ;) Gaman að hitta fólk sem maður rekst sjaldan á í þessu annars litla landi og vonandi verður þetta árlegur viðburður.

Betra er líkama enn sálar sjúkleik að hafa

Ónæmiskerfið virðist vera að batna þ.s. það virðist vera í harði baráttu við aðra hálsbólgu sem hefur ekki enn breyst í neitt alvarlegra, þótt hún sé nú reyndar ekkert að skána :|
Ólífulaufin hef ég samt verið að tyggja í næstum ár og trúi því að þau séu að hjálpa til. Í dag var svo bætt í vopnabúrið þegar ég verslaði mér Mími í Jurtaapótekinu. Afgreiðslukonan sagði nú að þetta væri að megninu til sólhattur, sem hefur reyndar ekkert gert fyrir mig hingað til, en ég ákvað að prófa þetta.
Vopnabúrið samanstendur nú af hákarlalýsi, sólhatti, mími og stöku fjölvítamínstöflu. Járntöflur eru einnig til vara, en þ.s. það er slatta járn í fjölvítamíninu tel ég mig ekki þurfa þess nema að járnskortur verður áberandi, þá eru þær dregnar fram.

Augun ei leina, ef ástin er heit

Bína mín orðin þRíTuG og alltaf jafn sæt =)

Sjaldan stendr góðr liðsmaðr lengi hjá

Fékk hringingu frá góðum manni sem bað mig að grípa í bassa yfir helgina í Vestmannaeyjum. Hann vissi vel ég væri nú upptekinn í fjölskylduleik en það var víst orðið fátt um góða drætti og leitaði því til mín. Þegar ég hafði komist að raun um að ég væri laus lét ég til leiðast og fór því annað sinn til eyja og einnig í annað sinn til að spila þar. Betra var nú í sjóinn heldur en síðast en heldur fámennt var hjá okkur bæði kvöldin vegna annarra stórra viðburða. Blíða var alla helgina og mun skemmtilega að vera uppá dekki í Herjólfi í sól og "blíðu" heldur en að hanga inní skipinu þar sem maður gat annað hvort ælt á einhvern eða látið æla á sig. Þrátt fyrir að dansgólfið hafi ekki verið fullt bæði kvöldin var þetta fínasta helgi með góðu fólki.
Það besta við svona ferðir er að koma aftur heim og knúsa fjölskylduna eftir langa fjarveru ;)

Kjörvilltr er sá, sem kýs hið lakara

Á morgun eru víst alþingiskosningar og ekki seinna vænna að gera upp hug sinn. Því miður eru auð atkvæði ekki talin með svo þeir sem skila auðu geta alveg eins setið heima. Ég væri mest til í að auðir seðlar myndu telja í auð þingsæti, þá myndi ég skilað auðu, stuðlað að fækkun alþingismanna( sem mætti nú alveg fækka niður í bara ráðherra eins og ég skrifaði í byrjun árs ). Enn verra finnst mér þó að þurfa að kjósa málefnin og fólkið saman þ.s. ég er ekkert endilega "hrifinn" af frambjóðendum í mínu kjördæmi en hef ákveðna skoðun á hvaða forsætisráðherra ég vil hafa eða reyndar hvern ég vil ekki sjá þar. Þannig að þótt ég vilji ekki endilega kjósa einhvern einstakling verð ég að gera það ef ég hef ákveðið hvaða flokk ég ætla að kjósa.

Í þessu meingallaða kerfi er ég er víst "neyddur" til að kjósa einhvern af flokkunum og ætli það sé ekki best að hripa niður hvað mér finnst um hvern og einn:

Borgarahreyfingin
Kemur sterk inn fyrir þá sem vilja nýta atkvæði sitt en geta ekki með nokkru móti kosið "gömlu" flokkana. Alltaf erfitt að vita hvernig nýjum flokkum vegnar, en þeir hafa nú metnaðarfullar hugmyndir um breytingar.

Framsókn
Ætla bara ekki að leggjast af, enda eru þeir með öfluga markaðsdeild og ná alltaf að plata nógu marga til að halda velli. Þótt þeir skipti um forystu og lofi öllu fögru þá mun ég seint gefa þeim tækifæri.

Frjálslyndir
Aðframkominn flokkur sem hefur ekkert skjól til að leita í á þessum tímum.

Lýðræðishreyfingin
Kannski sprottin af góðum grunni en forystusauðurinn fer út um þúfur, þá ætti hann nú kannski réttilega heima á alþingi með hinum hirðfíflunum ;)

Samfylkingin
Tími Jóhönnu loksins kominn en verst að það er ekki góður tími.

Sjálfstæðisflokkurinn
Eftir að hafa "næstum" rænt þjóðina sjálfstæðinu má nú deila um nafn hans( t.d. mætti kalla hann ósjálfstæðisflokkinn eða sjálfæðisflokkinn ). Sýnist þeir vita uppá sig skömmina og reyna að komast hjá því að vera í stjórn svo þeir geti kennt vinstristjórninni um þá erfiðu tíma sem verða næstu árin.

Vinstri Grænir
Eins vinstrisinnaður og ég er þá eru VG svo miklir afturhaldskommatittir stundum að það er hálf sorglegt.

Ath. að mínar skoðar byggjast aðallega á fordómum( sú skoðun eða tilfinning sem ég hef á tilteknu máli hverju sinni, rökfærð á hvaða hátt sem mér sýnist ).

Fann líka gamla færslu sem ég skrifaði um stjórnmálaflokkana fyrir hart nær 6 árum og er ég nokkuð sammála því sem þar kemur fram enn. Vonandi kemur eitthvað gott út úr þessu öllu saman...

Af góðum huga koma góð verk

Vaknaði síðastur á heimilinu og sá hvar kaffibolli beið mín við hliðina á koddanum. Sunna hafði augljóslega ákveðið að gefa mér kaffi svona í morgunsárið...hún er alltaf jafn sæt hún Sunna sæta sól ;)

Betr er farið, enn heima setið

Þegar ég kom úr vinnu kl. 14 sagði Bína mér að Nonni&Begs væri farin norðu á Gautlönd og spurði hvort við ættum að kíkja til þeirra yfir páskana. Ég fór með þetta aðeins lengra og lagði til að fara sem fyrst og halda áfram á Seyðis og koma Helgömmu að óvart. Einnig höfðum við haft veður af því að Guggi&Harpa væru á leið austur og ekki ver að ná að sjá framan í þau, enda komin "nokkur" ár síðan við hittum þau síðast.

Þegar komið var grænt ljós á að við værum velkomin á Gautlöndum vorum við lögð af stað klukkutíma eftir að hugmyndin var lög fram. Held að við höfum aldrei verið jafn fljót að pakka og komast af stað. Mikill kostur að geta bara pikkað eldri krakkana upp á leikskólanum, skellt þeim beint í bílinn og brunað af stað út úr bænum.

Mjög gott ferðalag sem má lesa meira um á bloggsíðu krakkanna og einnig eru komnar myndir úr ferðinni ;)

Sætr er sjaldfenginn matr

Tókum matarboði frá Möllu&Þresti sem leiddi okkur alla leið uppí Karrakot. Maturinn var ekki af verri endanum og ekki á hverjum degi sem dýrindis nautalund fær að kítla bragðlaukana. Yndisleg helgi og merkilegt hvað maður var endurnærður eftir bara einn dag í sveitinni, þúsund þakkir fyrir okkur.

P.s. Myndir væntanlegar um mánaðarmótin( þ.s. ég set bara inn myndir hvers mánaðar þegar hann er liðinn ;)

Ákvað að drífa í því að skella inn myndum frá Karrakoti

Hvað lengi er forhugsað, má fljótliga framkvæma

Fyrir 10 árum steig ég síðast á stokk með Shape og nú eru blikur á lofti að við munum koma fram í sumar. Það hefur oft komið til tals að telja aftur í en ekki orðið af því fyrr en nú. Það var engu líkara en að við hefðum verið að spila í síðustu viku, alveg stórmerkilegt hvað við vorum samstilltir...sérstaklega miðað við 10 ára "pásu" ;)

Væntanlega sjáumst við á sviði á Vegareiði 2009( Road Rage 2009 ) í Sláturhúsinu á Egilsstöðum 13. júní ;)

Biðjandi maðr fær börn

Lagðist í bað um daginn, en það voru nú engin rólegheit. Krakkaormarnir þrír voru skríðandi, skvettandi og frussandi um allt baðið og í orðsins fyllstu merkingu að "ormast". Horfði yfir liðið og fannst nokkuð merkilegt hvað þessi hópur var fljótur að stækka og spurning hvort þetta sé ekki komið gott?

Þegar krakkarnir voru bara tvö minnist ég þess að hafa oft að leita að þeim þriðja. Ég hef ekki fundið fyrir því að einhvern vanti eftir að Dagný kom sem ætti að segja mér að þetta sé komið gott.

Auk þess erum við búin með öll vinnuheitin en stuttu eftir að við byrjuðum að búa dreymdi Bínu að við áttum 3 börn sem hétu: Rasshár, Skeggrót og Viðbót. Hafa þessi nöfn verið "vinnuheitin" á krökkunum í óléttunum og þar sem þau eru uppurin myndi það bara flækja málin að bæta í hópinn ;)

Sú eign er bezt, að eiga sem nægir

Fyrir 3 árum eignaðist ég cube og var hinn ánægðasti en nú er hann horfinn af heimilinu. Ég ákvað að það væri tími til kominn að taka til á heimilinu og hætta að safna "dóti". Leyfa einhverjum öðrum að njóta hans enda var hann bara að safna ryki á bakvið sófa og notaður í lítið annað en að keyma gögn. Nýr eigandi sótti vélina og leið mér afskaplega vel að vita að hún fór til mikils makkamanns og safnara sem mun ábyggilega gera henni góð skil um ókomin ár.

Ágætt að byrja að taka til áður en þetta endar svona ;)

Bara eitt bleyjubarn á heimilinu

Sunna er hætt með bleyju og þá er Dagný eina bleyjubarnið á heimilinu. Get ekki beðið eftir losna við bleyjurnar...og þá sérstaklega kúkableyjurnar sem eru alveg "sætar" fyrstu vikurnar en hjá 2ja ára er þetta orðið full mannalegt ;)

B&L 7 ára

Í tilefni dagsins fengum við Valgeir&Þyrí til að passa gríslingana og fórum út að borða. Af gömulum( og góðum ) vana fórum við á Hereford, en við erum búin að vera sérstaklega dugleg að fara þangað undanfarið ;)


_{B&L orðin 7 ára}

Geiri frændi

Fyrir nokkru héldum við feðgar í smá bílferð með flöskur í Sorpu. Þegar við vorum að skila flöskunum rak ég augun í Almanak Sorpu 2009 sem ég greip með til að skoða síðar. Þegar heim var komið fletti ég í gegnum bæklinginn og rakst þá á mynd af nokkrum af dósaklippingunum hans Geira frænda. Ég hafði gaman að sjá þessi undraverk hans aftur þ.s. ég hafði ekki séð þau lengi og heldur ekki hugsað um kallinn í nokkur ár.
Rifjaðist þá upp fyrir mér að ég hafði eitt sinn reynt að læra þessa listsköpum af honum. Lagði leið mína í kot kalls og gerði nokkrar heiðarlegar tilraunir sem urðu bara að sundurklipptum áldósum. Á meðan lá Geiri hinn makindalegasti í bóli sínu og hafði lítið fyrir að beygja álið fram og aftur og hafði fullkomna sýn á því hver niðurstaðan yrði á endanum. Ekki hef ég skilning á því hvernig hann fór að búa til húsgögn, kórónur og myndaramma úr áldósunum og kannski er þessi náðargáfa nú týnd af hnettinum eftir brotthvarf hans.

En skemmtileg minning og áhugaverður kall og húsið hans var síðast þegar ég vissi safn, en ég finn nú engar upplýsingar um það á Seyðisfjarðarvefnum :(

Ætli svona sérstakir persónuleikar séu að deyja út eða koma nýir í þeirra stað með tíð og tíma?

