þriðjudagur, júní 19, 2012

Fjölskyldudagur Víðivalla 2012


Veðrið rétt slapp, það dropaði á okkur og hitinn var rétt nægur þannig að ekki þurfti að klæða sig of mikið. Slapp meira að segja til að Sirkus Íslands gat verið í sínu vanalega dressi og var það hin mesta skemmtun jafnt fyrir börn og fullorðna (ekki síður þá eldri ;)
Nokkurhunduruð pyslur sem við grilluðum ofan í liði og þetta er orðið mjög smurt hjá okkur, enda margir vanir.
Síðan gátum við keypt gjafir fyrir skólann fyrir Skógardeildina sem verður næsta skólaár uppí Kaldárseli og frábært að þessi hugmynd sé loksins orðin að veruleika 2 árum eftir að við héldum að hún yðri. Verður gaman að sjá hvernig skólinn þróast með tilkomu útideildarinnar.

Rómeó & Júlía


Við skelltum okkur á 10 ára afmælissýningu á Rómeó & Júlíu hjá Vesturporti. Það hefur oft staðið til að sjá þessa sýningu og vel við hæfi að ná þessari 10 ára afmælissýningu þar sem við erum einmitt 10 ára ;)
Fengum sæti á sviðinu sem var mjög skemmtilegt að sitja og horfa fram í salinn. Sýningin var frábært og ég væri alveg til í að sjá hana aftur...jafnvel eftir 10 ár ;)
Ætli ég verði ekki að setja hana í fyrsta sæti með Faust en ég get ekki alveg gert uppá milli þeirra.

sunnudagur, júní 17, 2012

Þjóðhátíðardagurinn


Veðrið varð merkilegt gott miðað við hvernig spáði. Héldum að það þyrfti jafnvel pollaföt en það ringdi ekkert, bara sól og blíða.
Slepptum göngunni í ár og fórum beint niður á Víðistaðatún þar sem var leikið og fengið sér nammi áður en við settumst í brekkuna og horfðum á skemmtiatriðin.
Krakkarnir fóru reyndar að leika sér og kíkja uppað sviði, enda skemmtilegra að vera nálægt.
Síðan var haldið í kaffi til Bekku&Bödda seinnipartinn þar sem við náðum í einhverja þó við værum full sein fyrir, enda vorum við að reyna að ná öllum skemmtiatriðunum og Bjartur ekki alveg að skilja hvað það ætti að þýða að vera með kaffi á þessum tíma ;)

laugardagur, júní 16, 2012

Allt Um Póker.com - 1 árs


Fyrir ári síðan opnuðum við Elli AlltUmPóker.com sem griðarstað fyrir pókerefni sem við höfum verið að safna saman meðfram pókerklúbbnum.
Það hefur nú ekki mikið gerst þarna þetta fyrsta ár, en þetta er ágætis byrjun ;)
Í tilefni dagsins bauð ég heim í spil og þangað mættu Bjólfsmenn, fyrrverandi vinnufélgar, nágrannar og vinir.
Bjólfsmenn fóru nú að skjóta á mig að ég væri nú ekki lengur með heppnisstimpilinn á mér og ætti bara að hætta þessu þannig að ég fékk Lady Luck í lið með mér og tókst að næla mér í annað sætið með amk 3 höndum sem ég grísaði á að tapa ekki. Ég var reyndar helvíti kaldur í nokkur skipti að blöffa en þegar ég hélt á 23 á móti Timbrinu og var búinn að byggja upp góðan pott og setti hann næstum allan inn hélt ég að nú væri þetta búið. Hafði skell inn það hárri upphæð að hann gat ekki annað en sett allt sit út. En hann gaf frá sér spilið og af sérstökum kvikindisskap var ég að sýna honum höndina sem bætti ekki einu sinni borðið...ekki mjög fallega gert en það var "sætur" pottur fyrir mig.
Þannig að fyrsta (árlega) afmælismót AlltUmPóker.com gekk bara vel fyrir sig, þó svo að það hafi tekið 5 tíma að klára 8 manna borð. Það var ekki að ástæðu lausu að 16. júní var valinn til að tryggja að alltaf væri frí daginn eftir og vonandi verður næsta mót enn betra, veglegra og skemmtilegra og þakka þeim kærlega sem mættu ;)

föstudagur, júní 15, 2012

Óvissuferð Kanínanna


Tókum smá skrall með Kanínudeild. Fyrst voru það borgarar (reyndar á eftir fótboltaleik ;) og síðan var farið í nokkra hressa og skemmtilega útileiki.
Síðan var haldið áfram í partýinu inni og teknir upp gítarar...þegar Bína benti mér á að við værum að fara var klukkan orðin 2 og við ein eftir með húsráðendum þannig að það var víst orðið tímabært að koma sér ;)

sunnudagur, júní 10, 2012

Fjölskyldudagur í Selvík


Alltaf jafn vel heppnaður fjölskyldudagurinn hjá starfsmannafélagi Landsbankans í Selvík. Veðrið gott, matur, nammi, hoppukastali, skemmtiatriði, bátar, ís, candýfloss...

föstudagur, júní 08, 2012

Krakkarnir í vinnuna


Tók eldri krakkana í vinnuna og höfðu þau mjög gaman að. Skottuðumst um hæðirnar í ratleik og síðan fóru stelpurnar að horfa á bíó á meðan Bjartur sökkti sér í tölvuverið sem var sett upp á neðstu hæð.
Dagný var nú hálf hrædd við Sprota þegar hann mætti en hin tvö höfðu gaman að því að "leika við hann" (toga í skottið á honum