Sætr matr gjörir stóran munn

Í tilefni dagsins okkar( sem er 9. hvers mánaðar ) eldaði ég hvílaukslegnar svínalundir sem eru oft á boðstólum á þessum bæ. Að vanda var gerð Kárasósa( hvítlauks & steinseljuostur með rjóma ) og auk hrísgrjóna var bryddað upp í fysta skiptið gráðostafylltum bökunarkartöflum sem fullkomna þessa annars dýrindis máltíð. Þannig að eftir matinn var maginn fullur og eitt stórt ánægjubros fyllti út andlitið á meðan við skelltum öllum börnunum í bað og smöluðum þeim í háttinn =)
Þetta var einn af þessum dögum sem maður undrast að hér skuli vera 5 manna fjölskylda í 3ja herbergja íbúð. En það sleppur á meðan Dagný er enn lítil. Það var nú á dagskrá hjá okkur að stækka við okkur á þessu ári en ástandið hefur fryst allan fasteignamarkað. Skulum vona að það fari batnandi á næstu mánuðum, vonandi þurfum við ekki að bíða mörg ár þangað til að ástandið skánar. En hvernig sem það fer þá hljótum við nú fyrr eða síðar að yfirgefa þetta hreiður og finna okkur annað stærra =)

Alheims-staðsetningar kerfi

Þegar ég varð þrítugur langaði Bínu að gefa mér eitthvað sem væri ekki á óskalistanum mínum sem endaði með því að hún ákvað að gefa mér GPS. Hún var meira að segja svo sniðug að láta mig um það að velja tækið, sem var hárrétt hjá henni þ.s. hún vissi að ég hefði ákveðna skoðun á því hvað ég vildi og þyrfti að skoða hvað væri í boði =)
Þannig að ég lagðist yfir úrvalið og fann eitthvað sem var nógu spennandi að ég sá fram á að geta notað að einhverju ráði.
Tækið er búið bluetooth fyrir síma sem kemur sér afskaplega vel þ.s. ég var búinn að týna hluta af handfjálsa búnaðinum mínum. Ekki er heldur verra að í græjunni er FM sendir þannig að hægt er að vera með tónlist inná henni og spila í gegnum útvarpið í bílnum. Mikill kostur að geta geymt alla barnadiskana í tækinu og stillt á þegar lengri ferðir eru teknar með krökkunum. Einnig bjó ég svo vel að geta fengið Íslandskortið hjá Gauta bróðir þ.s. hann fékk það í afmælisgjöf um daginn og var bara með annað leyfið í notkun.
Nú sest ég uppí bílinn, slæ inn hvert förinni er heitið og keyrir án þess að hafa minnstu áhyggjur af því að villast...og ef það gerist þá endurreiknar tækið nýja leið og ég held förinni áfram =)

Tímaleysi...

...er vandamál sem hrjáir mig stundum...eða kannski er vandamálið að mig langar/ætla að gera svo margt?
Fyrir 2 árum skrásetti ég líka færslu um týmaleysi sem á nánast alveg við í dag. Þyrfti bara að bæta við Dagnýju og breyta nokkrum staðreyndum...annars allt við það sama =)

Kaffi

Vinnufélagarnir eru alveg að missa geðheilsuna þessa dagana og ekki er það "ástandinu" í þjóðfélaginu að kenna. Nei, þetta er mun alvarlegra og er ekki langt í það að blóðsúthellingar byrji ef ekki verður bót á máli hið fyrsta. Allt hófst þetta fyrir um viku síðan þegar kaffivélin bilaði. Maður hefði haldið að það væri nú ekki alvarlegt en það er einmitt stóra málið að kaffilaust er hér á 2. hæðinni. Áhyggjur af kreppu og stjórnmálum hafa alveg fallið í skuggann af "kaffiástandinu" síðustu daga á meðan kaffiþyrstir hálsar hæðarinnar hafa leitað uppá 3. hæð til að svala kaffiþörfinni en hefur sú breyting bara farið verr í mannskapinn heldur en kaffileysið. Ekki veit ég hvort það er hreyfingunni að kenna við að fara upp og niður stigann 20 sinnum á dag eða hvort að þeim finnst eitthvað leiðinlegt þarna uppi. Kannski eru efsta hæðin alltaf að gera grín að þeim fyrir að þurfa að klöngrast þarna upp og að þar sé ekkert kaffi að fá. Ég verð að viðurkenna að ég hætti mér ekki að spyrja út í neitt sem viðkemur þessu málefni og reyni að leiða hjá mér fjölda harðorða tölvupósta sem ganga milli manna og æsa upp lýðinn með hverri mínútunni sem líður. Eftir fremsta megni reyni ég að forðast að sogast inní umræðuna af hættu við að hljóta áverka frá bandbrjáluðum kaffisólgnum vinnufélaga sem kæmist að þeim hryllilega sannleika að ég drykki ekki kaffi og mér væri alveg sama um "kaffiástandið" sem er að ganga frá öllum dauðum.
Ég er líka farinn að jafa áhyggjur af því að einhver góður vinnufélaginn segi starfi sínu lausu á næstunni og fari í sjálfboðavinnu sem kaffidama um hæðina að bjóða öllum kaffi daginn út og inn...

Nýtt Ísland

Ef ég væri fengi að ráða hvernig "nýtt Ísland" væri byggt upp væri aðal málið:

Kosningar, stjórnmálaflokkar og alþingi
Kosið væri um einstaklinga í ráðherrastóla ríkisstjórnar samhliða kostningu um stefnu ríkisstjórnar.
Ráðherrar vinna samkvæmt kosinni stefnu og bera fulla ábyrgð á þeim málaflokki sem þeirra ráðherrastóll ræður yfir.
Stefna væri áherslur í tilteknum málefnum lagðar fram af hverjum sem er, þ.m.t. stjórnmálaflokkum. Heildarstefna er mun auðveldari í kostningu heldur en að kjósa um mörg málefni hvert fyrir sig.
Alþingi væri lagt af. Engin ástæða til að halda uppi Alþingi ríkisstjórnin ræður för og gagnrýni yrði að koma annars staðar frá en úr ræðupúlti Alþingis...heilmikill launasparnaður þarna ;)
Í framhaldi væru fjárframlög auðvitað mjög takmörkuð til stjórnmálaflokka og frambjóðenda. Það myndi auðvelda nýjum hagsmunasamtökum og einstaklingum að bjóða fram.

Síðan detta mér nú einhverjir hlutir strax í hug sem betur mættu vera á okkar litla landi:

Nýjan þjóðsöng
Ég vil geta tekið undir með þjóðsöngum...og ég vil að allir hinir geti það líka.

Ríkisútvarpið
Leggja niður afnotagjöld, innlent sjónvarpsefni, lítið um afþreyingu, endursýnt efni, fréttir...

Menntun
Menntakerfið þarfnast mikillar endurskipulagningar.
Grunnskólar verða aftur settir undir ríkið.

Laun ríkisstarfsmanna
Allir ríkisstarfsmenn hafa laun í hlutfalli við ráðherrakaup. Þannig geta ráðherrar ekki hækkað laun sín nema að hækka laun allra ríkisstarfsmanna.

Trú aðskilin ríkisrekstri
Trú( kirkja og trúfélög ) verða með öllu aðskilin ríkisrekstri. Það eina sem mun lifa er að innheimta f. trúfélög verður með sama fyrirkomulagi og er í dag sem ríkið innheimtir með sköttum. Þyrfti bara að ákveða hvernig farið yrði með eigur sem kirkjur í dag hafa afnot af.

Kvótakerfið
Kvótakerfið verður afnumið. Fiskurinn umhverfis landið er eign lands og þjóðar!

Íslensk tunga
Hvers konar færðibækur um íslensku væru settur á netið án endurgjalds fyrir notkun. Ef á annað borð á að halda í þetta eyjamál er eins gott að gefa öllum kost á því að fara rétt með það og láta málið þróast á sterkum grunni.

Skattur
Flatur ákveðinn %skattur á ALLT. Auðveldar alla útreikninga þ.s. aðeins er til einn skattaprósenta.
Efðaskattur verður felldur niður, enda hlýtur hann að fallast undir tvísköttun.

Ríkisrekin fyrirtæki
Ríkið getur, ef þurfa þykir, rekið fyrirtæki sem byggja á að halda uppi grunnþjónustu við landsmenn. S.s. ríkisbanki, ríkisverlsun.
ÁTVR verður lagt niður, áfengi verður selt í matvörubúðum. Eins gaman og mér finnst að hafa verslun sem selur bara áfengi þá er einokun bara glæpastafsemi yfirvaldsins.

Eftirlaunafrumvarið og biðlaun
Leggja af eftirlaunafrumvarpið...stjórnmálamenn eru ekki merkilegri pappír en almenningur og þeir geta sætt sig við almennan lífeyrir eins og hver annar. Biðlaun og launagreiðslur í marga mánuði eftir uppsögn framkvæmdastjóra og annara sem þykjast bera ábyrgð verða felldar niður...þeir báru ábyrgð og stóðu ekki undir henni. Engin ástæða til að borga mönnum sem vikið er úr starfi til að hægt sé að endurreisa traust eða trú.

Opinn hugbúnaður
Ríkisfyrirtæki noti einvörðungu opinn hugbúnað og sérlausnir sem búnar eru til skulu verða opnar lausnir.

Loka sendiráðum
Samskipti við aðrar þjóðir skulu byggja á heimsóknum þeirra hingað ;)

Magrir virðast hafa hug á að koma fram breytingum á þessu litla skeri og hef ég rekist á Lýðveldisbyltinguna og Nýtt lýðveldi. Ég vona svo innilega að breytingar nái í gegn, þótt þær verði jafnvel ekki jafn miklar og margir vonast eftir.

Ellin færist yfir

Þegar ég varð tvítugur sagði ég að nú væri hápunkti tilverunnar náð og leiðin lægi bara niðurávið. Það ferðalag er samt afskaplega skemmilegt og tíu árum síðar er ég kominn á fertugsaldurinn og búinn að segja að ég sé "gamall" í tíu ár.
Tvítugur maður er kannski ekki svo "gamall" en gleymum ekki að hann er kominn á þrítugsaldurinn og það hljómar mun verr. Á þeim tíma ákvað ég að sætta mig við, eða undirbúa mig, að líkamlegt ástand myndi aldrei verða jafn gott. Þótt ég gæti haldið mér í góðu formi væri ómögulegt að halda í líkamlegt ástand 20 ára karlmanns við hestaheilsu( enda hestar ávallt hraustir? ). Ég ákvað því líka að byrja "snemma" að segja að ég væri "gamall" til að forðast áfallið við að vera "gamall" einn daginn. Fyrst ég var búinn að flokka mig sem gamlingja þá ætti ég ekki að lenda í því að tapa æskunni einhvern stórafmælis morguninn þegar tugirnir væri orðnir yfirþyrmandi margir ;)

Fertugsaldurinn gekk í garð undir lok síðasta árs og þar í för fylgdu hin almennu einkenni: slappt bak, lúin hné, rám rödd, ónýt pissublaðra, svefnleysi með lyfjatöku og minnisleysi hvaða pillur var búið að taka þann daginn...nei, mest lítill munur frá fyrri árum. Nú hefur mér reyndar áskotnast fullt af dóti til að hjálpa mér við að eldast. Þykir mér þeirra vænst um hrærivél svo ég þarf nú ekki að hnoða pizzudeigið með höndunum og borvél svo ég noti nú örugglega ekki handafl við að skrúfa lengur. Já, það er gott að eiga tæki sem passa uppá að maður reyni ekki of mikið á sig en hvíli sig frekar og leyfi ellinni að ná völdum ;) Ég ætla nú ekki að flokka börnin undir "hluti sem hjálpa mér að eldast", ef eitthvað þá halda þau manni ungum ;)

En annars er alltaf nóg að gera og eins og ég hef víst áður sagt það er nógur tími til að vera gamall þegar ég orðinn gamall" og komin eru drög að hvernig ellismellurinn Logi verður ;)

Fjölskyldurúm

Sá umfjöllun um daginn að hjónarúm ættu með réttu að vera kölluð fjölskyldurúm og var að hugsa þetta aðeins:
Fyrir nokkrum árum endurnýjuðum við rúmið okkar. Fyrsta rúmið sem við versluðum var skilað fljótlega og uppfært í Tempur. Það leit vel út til að byrja með en var líka skilað vegna annmarka og þá aðallega að ég fór bara versnandi í bakinu í því með hverri nóttu þrátt fyrir að hafa kunnað mjög vel við mig í því fyrstu dagana. Við enduðum svo á "klassísku" 160cm gormarúmi sem ég held að útleggist Queen size uppá góða íslensku. Til að miðla af reynslu minni mæli ég með gormarúmi og ætla bara að tíunda eina ástæðu hér: Krakkarnir hafa afskaplega gaman að hoppa í því og annan hvern dag er öllum sængum og koddum hent frammúr og þau hoppa sig snarvitlaus þar til þau gefast upp eða einhver meiðir sig...lítið er þó um að taka til eftir sig ;)
Nánast á hverri nóttu kemur einhver uppí til okkar og þykir mér það afskaplega notalegt. Sunna gengur í svefni upp að rúminu og bíður eftir að Bína taki hana uppí...það veit enginn hversu lengi hún nennir að bíða en þó hefur komið fyrir að hún hefur fundist sofandi á gólfinu þannig að hún virðist ekki bíða endalaust eftir upplyftingu. Bjartur er þaulvanur að koma sér fyrir í rúminu án þess að ég verði þess var...en reyndar hafa þú nú alltaf sótt meira í Bínu þegar þau skríða uppí og minnist ég að hafa sé krakkahrúgu ofan á henni einhvern morguninn án þess að ég hefði orðið var við nokkuð brölt um nóttina.
Það kemur fyrir að Bjartur fær að sofna í rúminu okkar og fer ég þá yfirleitt með hann í sitt rúm þegar ég gegn til náða. Um daginn var hann einmitt sofandi á koddanum mínum og ég var eitthvað tvístígandi hvort ég ætti að færa hann. Endaði á því að ég gerði það en vaknaði svo um nóttinu og sá hann við hliðina á mér með duddu. "Hvað er hann að gera með duddu" hugsaði ég og byrjaði að draga dudduna út úr honum. Þegar duddan var komin úr kjaftinum byrjaði krakkinn að væla yfir því og horfði ég lengi á hann þangað til loksins rann upp fyrir mér að þetta var Sunna. Hún var, skiljanlega, hundfúl við duddumissinn en sofnaði um leið og duddann var kominn á sinn stað ;)
Annan morgun fyrir stuttu er ég reis upp reyndi ég að vekja Bjart, Sunnu og Bínu sem öll lágu eins og hráviði í rúminu en enginn var að nenna á fætur. Ég horfði yfir hópinn og hugsaði með mér að vonandi verður Bjartur enn kúrandi hjá okkur þegar Dagný byrjar að koma uppí til okkar...en kannski við verðum að vera komin með aðeins stærra rúm til að rúma allan hópinn, ætli næsta skref sé ekki King size ;)
Þannig að fjölskyldurúmið er rétt að nefna rúmið í dag en kannski við Bína eigum eftir að vera í hjónarúmi þegar fram sækir...ég vona a.m.k. að krakkarnir verði ekki unglingahópur sem skríður enn upp á milli mömmu og pabba ;)

Gleðilegt nýtt ár...

...og takk fyrir það sem er að liðna ;)

Þrítugur

Notalegt að vera vakinn af fjölskyldunni sem kom færandi hendi með gjafir handa gamla manninum sem kominn er á fertugsaldurinn( merkilegt hvað það hljómar verra en að vera orðinn þrítugur ). Bjartur listamaður teiknaði mynd handa pabba sínum alveg eins og E.T. að hnykkla vöðvana. Sunna krútt hafði hjálpað til og Bína búin að setja í ramma svo myndin er tilbúin til að fara uppá vegg. Dagný brosti sýnu breiðasta í tilefni dagsins og morgunmaturinn tilbúinn þegar ég kom fram. Yndisleg börn, yndisleg unnusta, yndislegt líf ;)

Næturjólaverslunarferð

Ég fór í kvöld í afmælisveislu til Magna niðri miðbæ Reykjavíkur. Alltaf gaman að hitta hann og aðra gamla menntskælinga sem ég hef ekki séð í óratíma og var þetta vel heppnuð samkoma þótt ég hafði mætt full seint til leiks...en það þarf nú að sinna fjölskyldunni fyrst ;)
Ég var bílandi þannig að ég fór þegar vel var gengið yfir miðnætti en var búinn að ákveða að kíkja í Hagkaup á leiðinni heim, svona fyrst þeir hafa opið allan sólahringinn. Þetta var afskaplega afslappandi verslunarferð og er víst líka að skila sér í sölu hjá þeim. Það var eitthvað af fólki að renna í gegn, mestmegnis yngra fólk en afskaplega róleg inní búðinni. Reyndar þegar ég gekk framhjá nammiganginum var eins og ég væri kominn inní eina partýið í bænum. Þar var allt krökkt af fólki að fylla á nammipoka af slikki. Veit ekki hvaða þörf grípur fólk til að skella sér í búð um miðja nótt að versla nammi? En ég ráfaði í rólegheitunum um og fann ýmislegt sem ég hafði ætlað mér að finna og fleira sem fékk að fara með heim. Mikil búbót fyrir andlega geðheilsu að versla á svona tíma...alveg sama þótt það kosti kannski meira =)
Merkileg hvað það er góð tilfinning að koma heim þ.s. Bína og 3 krakkar sofa sínu værasta...ætla að skella mér uppí og ná nokkrum tímum þangað til að þau ráðast öll uppí, en það er alveg merkilegt hvað þau vakna alltaf snemma um helgar ;)

Dagurinn þinn

Um daginn(september) tókum við upp dag hvers og eins sem virkar þannig að Bjartur á 5. hvers mánaðar og Sunna á 21. þ.s. við gerum eitthvað sérstaklega að þeirra ósk eða fyrir þau. Þann 5. sept. vorum við reyndar fyrir austan en hann fékk að ráða hádegismat og kvöldmat hjá Helgömmu og var hæstánægður með að fá allt sem hann vildi ;) Á Sunnudaginn( sunnudagurinn 21. sept. ) var dagurinn hennar Sunnu og fórum við öll að sjá Einar Áskel í Þjóðleikhúsinu. Sunna sat hin stilltasta og minnti mikið á bróður sinn sem gat verið yfirmáta settlegur í fjölmenni þegar hann var yngri. Bjartur hafi mjög gaman að og var þetta mjög fróðlegt fyrir svona mikla spekinga eins og hann ;)
Við Bína eigum saman 9. hvers mánaðar sem er mjög gott því þá getum við nýtt amk einn dag í mánuði til að reyna að gera eitthvað bara tvö. Í sept. fórum við á Hereford og klikkar það nú sjaldan. Ég át á mig gat( jafnvel tvö ) sem endaði með því að Bína þurfti að keyra heim þ.s. öll mín líkamsstarfssemi fór í meltinguna. Tengdó passaði fyrir okkur eins og svo oft og er afskaplega gott að eiga góða að og ekki skemmir fyrir að krökkunum finnst fátt skemmtilegra en að losna við okkur út úr húsi og fá afa&ömmu í staðin ;)
Í október vorum við merkilega upptekin af því að undirbúa og taka á móti Dagnýju litlu ;) og í nóvember voru skírn og bústaðarferð til þess að gera lítið úr þessum dögum en gengur vonandi betur í desember og kannski Dagný fái líka sérstaka meðferð 11. hvers mánaðar ;)

"Kreppa"

Það er víst ástand á Íslandi, og í þetta skiptið getum við víst ekki kennt neinum um nema sjálfum okkur. Þótt almúginn hafi nú reyndar engu ráðið þá kaus samt einhver þetta fólk og enginn tekur ábyrgð hér fyrir neinu né neinu frekar en vanalega. Ástandið köllum við kreppu og þótt hún sé byrjuð ímynda ég mér að hún eigi fyrst eftir að láta finna fyrir sér eftir áramót. Vonandi fer land og þjóð ekki of illa út úr þessu og vona ég að samlandar og fleiri sjái til þess...ég er enn of upptekinn í barnauppeldi til þess að taka þátt í þess ;)
Kreppa þarf þó reyndar ekki að vera slæm. Reyndar held ég að eini tíminn sem að góðar hugmyndir séu framkvæmdar sé í kreppu. Þá þarf virkilega að láta hendur standa fram úr ermum og gengur ekkert fyllerí eins og við höfum lifað við síðustu ár.
Ég er blessunarlega laus við að vera með lán í erlendri mynt en verðbólgan mun leika mig grátt á næstunni þ.s. ég er víst langt frá því að vera skuldlaus og verð líklega aldrei. Ég er einnig nokkuð nægjusamur þannig að ég tek þessu með statískri ró og reyni að sjá jákvæðu hliðarnar( að mínu mati ):
Loksins fækkaði @ndsk. fríblöðunum sem ég bað aldrei um að fá í póstkassann hjá mér.
Færri bílar, minni umferð og gott ef það er ekki bara minna af bílum að berjast um bílastæðin við blokkina okkar.
Nægjusemin loksins ríkjandi í stað fyllerísins sem ráðið hefur ríkjum( eða riðið hefur rækjum... ég man aldrei þetta orðatiltæki ;)

Ábyggilega fullt af atriðum sem ég man síðar, þá mun ég skella þeim inn sem athugasemd og þú mátt líka segja mér frá jákvæðri upplifun þinni af "kreppuni" í athugasemdunum ;)

Hálsbólga

Fékk hálsbólgu í fyrsta skiptið á ævinni...án þess að verða fárveikur. Síðastliðin ár hef ég fengið hálsbólgu amk 4 sinnum á ári en þá fylgir henni beinverkir, kvef, og hiti sem hefur endað með mig uppí sófa/rúmi í 3-4 daga. Ég fór um daginn til galdrakellingar( hómópati ) sem benti mér á ólífulauf sem ég hef verið að taka daglega í nokkra mánuði til að byggja upp ónæmiskerfið og ég er ekki frá því að þetta sé heldur betur að skila sér. Þannig að ég upplifið í fyrsta skiptið að vera með hálsbólgu án þess að vera bólginn í hálsinum. Kannski var þetta bara eitthvað annað en ég hef amk ekki verið veikur lengi og ætla aldrei aftur að verða veikur, ég er búinn að fá nóg fyrir lífstíð ;)

Sumarbústaðarferð

Áttum rosalega góða helgi í Karrakoti( þúsund þakkir fyrir lánið Malla & Þröstur ). Alltaf jafn yndilslegt að komast út úr bænum í bústað. Maður gerir allt of lítið af því og vonandi bætir maður það upp með fleiri ferðum á næstunni ;)

Dagný

Merkilegt hvað nýjasti meðlimurinn er rólegur og vær. Var undirbúinn hverju sem er þegar ég yrði pabbi í þriðja sinn en er bara búinn að svífa á bleiku skýi síðan hún kom og held að nú muni ég ekki aftur finna fyrir tilfinningunni að það vanti einn í krakkahópinn ;)
Dagný og pabbi á skírnardaginn.

Alvöru hvítlaukspressa

Mig hefur lengið langað í "alvöru" hvítlaukspressu þ.s.ég eyðilegg alltaf þessar ódýru eða þær eru bara ekki nógu góðar. Helstu kostir "alvöru" hvítlaukpressu eru:
...auðvelld í þrifum
...þolir mikið átak
...nýtir laukinn vel
Vitir menn, fékk ég ekki svoleiðis í þrítugsgjöf frá móður minni fyrir helgi. Ég þurfi að vígja hana strax og var hent í pizzu og hvítlauksbrauð. Ég er ekki frá því að það hafi heyrst ánægjuandvarp þegar ég beytti nýju alvöru hvítlaukspressunni í fyrsta skiptið svo fullkomin er hún =)

Velkomin í heiminn Dagný

Fleiri myndir

Brúðkaupsdagurinn mikli 20.09.2008

Hlín & Jói innilegar hamingjuóskir með brúðkaupið á laugardaginn og takk fyrir okkur. Óla & Rannveigu sendum við einnig innilegar hamingjuóskir alla leið austur á Skálanes og leitt að geta ekki verið á staðnum.
Það var kannski eins gott að við erum upptekin í óléttu þ.s. við vorum búin að stefna á þennan dag nokkuð lengi en ákveðið að bíða betri tíma þegar að fjölskyldan er orðin fullmönnuð. Gott að aðrir nýttu hann ;)

Nýr bíll

Gamli góði bíllinn okkar er víst of lítill fyrir fimm manna fjölskyldu, nánar tiltekið of lítill til að rúma 3 barnabílstóla. Vorum við búin að sættast á að kaupa Previu. Þrátt fyrir að þær eru full dýrar, eyða miklu og hætt var að flytja þær inn f. nokkrum árum þá er þetta stór bíll sem okkur leist báðum vel á. Við lögðum því leið okkar upp Toyota umboð þar sem gamli var söluskoðaður. Þegar sölumaðurinn þuldi upp allt sem þeir fundu að bílnum okkar hugsaði ég að það væri ekki nokkrum manni óhætt að stíga uppí hann og hvað þá að keyra honum aftur, svo ófögrum orðum fór hann um hann. Ekki batnaði það þegar hann tilkynnti okkur að hann gæti látið okkur fá 150þ fyrir hann. Ég hafði nú kannski ekki gert mér miklar væntingar en þetta var aðeins..., nei, mikið minni en ég hafði búist við. Við ákváðum að hugsa þetta aðeins og fórum í mat.
Yfir matnum vorum við að velta fyrir okkur hvort við myndum ekki bara láta slag standa og taka feitt bílalán til að láta þetta gerast. Ákveðið var að kíkja fyrst uppí B&L og prófa Trajet og sjá hvað B&L myndi taka fyrir bílinn. Við fundum Trajet til að prófa á meðan þeir söluskoðuðu okkar og tókum smá rúnt um Árbæinn.
Þegar við komum til baka prentaði hann út einhvern pappír sem á stóð upphæð litlu hærri en við höfðum fengið áður en það skemmtilega var að þetta var bara áætlaður viðgerðarkostnaður og leit því út fyrir að fengjum mun meira fyrir gamla hjá B&L. Síðan var bara málið hvað við gætum sett gamla uppí. Þeir áttu einn Verso á bílaplani þeirra skammt frá. Bínu hafði einmitt fundist þeir svo flottir og við sáum okkur strax leik á borði: skipta gamla uppí Verso og mæta svo með hann uppí Toyota umboð ;) Þannig að við skelltum okkur til Ingvars Helgasonar þ.s. Versóinn stóð.
Þegar við komum inná bílasöluna hitti ég ekki gamlan vinnufélaga. Við höfðum unnið saman í 3 mánuði fyrir 10 árum og það besta var að hann var bara að láni hjá IH þennan eina dag en var að öllu jöfnu uppí B&L.
Við prófuðum Verso-inn og leist bara vel á, enda ekkert stefnt á að eiga hann lengi. Gegnum frá viðskiptunum sem enduðu á að fá 950þ fyrir gamla bílinn sem við vorum næstum því búin að láta fyrir 150þ fyrr um daginn. Nú er Bína hæstánægð með að eiga Verso þótt honum verður nú skipt út fljótlega ;)

Nýtt baðherbergi

Við vorum svo séð að láta gera upp baðið á meðan við vorum í sumarfríi. Reyndar losaði ég sjálfur baðið og braut upp flísarnar en fékk gott fólk í að klára að rífa klósettið, flísa og pípa. Ég hengdi nú reyndar upp hillur og vaskinn en lét fróðari menn um að pípa. Það var líka kominn tími á að taka þetta 36 ára baðherbergi í gegn. Þannig að nú er allt nýtt og ekkert eftir nema eitthvað smotterí eins og að finna veggljós, ljós undir speglaskápinn og klósettrúlluhaldara/stand. Þetta kostaði reyndar að íbúðin var öll undirlögð í pússningsryki( og er það enn sumstaðar ), einnig tók þetta verulega á taugarnar að bíða eftir vörum frá Byko og IKEA. Reyndar gafst ég upp á því að bíða eftir Byko og keypti bara annað en ég hafði lagt upp með, en það var ekki svo langt frá þannig að það sleppur. En Byko í Kauptúni er ekki uppáhaldsbúðin mín, allt of stór. Þannig að eftir mikið búðarráp og afgreiðslubið, þrif, uppsetningar, meiri þrif, bið og þónokkra hundraðþúsundkalla þá erum við komin með nýtt baðherbergi. Verst að maður þarf að selja á næstunni til að koma öllum þessum krökkum fyrir ;)

"Einn" heima

Krakkarnir sofnuðu nokkuð fljótt í kvöld enda var afskaplega róleg stemmning á heimilinu. Róleg tónlist flæddi um alla íbúðina úr stofunni og slökkt var á sjónvarpi og næstum öllum ljósum. Í myrkrinu lá ég í mestu makindum í baði með kertaljós og hafði það notalegt "einn" heima ;)

Merkilegt hvað lífið breytist mikið þegar börn bætast í hópinn. Svo ekki sé talað um það þegar þau eru orðin tvö...ég get engan vegin ímyndað mér hvað að verður mikil vinna að hafa þrjá orma hlaupandi um...en það verður ábyggilega enn skemmtilegra ;)

Sól, blíða og grilluð pizza

Ég og krakkarnir fórum í gær uppí íþróttasal HÍ þ.s. við lékum okkur í bandý og boltaleik í góðan klukkutíma. Jobbi kom með tvíburana og Röggi og frú með stelpurnar. Undir lok tímans var Sunna orðin afskaplega lítil. Síðar um daginn var hún rokinn upp í hita og var bara í móki allan daginn, aðallega sofandi eða réttara sagt rænulaus.
Dæmigert var því þ.s. að Sunna var að ná sér í dag að það var heilmikil blíða en ekki hægt að fara með alla familiuna út. Ég kláraði þó einhver þrif eftir framkvæmdir og skelli svo pizzu á grillið.
Að grilla pizzu er eitthvað sem ég hef ætlað mér að gera í mörg ár og eftir að ég fékk grillaða pizzu hjá Palla&Erlu í sumar varð ég að fara að láta verða af þessu. Ég var ekki svikinn og var útkoman sérstaklega góð. Svo góð að ég verð að prófa þetta aftur við fyrsta tækifæri. Held reyndar að það hafi hjálpað mikið að ég geymdi pizzadeigið í ísskápnum síðan í gær, þarf að rannsaka/endurtaka þetta við fyrsta tækifæri og má bara ekki gleyma að opna bjór næst, enda á alltaf að opna bjór þegar maður kveikir upp í girllinu ;)

Nördaskapur

Ég rakst á nördasíðu þ.s. eru kassamódel af ýmsum persónum og þegar ég rakst á StrongBad( gítarbréfið er í uppáhaldi hjá mér ) varð ég að prófa þetta. Datt í hug að þetta gæti verið eitthvað sniðugt fyrir Bjart en um eftir amk hálftíma af klippi var ég nokkuð viss um að hann hefði ekki þolinmæði fyrir þetta. Á endanum birtist StrongBad þó í höndunum á mér og án þess að ég þyrfti að líma eða hefta nokkuð. Var þessi gjörningur algjörlega tilgangslaus, tók mikinn tíma og veitti mér litla ánægju...mæli samt með þessu HAHAHAA =)

Sveigjanlegur vinnutími...

...er að mínu mati gulls ígildi og ég veit ekki betur en silfur sé málið og gull betra ;)

Svergie 2008

Skelltum okkur til Palla&Erlu í sumarfríinu og hægt er að sjá myndir úr ferðinni og svo eru hér einhverjir punktar frá því sem við gerðum:

1. dagur miðvikudagurinn 16. júlí 2008
Vöknuðum snemma í flug. Bjartur ekki að nenna því, enda fóru þau bæði seint að sofa kvöldið áður. Sóttum Balla og hann skutlaði okkur á völlinn. Bjartur svaf í fluginu en Sunna sofnaði ekki fyrr en rétt fyrir lendingu þannig að hún var svoldið stúrin. Fundum bílinn hans Smára á bílastæðinu og brunuðum af stað, enda þurfi Bína nauðsynlega að komast á klósett. Þegar við vorum að komst inní Sisjön hverfið fórum gleymdum við afleggjaranum, alveg eins og í fyrra. Það gerði nú ekki mikið til þ.s. við rötuðum úr þeim ógöngum frá því í fyrra ;) Þegar við komum duttu Bjartur og Óðinn Bragi strax í leik eins og þeir hefði síðast hist í gær og vissum við ekki af þeim.

2. dagur fimmtudagurinn 17. júlí 2008
Dröttuðumst á fætur og svo fór ég og lagði mig kl. 10. Kl. 11 var ég vakinn við að Sunna væri týnd. Hófst þá heilmikið hlaup um hverfið þ.s. ekkert sást eða heyrðist til hennar. Erla fann svo Sunnulinginn inní runna hjá nágrannanum þ.s. hún var búin að skoða sig af og var að kalla á pabba sinn.
Fórum á rólóið í hverfinu enda var Bjartur búinn að bíða lengi að fá að komast aftur á sjóræningjaskipið og kíkinn sem er þar. Þeim kemur alltaf jafn vel saman og Óðinn Bragi mjög góður að leyfa Bjarti að leika sér með riddarabrynjuna( hjálm og sverð ) endalaust.

3. dagur föstudagurinn 18. júlí 2008
Sofið frameftir. Palli kom svo heim úr vinnunni og ákveðið að fara á Outlet í fataleiðangur. Ég tók lítið af fötum með mér þannig að það var ágætist hugmynd að reyna að finna eitthvað á góðu verði. Fann nú reyndar ekkert nema íþróttaskó. Allar vörur sem ég skoðaði voru á himinháu verði, þannig að ég virðist vera með mjög dýra smekk ;) Komum við í Coop á leiðinni heim og síðan var pizza um kvöldið, enda víst hefð að hafa pizzu á föstudagskvöldum.

4. dagur laugardagurinn 19. júlí 2008
Þokkalegasta veður en samt gæti skollið á rigning þannig að það var ákveðið að sleppa Slottskogen og kíkja í Lek og Bus land, leikjaland sem leit nú ekki út fyrir að vera merkilegt við fyrstu sýn en 3 tímar voru merkilega fljótir að líða og hafði ég ekkert minna gaman af heldur en krakkarnir en fann þó fyrir því að vera "aðeins" of stór ;) Risastór klifurgrind sem var auðvelt að týnst í á öllum 3 hæðunum( eða uþb ), kúlulaug, kúlubyssukastali og fl. Burger King á leiðinni heim þ.s. Taco Bar var að loka og ekki hægt að afgreiða þótt ekki væri búið að loka. BK svindlaði nú eitthvað á okkur og ekki fengu allir matinn sinn, en þetta dugði og var allt í lagi þ.s. ekki var nú um neina hollustu að ræða.

5. dagur sunnudagurinn 20. júlí 2008
Palli loksins kominn í sumarfrí e. næturvakt. Ég og Bína fengum að fara í verslunarferð. Sunna kom með og var ekki til friðs þannig að ekki tókst að eyða nema um nokkrum tugum þúsundkalla í föt ;) Fórum á rólóvöll með krökkunum þ.s. endalaus eltingaleikur var upphafður eins og í fyrra og stelpurnar vildu bara róla. Íslenskt lambalæri í boði P&E um kvöldið sem var alveg himneskt.

6. dagur mánudagurinn 21. júlí 2008
Brakandi blíða þegar komið var fram um morguninn eftir rigningar gærkvöldsins. Þegar allir voru komnir á ról og búnir að ná áttum var ákveðið að halda í Liseberg tívolíið þ.s. veðurspáin fyrir morgundaginn sýnir meiri rigningu. Komum ekki fyrr en á hádegi í Lieseberg. Fyrsta tækið, Víkingaskipin, reyndust biluð um leið og strákarnir voru búnir að koma sér fyrir en það var bara haldið áfram för allan daginn og garðurinn ekki yfirgefinn fyrr en um 6. Rússibaninn var í uppáhaldi hjá Bjarti sem fyrr. Allir hálf búnir á því eftir hasarinn í dag þótt Freyja Sif hafi bara sofið sínu værasta í garðinum á meðan Sunna tók sér bara smá lúr en var merkilega góð m.v. að þurfa að hanga í kerrunni í allan dag í sól og hita.

7. dagur þriðjudagurinn 22. júlí 2008
Skýin stoppuðu stutt við í morgunsárið og komin var brakandi blíða uppúr 10. Við Palli fórum með krakkana út á fótboltavöll þ.s. mest var gaman að sulla í polli. Stelpurnar voru fastar í berjamó. Í hádeginu var orðið brakandi og fórum ég og strákarnir á leikvelli og klifurtréð. Fundum fullt af Hallon berjum og var ákveðið að taka með dollur á morgun og koma heim færandi hendi með ber handa öllum. Ég og Palli færðum markisuna framar svo hurðin á pallinn næði að opnast betur. Við skruppum svo aðeins í Maxi þ.s. við náðum að kaupa slatta af skóm og Sunna fékk að frekjast. Kvöldverðurinn var úti undir markísunni en gekk nú út á lítið annað en að reyna að hafa hemil á stelpunum sem létu öllum illum látum á meðan matnum stóð. Síðan fóru krakkarnir niður að horfa á skrípó að vanda og eins og síðustu 2 kvöld kom Sunna upp og vildi bara hanga með foreldrunum og fá óskipta athygli og meira að borða fyrir átökin við að fara að sofa, en hún hefur ekki verið sú stilltasta síðan við komum. Kannski er henni jafn heitt og mér, en mér er búið að vera heitt síðan ég kom og líklega verð ég ekki búinn að venjast þessum hita áður en ég fer ;)

8. dagur miðvikudagurinn 23. júlí 2008
Smá skýjafar var velkomið þegar við strákarnir fórum í berjatúr og sóttum nokkuð af hallon(bróm-)berjum og nokkur kirsuber þ.s. við fórum líka á leikvellina því þeir höfðu ekki mikla eirð í sér að tína endalaust af berjum af runnunum. Óðinn Bragi, Freyja Sif og Erla fór að sækja Magga og Önnu Dóru sem komu heldur betur með góða veðrið með sér, en Anna Dóra kemur víst alltaf með það með sér. Einnig voru þau drekkhlaðin íslenskum munaðarvörur s.s. lambakjöti og Cherios. Ég gerði tilraun til að finna mér buxur því ljósu buxurnar mínar eru víst komnar á síðasta snúning en eftir ábyggilega tveggja tíma rölt um Maxi( verslunarmiðstöðina ) þá fór ég þaðan með eina stuttermaskyrtu( og þá er ég kominn með 4 nýja stuttermaskyrtur, 4 skó, einhverjar brækur en engar buxur hef ég fundið enn og þarf því víst að fara aftur í búðir ). Bína fann einnig einhvern H&M bækling þannig að nú þarf að fara þangað líka því henni vantar allt sem er í bæklingnum og meira að segja farin að tala um að við þurfum að eignast einn strák í viðbót til að kaupa einhver strákaföt á. Ætli besta leið til að fá konu til að vilja eignast börn sé ekki að rétta henni barnafatalista?

9. dagur fimmtudagurinn 24. júlí 2008
Vöknuðum um 10 leitið þ.s. krakkarnir fóru ekki að sofa fyrr en um 11. Steikjandi hiti kominn yfir 26° strax um morguninn. Eitthvað varð hitinn nú meiri yfir daginn, 27° sagði einhver heimasíða en í sól var þetta nær 34° og nánast ólíft á ströndinni við Sísjönvatn. Náðum að hanga þar í um/yfir 3 tíma. Geitungarnir voru full sólgnir í mig en með því að skella mér í smá sundsprett tókst mér að slá á þá og hitann. Markisan sló vel á sólina seinnipart dags og allir voru vel búnir á því eftir daginn. Ekki liggur enn fyrir hvað eigi að aðhafast á morgun enda er veðurspáin ekkert nema sól og hiti og erfitt að athafna sig í svona veðri.

10. dagur föstudagurinn 25. júlí 2008

Bjarti tókst að vekja alla kl. 9 sem var ágætt að vera komin á fætur fyrir 10, en ekki allir sáttir við það að hann skyldi öskra "Mamma" um leið og hann vaknaði. Brakandi blíða var enn á lofti og séð framá hana næstu daga. Eins gott að skella sér bara í dýragarðinn í dag þ.s. það er föstudagur og á morgun yrði líklega fjölmennara í garðinum. Komumst af stað uppúr 11 og vorum komin inní garð eitthvað rétt uppúr 12. Það gekk nú reyndar ekki áfallalaust því ég hafði skrifað niður nákvæmar leiðbeiningar hvernig ætti að komast í dýragarðinn sem við fylgdum fullkomlega og vorum kominn á réttan stað, fyrir utan litla gæludýrabúð í miðri Borås. Sem betur fer hafði ég skoðað hvar sundlaugin var nokkurn vegin og vissi að við áttum að keyra upp götu 42. Í ljós kom svo að sundlaugin var við hliðina á dýragarðinum sem útskýrði mikið fyrir mér...en samt var ég ekkert að furða mig á því að dýragarður væri í miðri borginni ;) En uppúr hádegi komumst við inn og vorum við Bína yfir okkur hrifin af afríkudýrunum. Við fórum hægri rúntinn, sem Erla hafði mælt með, og komum því fljótlega að Savannah svæðinu þ.s. gíraffi tók á móti okkur. Við æstumst öll upp og þegar við sáum fíla, sebrahesta og fleiri dýr vorum við alveg gáttuð. Borðum yfir Savannah en vorum svo hrakin burt af geitungaher sem er farinn að æsast þessa dagana í hitanum. Litlu aparnir voru ákaflega skemmtilegir og höfðu allir mjög gaman að horfa á þá hlaupa og klifra. Bjartur stalst til að gefa dádýrum smá að borða, en samt ekki því sem var með horn ;) Selum var svo gefið og léku þeir listir sínar fyrir áhorfendur. Stuttu síðar komumst við út eftir um 5 tíma rölt. Afskaplega góður dagur og við vorum ánægð með að hafa skellt okkur. Komumst nokkuð auðveldlega úr bænum með hjálp skilta og hættum að nota leiðbeiningarnar mínar af netinu. En þá sáum við að bremsuljós var komið á bílinn, það hafði sést í örfár sekúndur seinustu daga en nú logaði það. Þegar við höfðum ráðfært okkur við handbókina komumst við að því að þ.s. bremsurnar virkuðu væri þetta ekkert til að hafa áhyggjur af strax. Þá sáum við það sem verra var að hitinn á vatninu var kominn upp úr öllu valdi. Gerðum tilraun til að fara út af hraðbrautinni en fundum hvergi opna búð eða skrifstofu. Héldum förinni áfram sem endað á því að við vorum búin að drepa á bílnum út í vegkanti. Fundum smá vatn og svo frostlög sem gerðu mest lítið. Náðum að keyra smá og renna þó nokkra kílómetra í drepandi hita þangað til við fundum Flugger verksmiðju og búð þ.s. ég fékk vatn á vatnskassann. Síðan var brunað heim með bremsuljósið logandi, en bremsurnar virkuðu þó. Eitthvað þóttumst við vera farin að þekkja leiðina heim en þegar við uppgötvuðum að við vorum á leiðina til Malmö þá snerum við við og komumst á heilu og höldnu á áfangastað. Um kvöldið setti ég svo bremsuvökva á bílinn og hann orðinn sem nýr ;)
Myndir úr dýragarðinum

11. dagur laugardagurinn 26. júlí 2008
Allir komnir með nóg af þessu veðri. Við Palli héldum okkur heima við með krakkana og fórum ekki út fyrir hússins dyr nema undir markisuna á pallinum. Konurnar fóru í búðir og var víst ágætis loftkæling í flestum búðum. Hitastigið úti fór í um 32° en rétt þolanlega 29° innandyra. Ég nenni varla að leggjast út í smá sólbað því hitinn er bara of mikill og kannski engin ástæða til að mæta eldrauður í brúðkaup á morgun ;) Hitinn hélst stöðugur allan daginn og ólíft, nema í bílnum með Palla þ.s. loftkæling var. Við ætluðum að sækja gifsplötur f. framkvæmdir Palla niðri í kjallara en komum 10 mín. eftir lokun. Hitinn er enn of mikill f. mig og virðist ég ætla að hafa rétt fyrir mér að ég muni ekki aðlagast þessum hita á þessum 14 dögum.

12. dagur sunnudagurinn 27. júlí 2008

Við vöknuðum snemma, svona um 8, þ.s. við vildum vera mætt tímanlega út á lestarstöð á leið til Köben í brúðkaup Helgu Bjartar og Ingibjörns. Loksins tókst okkur að vakna á undan öðrum ;) Pakkað var í tösku og Palli skutlaði okkur á Goteborgs Centralstation. Það fundum við miðasjálfsala og tókum út miðana okkar og biðum svo lestarinnar. Þegar við komum á sporið var ekki sama númer á lestinni þannig að við biðum en ég fékk svo upplýsingar um að þetta væri lestin og við rétt náðum almenningssætum. Ferðin var afskaplega þægileg. Reyndar varð lestin orðin full troðin þegar farið var frá Malmö og ekki bætti úr skák að par sem brussaði sér við hliðina á okkur lyktaði heldur illa, amk maðurinn. En þ.s. það var nú bara um hálftími yfir til Kaupmannahafnar var þetta ekkert alvarlegt, enda færði hann sig hinu megin við ganginn og slapp það þá til. Þegar til Köben var komið hoppuðum við beint upp á jarðhæðina í Hovedbanet, pöntuðum pylsu þó að afgreiðsludaman tæki sinn tíma í að athuga hitastigið á þeim með kjötmæli og spjalla svoldið við okkur, enda grunlaus um það að við höfðum bara 20 mín til að komast í kirkjuna. Með pylsurnar fórum við út og fundum leigubíl. Leigubílstjórinn var arabi með túrban. Hann jánkaði þegar ég spurði hvort hann væri laus og jánkaði líka þegar ég spurði hvort við mættum borða pylsurnar í bílnum. Hann skildi engan vegin þegar ég sagði "Sankt Pauls Plads" sem endað í því að ég sýndi honum heimilisfangið á SMS-i sem ég hafði sent sjálfum mér. Hann jánkaði þá eitthvað og keyrði af stað, stoppaði á rauðu ljósi og tók upp kort af borginni og byrjaði að leita. Ekki var það alveg til að róa okkur með ekki nema um 10 mínútur til stefnu þ.s. daman í pylsuafgreiðslunni þurfti að spjalla svo mikið. Hann fann þetta nú fljótlega og sagði að þetta væri ekki langt sem ég samsinnti og sagði að hann ætti að ná þessu á 8 mín. sem ég hafði fengið uppgefið á netinu. Þegar ég hafði troðið pylsunni í mig, sem var merkilega m.v. þær sem ég hafði fengið í Svíþjóð, þurfti ég að drífa mig í jakkafötin. Spurði nú leigubílstjórna hvort ekki væri í lagi að ég skipti um föt og hann jánkaði, en var það nú bara svo honum brygði nú ekki við að sjá mig á nærbuxunum allt í einu. Rétt tókst að troða mér í fötin og þá vorum við komin. Í samskiptum okkar við að gera upp ferðina rann það upp fyrir mér að líklega var hann ekki mjög slyngur í enskunni og kannski hafði hann ekkert skilið hvað ég var að segja allan tímann ;) Stukkum beint inní kirkjuna rétt áður en dyrunum var lokað. Athöfnin var mjög falleg og að henni lokinni var hoppað upp í rútu og haldið af stað út úr bænum. Klt. síðar voru allir á herbergjunum sínum og gera til tilbúna og 5:30 var tekið á móti brúðhjónunum. Veisluhöld gengu vel fyrir sig og maturinn æði, allt var vel skipulegt og heppnaðist alveg rosalega vel og umhverfið var æðislegt.
Myndir úr brúðkaupinu

13. dagur mánudagurinn 28. júlí 2008
Vaknaði í svitabaði um 8 og gafst upp á að reyna að sofa lengur enda skein sólin á herbergisgluggann okkar. Morgunmaturinn í boði brúðhjónanna var glæsilegur og síðan var farið með rútu aftur til Köben. Hún stoppi f. utan Hovedbanet sem hentaði okkur afskaplega vel. Gengum á ráðhústorgið og tókum nokkur skref upp strikið, svona fyrst Bína hafði aldrei komið til Köben. Biðum svo bara eftir lestinni á stöðinni. Vorum í almenningsstæðum til Malmö en þar tókum við X2000 lest sem hafði veitingavagn og góð flugvélasæti og var það afskaplega notalegt ferðalag alla leið til Gautaborgar. Bjartur og Erla tóku á móti okkur á lestarstöðinni og rosalega gott að knúsa strákinn sinn aftur. Hann hafði verið stunginn af geitungi á ströndinni en bar sig vel. Þegar við komum heim fékk ég smá knús frá Sunnu en hún vildi fara strax aftur til mömmu sinnar, enda eru börnin heilmikil mömmubörn.

14. dagur þriðjudagurinn 29. júlí 2008
Einhver ský voru á lofti þegar við komum á fætur um 8 leitið í morgun, hálf uppgefin eftir danmerkurferðalagið. Skýin voru nú ekkert sérstaklega að stoppa við. Við Bína fórum með strákana í dótabúðir um morguninn þ.s. þeir fengu sinn hvorn LEGO kassann. Skúr kom á meðan við vorum í búðum og hafa líklega öll blóm, tré og plöntur hrópað af gleði. Skúrinn var þó skammur og allt orðið þurrt stuttu síðar. Fórum svo í Slottskogen um 4 leitið en stuttu eftir að við vorum komin á stóra leikvöllinn var ákveði að drífa sig heim þ.s. skýjabakki og þrumur voru komnar ískyggilega nærri. Ekki var Sunna ánægð að vera tekin strax af leikvellinum svona rétt þegar hún var að byrjað. Ekkert varð nú úr veðrinu en við létum þetta gott heita og héldum heim.

15. dagur miðvikudagurinn 30. júlí 2008
Fórum á fætur snemma á íslenskum tíma kl. 6, sem er nú reyndar bara 8 í Svíþjóð en telst snemma m.v. okkur ;) Eftir morgunmat var farið með restina af farangri og okkur út í bíl eftir að hafa knúsað og kysst alla á Sisjönvegi 491.
Brunuðum beint á flugvöllinn og skildum bílinn hans Smára eftir á P6( beint undir skilti merkt K6 ). Innritun var nú ekki hafin þegar við mættum og síðan var ég með allt snyrtidót í tösku sem mátti ekki fara í handfarangur þannig að ég þurfti að fara með hana aftur í innritun. Aftur fengum við sæti aftast í flugvélinni en að þessu sinni var það Sunna sem sofnaði fljótlega, enda var hún orðin stúrin og búin að vera erfið síðan við fórum í gegnum öryggishliðið á flugvellinum.

Frekur örbygljuofn

Berglind benti Bínu á það um daginn hversu frekur örbylgjuofninn okkar er og það er nokkuð til í því. Hann verður nefnilega alveg brjálaður þegar hann hefur lokið við að hita og linnir ekki látum fyrr en hann er tæmdur. Við erum orðin svo vön þessu að það er gaman að fá ábendingu um eitthvað svona sem ætti að fara í manns fínustu. Kanski hefur hönnuðurinn af honum alltaf verið að gleyma matnum sínum í ofninum og viljað fá áminningu?

Tón-list

Einhverntíman lofaði ég sjálfum mér að gefa út sólóplötu fyrir þrítugt en þ.s. það virðist að mér muni takast að eignast 3 barnið áður en ég verð þrítugur þá hef ég ekki verið jafn iðinn við að standa við tólistarsköpunina enda nóg að gera í öðru.

Ég keypti mér samt POD X3 sem Snorri bróðir greip með til landsins frá BNA þar sem hann og dæturnar voru í heimsókn hjá Jóhanni( ég þarf nú að fara að kíkja til hans við tækifæri ;). Seinustu 2 kvöld hef ég eytt góðum tíma í að fikta í græjunni og held að þetta auðveldi mér ýmislegt og aldrei að vita nema ég reyni að vinna í sólóplötunni í tíma og "ótíma"( verð að fara að kaupa mér uppruna orðanna til að skilja svona orð ). Enda er þetta nú bara áhugamál og þarf ekki að vera uppá marga fiska ;)

Lífið er fínt

Í gær var starfsdagur hjá Bínu og ég því einn með krakkana heima. Þau eru orðin ágætis félagar og voru afskaplega stillt. Fyrir matinn lékum okkur inní herbergi í playmobile. Bjartur var afskaplega duglegur að borða og eitthvað datt ofan í Sunnulinginn líka. Eftir matinn léku þau saman inní herbergi á meðan ég tók til í eldhúsinu og síðan var farið inní rúm að lesa. Þau völdi sitthvora bókina og síðan kúrðum við öll saman og lásum báðar bækurnar undir sæng. Að liggja í rúminu með krakkana og lesa fyrir þau er alveg yndislegt. Ég er ekki frá því að mig hafi dreymt um þetta í mörg ár og nú eru þau bæði orðin nógu stór til lesa fyrir saman og enn eitt að bætast í hópinn eftir nokkra mánuði. Hvað get ég sagt annað en að lífið er fínt ;)

Heitir pottar

Tók að mér smá vefuppsetningu, fyrir Trefjar sem vantaði nýjan vef fyrir heitu pottana. Nýtti tækifærið til að prófa að setja upp Joomla hjá Símanum og gekk það ágætlega, amk útgáfu 1, en prófaði ekki 1.5, geri það síðar.

Hef séð ýmsa hér á landi sem þykjast vita eitthvað um Joomla en merkilegt að þeir sem gefa sig út fyrir að kunna eitthvað á það virðast nú ekki klárir á ýmsum grunnþáttum...kanski ég hripi einhverntíman niður þessa grunnþætti ;)

En auðvitað er tilgangur þessarar færslu að vekja athygli á því að heitir pottar eru ágætir ;)

Flug fyrir klink

Var að spá í að fara til Seyðis seinustu helgina í apríl. Á mánudegi fór ég að skoða flugið en það kostaði yfir 50 þúsund og fara með fjölskylduna svo ég var ekki alveg till í það fyrir 5 daga ferð. Á þriðjudeginum kom svo klinktilboð hjá flugfélaginu. Reyndar var það auglýst sem tilboð aðra leiðina, þannig að ég bókaði bara aðra leiðina fyrst og svo hina, báðar á klink-i ;) Þannig að við fengum 4 daga ferð og kostaði flugið undir 15 kúlum, þannig að við vorum alveg í skýjunum yfir því. Ef að það væri alltaf svona ódýrt að fljúga myndi ég alltaf vera að skreppa austur ;)

Þursabit?

Í gærmorgun vorum við feðgar á leiðinni leikskólann þegar ég lyfti honum upp með þeim afleiðingum að eitthvað í bakinu ákvað að gefa sig. Ég átti bágt með að komast til vinnu þótt ég væri í bíl og hélt í mér að öskra ekki alla leiðina. Í vinnunni var ég iðinn við að standa upp og hreyfa mig til að reyna að liðka bakið. Þegar ég var spurður í annað sinn hvort ég væri með þursabit varð ég að fletta því upp þ.s. ég vissi ekkert um þursabit. Í leit minni á netinu rakst ég á eftirfarandi setningu:

"Hins vegar hefur komið í ljós að verkirnir hverfa fljótar og minni hætta er á að þeir verði langvarandi ef sjúklingurinn hreyfir sig eins mikið og hann mögulega getur og reynir að lifa eðlilegu lífi."

Sem vakti undarlega mikla kátínu í mínum litla huga þegar ég sá sjálfan mig fyrir mér hlaupandi um í vinnunni.

Þegar þarna var komið sögu var ég nokkuð viss um að ég væri nú ekki svona illa haldin en samt las ég hina greinina sem ég hafði flett upp og rakt á eftirfarandi atriði:

• Ef þú hættir skyndilega að hafa stjórn á þvaglátum eða ef þú verður tilfinningalaus í klofinu leitaðu þá samstundis til læknis.


• Ef þú missir mátt í öðrum eða báðum fótum hafðu þá samband við lækni strax.


• Ef verkirnir verða óbærilegir leggðu þá íspoka á svæðið þar sem verstu verkirnir eru í u.þ.b. 10-15 mínútur. Mikilvægt er þó að hafa íspokann ekki of lengi á auma svæðinu.


• Ef verkirnir hafa varað lengi getur verið gott að læra styrktaræfingar og vera síðan duglegur við að gera æfingarnar. Læknar, sjúkraþjálfarar og hnykkjarar (kírópraktorar) geta kennt þér æfingarnar.

Og átti ég bágt með mig að lesa þetta þ.s. mér fannst þetta allt óskaplega fyndið...sem einhverjum finnst kanski óviðeigandi? En ég úrskurðaði því að ég væri ekki með þursabit eða aðra alvarlega bakverki og var það staðfest í fyrramálið þegar ég var orðinn mun betri...kanski vegna þess hversu mikið ég hló ;)

Að hreyfa sig ekki

Eftir að hafa státað mig af því að vera farinn að hreyfa mig( sem var fyrir mánuði síðan ) þá hef ég ekki farið að lyfta né í sund. Aðallega hafa það verið veikindi sem hafa verið að ganga frá mér og krökkunum, en Bína hefur sloppið nokkuð vel í gegnum þetta veikindatímabil síðustu vikna( sjö, níu, þrettán ). Síðan fluttist saumaklúbburinn hjá "skvísunum" yfir á þriðjudag um daginn. Ekki það að skilja að ég taki þátt í einhverjum saumaklúbb hjá einhverjum "skvísum" en einhver varð að passa að þessir gríslingar sem leika hér lausum halda fengju eitthvað að borða og færu í háttinn á meðan "skvísan" á heimilinu fór og hitti hinar "skvísu" vinkonur sínr. En nú fer ég að drattast aftur af stað, enda ekki seinna vænna að nýta þetta hálfsárs kort áður en það rennur út...nú þarf sumarið bara að fara að kíkja svo við komumst í sund ;)

Betri gæði á myndböndum hjá YouTube

Var að lesa bloggið hjá root og rakst þá á umfjöllun hans um myndbönd á netinu þ.s. vísað er í grein um að betri gæði séu komin á YouTube. Skemmtilegt að geta horft á Kraft & Hreysti í mun betri gæðum heldur en koma sjálfgefin upp á YouTube síðunni minni. Kann alltaf vel að meta þegar ég læri eitthvað nýtt ;)

Að hreyfa sig

Fyrir áramót keypti ég mér líkamsræktarkort í Naulius eftir margra ára hlé frá því að lyfta. Enda var heldur betur kominn tími að styrkja sig aðeins meðfram bandýiðkun. Sem betur hefur mér tekist að halda bandýiðkun inní vikuskipulaginu þrátt fyrir barneignir og vinnu seinustu ára...en seinast þegar ég stundaði lyftingar var ég í háskólanum =)
Ég ætlaði nú að finna stað í Hafnarfirði en Salalaugin var með lengri opnunartíma þannig að ég get kíkt þangað eftir að krakkarnir eru stofnaðir. Ekki skemmir heldur fyrir að geta bara farið í stund í staðin fyrir að lyfta. Ég gerði það í gær þ.s. ég nennti ekki að lyfta og tók bara nokkrar sundferðir í staðin. Auk þess er þetta laugin sem við stundum mest þ.s. rennibrautin er lang skemmtilegust á höfuðborgarsvæðinu og laugin líka mjög skemmtileg.
Ekki svo að skilja að ég sé mikill lyftingarmaður en lappirnar voru farnar að kvarta sáran...sem barst svo uppí munn á mér og til eyrna Bínu sem þurfti að hlusta á mig væla undan eymslum eftir hvern bandýtíma. Eftir aðeins nokkra mánuði virðist ég var laus við þreytu og pirring í löppum öllum til mikillar ánægju.

Gleym mér ei

Það hlaut að koma að því að ég gerði mér ferð á Vitabar til að smakka gráðostaborgarann þeirra. Það er búið að vera á dagskrá hjá mér í ábyggilega 7 ár, þannig ég var orðinn verulega spenntur.
Staðurinn var einmitt eins og ég ímyndaði mér, lítil búlla alveg laus við að þykjast vera fín og flott. Við Hugi skruppum í hádeginu í gær. Vorum seinir fyrir og rétt náðum sæti...virtist vera fullt þarna allt hádegið. Borgarinn var óaðfinnanlega góður og tel ég hann slá út Colossus á Ruby Tuesday( þetta er farið að hljóma eins og ég sé einhver hamborgarasérfræðingur....mér finnst þeir reyndar alltaf góðir ). Bráðinn gráðostur og piparsósa ásamt litlum bjór, dós af kók, frönskum og tómatsósu mynduðu yndislegt partý í maganaum á mér og ætla ég að upplifa þetta bragð aftur sem fyrst ;)

Hvert hringir þú "óvart"?

Farsímanotendur kannast kannski við að hringja óvart í fyrsta símanúmerið í símaskránni. Að öllum líkindum er það einhver sem byrjar á A og í mínu tilfelli er það góður maður að nafni Andri sem hefur fengið nokkur símtöl í gegnum árin frá mér án þess að ég hafi sagt nokkurn skapaðan hlut þ.s. ég hafði "óvart" hringt í hann.

Ákvað því að gera breytingu hjá mér og setja nafnið á Bínu sem "Aðal skvísan", þá hringdi ég "óvart" í hana héðan í frá...hvort sem hún verður ánægð með það eða ekki ;)

Málningarhelgi

Eftir upphringingu á föstudagsmorguninn sem lýsti óspennandi lífreysnlu á leikskólanum eru allir að ná sér á strik. Ég slapp við að vera viðstaddur þannig að ég fékk bara vægt sjokk m.v. Bínu sem var á staðnum. Á laugardaginn "drattaðist" ég loks til að mála "hjónaherbergið". Reyndar erum við Bína ekki enn hjón...og "hjónaherbergið" er þar að auki litla 6fm barnaherbergið... en það er efni í margar spennandi færslur sem birtast hér á næstu vikum...bíddu spennt(ur)!

En herbergið kemur bara vel út með "blautan sand" á veggjunum ;)

P.s nýjar myndir komu um daginn og einnig nokkur video.

Fékk póst um daginn um hvernig á að greina heilablæðinu(Slag)

1.Biðja manneskjuna að HLÆJA
2.Biðja manneskjuna að LYFTA BÁÐUM HANDLEGGJUM
3.Biðja manneskjuna að SEGJA EINA EINFALDA SETNINGU
(sem er í samhengi) ( t.d. ...Sólin skín í dag).

Ef viðkomandi á í erfiðleikum með eitthvert þessara atriða -
hringið þá strax í neyðarnúmerið 112 og lýsið einkennunum.

Ekkert að því að hafa svona upplýsingar við höndina þannig að ég sendi mér eftirfarandi sem SMS:

Heilablæðing?

1.HLÆJA
2.LYFTA BÁÐUM HANDLEGGJUM
3.SEGJA EINA EINFALDA SETNINGU

Gat ekki eitth. 112

Bjartur fær gleraugu

Bjartur fór til augnlæknis í dag eftir að kom í ljós í þriggja og hálfs árs skoðuninni að hann notaði annað augað lítið. Niðurstaðan er að hann er með latt auga og gæti þurft að láta líma yfir það í smá tíma með lepp. Einnig er hann fjarsýnn og verður því að fá gleraugu. Hann er ekki alveg sáttur við þessa breytingu þannig að við verðum að reyna að finna leið til að gera þetta meira spennandi fyrir honum ;)

Átti nú alveg von á að hann fengi gleraugu en þá vegna nærsýni sem hann hefði erft frá okkur. Einnig kom þetta að óvart því hann er afskaplega duglegur að teikna og klippa. Stundum vill hann sitja nálægt sjónvarpinu( þótt hann fái það ekki ) þannig að ekkert hefur bent til þess að hann væri fjarsýnn.

Annars er janúar undirlagður í læknaheimsóknum, viðhaldseftirlitið á Bjarti ;)

Jólakveðja 2007

Smá jólakveðja á netinu fyrir alla tölvunörda sem eiga leið hér um ;)

Jólin nálgast

Þrátt fyrir ýmis veikindi á heimilinu hefur jólunum ekki verið frestað. Ég hafði vonast eftir nokkrum dögum til að klára það sem þurfti en mér varð ekki af þeirri ósk minni. Þannig að í gær fór ég til læknis og fékk sýklalyf sem hafa strax tekið til við að drepa allt óæskilegt o.fl. í líkamanum. Jólin eru því komin aftur á dagskrá nema að Sunna vakni með slæma hlaupabólu á Þorláksmessu eða Aðfangadag og verði alveg ómöguleg.
Með hjálp lyfja tókst að versla seinustu gjafir í dag og er næstum allt tilbúið...aukagjafir sem má sleppa og vefjólakveðjan hefur ekki enn fengið neina athygli og verður ábyggilega reddað á morgun. Hinn árlegi DVD diskur sem ég tek yfir helstu athafnir krakkana sem safna yfir árið er að vanda á eftir áætlun. Enda er það heilmikið verk sem ég hef ekki náð að klára nema yfir hátíðarfríið..svona þegar að jólin eru loksins komin og jóla-stressið líður úr manni.

Ammæli

Ég átti víst afmæli um daginn, en það fór nú lítið fyrir því þ.s. ég var enn fyrir austan eftir jarðarförina hans pabba og flaug ekki heim fyrr en seinnipart dags. Það var afskaplega notalegt á Seyðisfirðir, allt hvítt og stillt og sjaldan hefur ég tekið eftir jafn rólegu veðri á Fjarðarheiðinni. Dúnalogn og hvítt yfir öllu án þess þó að vera of bjart til að ég fengi ofbirtu í augun...svo mikill tölvunörd :)
Það var best að koma heim og knúsa Bínu og krakkana, þótt ég væri full seint á ferðinni og næði ekki miklum tíma með þeim áður en þau litlu fóru í rúmið.
Nú er bara að sjá hvort ég láti drauminn rætast og gef mér tíma til að koma með sóloplötu fyrir næsta afmæli. Það er draumur hvers tónlistarmanns að gefa út sóloplötu og þótt ég þykist nú ekki mikill músíkant þá hef ég gaman að því að spila á gítar á kvöldin, verst bara hvað tíminn hverfur oft þegar ég geri það. En það er nú nóg annað að gera en fyrst að hljómsveitirnar mínar eru í fríi þessa dagana þá kannski nýtir maður tímann til þess að klára þetta frá áður en ég verð formlega farinn kominn á fertugsaldurinn ;)

Hinsta ferðalag pabba

Á föstudagsmorgun 30. nóvember síðastliðinn lagði „pabbi“( Emil afi ) uppí sitt síðasta ferðalag. Að þessu sinni var um enga smáferð að ræða því brottfararstaður var líkami hans á Seyðisfirði en endastöðin mér alls ókunn sem og hvernig ferðahögum var háttað.

Mér var hugsað til þerra fjölmörgu ferða pabba á síðustu árum suður og hvernig alltaf hefur hið undarlegasta veður skollið á við komu hans. Ef það var ekki snjókoma eða snjóbylur, á öllum árstímum, þá mætti sú þykkasta þoka sem ég hef nokkurn tíman augum litið á þessum landshluta og engu líkara en kallinn hefði dregið Austfjarðarþokuna með sér í höfuðborgina.

Það kom því ekki að óvart að veðrið fyrir austan var stormur & stórbylur og lágu allar samgöngur niðri á svæðinu og ekkert var flogið um allt land því pabbi var á ferðinni og ferðalagið líklega með þeim umfangsmeiri sem menn ráðast í, þótt farangurinn sé jafnvel lítill.

Ætli mér verði ekki alltaf hugsað til pabba þegar að snjór og þoka láta á sér kræla þar sem ég verð á ferð og þykir mér afskaplega vænt um að eiga áminningu um pabba til frambúðar sem skýtur upp kollinum í tíma og ótíma.

Í dag fór svo jarðarför hans fram og gekk allt vel fyrir sig, veðrið var kalt og stillt og mikil ról var yfir öllu og stutt í grín stöku sinnum sem mér þótti vænt um og pabba hefði fundist það líka. Þakka öllum sem komu að útförinni: fjölskyldu, vinum, vandamönnum og örðum sem lögðu sitt að mörkum.

Það var svo margt sem á pabba að þakka að ég mun líklega aldrei geta talið það upp án þess að týnast í gömlum minningum.

Takk fyrir allt „pabbi“.

Morgungull gefur...

Í gærkvöld ætlaði ég mér að vakna eldsnemma á mánudagsmorgni og drífa mig í vinnuna á undan almennri umferð. Þá vissi ég ekki að dóttir mín var búin að breyta útvarpsstillingunni...þannig að kl. 6 í morgun fór langbylgjan af stað( og það er ekki ein af Bylgjustöðunum ) á tíðni 531 þ.s. heyrðist ekki einu sinni suð. Svaf ég því mínu værasta til 7 þegar að verkjaraklukkan fór í gang. Reyndar fór ég síðan ekki á fætur fyrr en kl. var orðin tíu mínútur í 8 og báðir krakkarnir vaknaðir. Mér þykir það reyndar afskaplega ljúft að vakna með fjölskyldunni og eiga smá tíma með þeim áður en mætt er til vinnu, þannig að ég þakka Sunnu bara fyrir að hafa "hjálpað" mér að sofa út ;)

Paradiso

Veikindi hrjáðu krakkana í seinustu viku og þótt að Bjartur hafi verið nokkuð hress komu 2 massífar ælur frá honum. Ég tók að mér það skemmtilega verk að þrífa. Fyrri kom í holinu á miðvikudaginn og fór upp með öllu og út um allt. Daginn eftir var það eldhúsið og lág við að ég þyrfti að pússa hnífapörin í skúffunni svo víða fór gummsið. Ef eitthvað er verra heldur en að börnin manns séu veik þá er það þegar þau eru með gubbupest. "Ekkert" jafn "hressandi" og að þrífa upp ælu daga í röð. Föstudaginn var ælulaus, ég var einn heima um kvöldið og horfði á hina æðislegu Guest House Paradiso þ.s. sem skemmtilega vill til að æla kemur mikið við sögu undir lok myndarinnar ;)
Á laugardaginn virðist eitthvað hafa gefið sig eftir allt þetta ælu-áreiti og ég lagðist í magakveisu uppúr 2 um nóttina. Svaf af mér allan sunnudaginn og megnið af mánudeginum...en tókst að æla ekkert og er nú að skríða saman...á samt enn erfitt með að borða ;)

Tennurnar enn í lagi

Við feðgar fórum til tannlæknis í gær. S.s. ekkert merkilegt nema hvað að ég held að ég hafi seinast farið fyrir 10 árum. Þegar ég settist í stólinn fór ég að hugsa út í hvað væri langt síðan ég síðast sat í tannlæknastól og var ekki alveg stemmdur fyrir einhverjar boranir og viðgerðir. En allt leit vel út fyrir utan að ég gnísti víst tönnum á nóttunni...þannig að ég hef sloppið fyrir horn og kannski ég láti ekki líða alveg jafn langan tíma þ.t. ég mæti næst ;)

Trúlofuð

Hringarnir Bínaður & Logandi rötuðu á fingur okkar 7. október.

Laddi 6-tugur

Fórum í góðra vina hóp út að borða á Kringlukrána og svo á Ladda 6-tugan á eftir. Kráin kom mér að óvart því ég hélt að þetta væri algjör búlla en ekki "fínn" veitingastaður. Sýningin var skemmtileg og átti ég bágt með mig á kafla. Laddi var sérstaklega góður sem Bubbi enda hafði ég ekki séð hann í því "gervi" áður.

Óvissuferð Víðivalla

Komst óvænt með Bínu í óvissuferðina hjá Víðivöllum þegar að ljóst var að það var pláss og tengdó gátu passað. Farið var í rútuferð á Draugasetrið á Stokkseyri. Ég bjóst við meira af safninu, kanski var það vegna þess að við vorum í hóp og seinust, en ég hélt það væri meira "spooky" og bregð í gangi. En rútuferðin var afskaplega skemmtileg. Rútan var með klósett og skemmtileg tilviljun var að hægt var að koma höndinni inná klósettið með að teygja sig í gegnum ruslalúgu. Vakti þetta mikla kátínu og heilmikið skemmtiatriði út af fyrir sig ;)
Þegar komið var aftur fór ég heim og fékk Monsa&Ástu í mat. Reddaði svo pössun þannig að ég gat hitt fólkið aftur seinna um kvöldið í partý-i í næstu blokk. Þar var heilmikið stuð og endaði ég spilandi á gítar sem kom mér og Bínu að óvart því vanalega læt ég aðra um það...en það var bara svo mikið stuð að það var ekki hægt annað en að taka virkan þátt ;)

Astrópía & Colossus

Monsi kom í bæinn og við gömlu félagarnir ákvaðum að taka smá hitting. Ekki var nú hugur í mönnum að gera neitt af sér þannig að út að borða og bíó varð niðurstaðan...enda erum við orðnir hundgamlir ;)
Ekki mátti borða hvar sem var og ákveðið að fara á Ruby Tuesday. Ég var hæstánægður með að fara þangað því ég hafði hug á að prófa Colossus borgarann þeirra. Þegar kvikindið kom á borðið var ég smá stund að ákveða hvernig ég ætti að hafa mig við að koma honum ofan í mig. Stærðin passaði miðað við sjónvarpsauglýsinguna hjá þeim og var máltíðin hin mesta skemmtun fyrir bragðlaukana og magann. Að verki loknu var ég pakksaddur og sæll en ekki voru allir sáttir sem höfðu ekki pantað sér jafn vel útílátinn borgara.
Sem gamlir spilanördar fórum við á Astrópíu og urðum ekki fyrir vonbrigðum. Hin besta skemmtun, sérstaklega af íslenskri mynd að vera. Dalaði svoldið í seinnihlutanum en slapp fyrir horn. Mæli með henni, en vona samt að kaninn kaupi handritið og skellli upp aðeins "fagmannlegri" útgáfu ;)

Vekjaraklukkan

Í svefnherberginu er vekjaraklukka sem varpar klukkunni uppá vegg og vörpum við klukkunni uppí loft svo við sjáum glögglega að nóttu til hver staðan er. Ekki eru þó allir á eitt sáttir um það hvert klukkunni skal snúið. Iðulega hef ég fundið klukkuna þannig að búið er að varpa tímanum á vegginn bakvið klukkuna sem er svo nálægt að ekkert sést nema rauður punktur. Þegar ég hafði orð á því hver væri alltaf að fikta í klukkunni fékk ég þau skilaboð að Bjartur væri alltaf að fussa og sveija yfir þeim sem væri alltaf að rugla í klukkunni. Honum finnst mun flottara að sjá rauða punktinn við hliðina á klukkunni heldur en uppí loftinu þ.s. ekkert sést yfir daginn. Þegar að vekjaraklukkan datt svo úr sambandi eina nóttina reyndi ég sýna honum að klukkan ætti varpa uppá loft. Ég held að hann hafi alveg skilið það...nú er það bara Sunna sem þarf alltaf að fikta í klukkunni.

Hljómsveitin Æði

Spilaði sem bassaleikari með Æði-inu í Salthúsinu á Grindavík. Magnað að stíga á svið með bandi sem ég hef aldrei spilað með áður og taka heilt ball. Gekk bara nokkuð vel en þó hafði ég pikkað upp rangt lag þegar við réðumst á "It's my life", ég byrjaði á "No Doubt" útgáfunni sem samin var af "Talk Talk" en restin af bandinu tók "Jon Bon Jovi" lagið...þannig að ég var svoldið týndur í því lagi ;)

Brúðkaup 2007

Linda & Siggi gengu í það heilaga á Eskifirði. Við skelltum ormunum í pössun og mættum svo barnlaus en vel byrgð af áfengi á Mjóeyrina á Eskifirði. Föstudagskvöldið fékk athygli ýmissa áfengra drykkja og var setið yfir varðeldi langt fram á nótt. Þegar við skriðum í bólið voru við ásamt Begs&Nonna komin í grunnskólafíling í skólaferðalagi. Á endanum lognuðust þó allir útaf.
Laugardagurinn varð sumum erfiður og tók sinn tím að komast í gang. Mér tókst að koma mér út fyrir hádgi og kíkja á kraftatröll sem voru að keppja í álkasti á eyrinni. Eitt þeirra gekk uppað mér, benti á hvað aðstoðarmaður var að berjast við að nudda bakið á einutröllinu og sagði þrymjandi röddu „Þarna er hægt að fá nudd“ og hló dymjandi röddu. Ég píndi uppúr mér einhverskonar smátittlingahlátur til að styggja ekki dýrið enda hefði það auðveldlega getað pakkað mér samn og fleygt mér út í sjó. Það fór svo bara sína leið og ég hélt mig í hæfilegri fjarlæð á meðan keppninni stóð svo ég fengi ekki álið í hausinn sem þeir fleygðu lengra með hverju kantinu.
Brúðkaupið & veislan gengu svo í garð með tjútti fram eftir nóttu og eru má sjá nokkrar myndir frá helginni.

Steggjun 2007

Siggi spæder steggjaður í dag. Okkur tókst að finna ýmsar þrautir sem voru ekki efstar á óskalista hjá kappanum en hann stóð sig nokkuð vel. Ágrip á herlegheitunum má sjá hér.

Gautaborg 2007

Fjölskyldan vaknaði um miðja nótt við misjafnar undirtektir barnanna. Sunna var kát að vanda en Bjartur vildi bara halda áfram að sofa og geri það svo lengi sem hann gat áður en haldið var út á flugvöll. Mættum rétt fyrir flug og enduðum á því að hlaupa inní vél til að missa ekki af henni. Þriggja tíma flugið út tók fljótt af og auðveldaði mikið að fámennt var í vélinni og gátum við dreift úr okkur eins og við vildum.
Á flugvellinum í Gautaborg fórum við beinustu leið og sóttum bílaleigubílinn og lögðum af stað eftir að hafa lært á bílstólinn hans Bjarts, sem tók okkur reyndar góðan tíma. Við vorum vel búin leiðbeiningum um hvernig ætti að komast á leiðarenda til Palla&Erlu en tókst þrátt fyrir það að villast af leið. En við höfðum fengið fínar leiðbeiningar sem að redduðu okkur fljótt og örugglega til þeirra á endanum. Milt og gott veður passaði ákaflega vel til að sjá borgina í fyrsta sinn, þó að hún minnti mig nú meira á sveit heldur en borg þar sem við fórum um í fyrsta sinn.
Hverfið sem þau búa í kom afskaplega vel fyrir. Bílastæðið fyrir ofan og síðan er gengið inní íbúðarhverfið fyllt af endalausum raðhúsaröðum, trjám, runnum, barnaleikvöllum og Sænska fánann má sjá á öðru hverju húsi. Húsið þeirra var mjög huggulegt og gaman að sjá hvað þau voru búin að koma sér vel fyrir á þessum fáum mánuðum.
Bjartur og Óðinn Bragi duttu strax í leik og vissum við varla af þeim það sem eftir var ferðarinnar ;)

Þriðjudagurinn 10. júlí 2007

Sólin kíkti gegnum skýin og við fórum niðrí miðborg Gautaborgar. Við fylgdum P&E eftir niðri bæ og undruðumst hversu kunnug þau virtust vera orðin götuskipulaginu sem var okkur óskiljanlegt að öllu leiti. Tókum heljarinnar göngu um miðbæinn og kíktum í búðir sem urðu á leið okkar.
Tímatal í Svíþjóð virðist miðað út frá vikum frekar en dögum, og hefðum við því sagt að við værum í fríi í Svíþjóð í 28. viku.

Miðvikudagurinn 11. júlí 2007

Hellirigning tók á móti okkur um morguninn og var ákveðið að fara í Universeum vísindasafnið. Brunað niðri miðbæ og drifum okkur inn á safnið úr dembunni. Margt fróðlegt að sjá í safninu og strákarnir höfðu gaman að dýrunum og leiktækjum. Á leiðinni heim ákváðum við að troða í okkur pizzum á La Gondola veitingastaðinn vegna rigningar. Södd og sæl heldum við svo heimferðinni áfram á bílstæðið og svo beint heim að skella krökkunum í bólið.

Fimmtudagurinn 12. júlí 2007

Léttir skúrir voru ekkert að stoppa okkur í að komast í Lieseberg. Rigningin lét sjá sig fyrri hluta dags en þegar við vorum búin að gúffa í okkur hamborgurum undir berum himni, og smá dembu, lét hún sig hverfa. Bjartur var alveg í essinu sínu í öllum tækjunum og virtist ekki fá nóg og vildi bara meira og meira. Alveg á því að hann vildi mæta aftur í garðinn til að fara í stóru klessubílana þegar hann yrði orðinn stærri.

Föstudagurinn 13. júlí 2007

Dagurinn fór að mest í verslunarleiðangur þ.s. við reynum að fata fjölskylduna upp. Um kvöldið voru svo þrjár tegundir af grísalundum grillaðar og drukkið og kjaftað fram eftir kvöldi/nóttu eins og komið var í vana :)

Laugardagurinn 14. júlí 2007

Dagurinn var tekinn rólega og hangið heima fyrir. Slegið var upp pizzuveislu um kvöldið svona þ.s. P&E eru komin með pizzaofn sem varð nú að sýna hvað gæti. Eftir að allir voru útétnir og börnin sofnuð hlömmuðum við okkur fyrir framan sjónvarpið. Fyrst var gamall Rambó í sænska ríkissjónvarpinu og síðan var horft á nýjasta Bondinn...báðir stóðu þeir undir sýnu, enda berir að ofan nánast allan tímann.

Sunnudagurinn 15. júlí 2007

Fórum í Slotteskogen í sól og góðu veðri. Skógurinn er yndislegt útivistarsvæði. Þar er húsdýragarður sem strákarnir hlupu á eftir svínum. Á veitingahúsinu sem við fórum á var Salsa hljómsveit sem Bjartur var heillaður af að hann réð ekki við að dilla sér og vildi fara í dansskóla þegar hann kæmi heim. Gengum garðinn fram og aftur og strákarnir léku sér mikið á stóru leiksvæði. Um kvöldið var svo kjúlla skellt á grillið en endaði reyndar í ofninum þ.s. gasið var búið og það að finna fyllingu á gaskút var ekkert grín.

Mánudagurinn 16. júlí 2007

Steikjandi sól og hiti er besta lýsing á deginum. Við fórum að Sisjön vatni sem er við hliðina á hverfinu þeirra og gengið nánast beint inní skóginn heiman frá P&E. Við vatnið var mikið stuð að sulla og hlaupa um á bryggjunni. Strákarnir gleymdu sér í leik og aðrir reyndu að sleikja sólina. Þegar komið var að heimferð voru allir búnir á því eftir veðurblíðuna.

Þriðjudagurinn 17. júlí 2007

Við tókum smá verslunarleiðangur til að byrgja okkur betur upp áður en við færum. Allir voru hálf búnir á því eftir góðviðri gærdagsins og því var dagurinn tekinn með mikilli róg enda voru stelpurnar hálf slappar.

Miðvikudagurinn 28. júlí 2007

Við kvöddum fjölskylduna að Sisjövägen 491 með virtum í ágætis veðri. Dvölin var ákaflega ljúf og góð og vonandi að við gerum þetta aftur innan skamms ;)

Myndir úr ferðinni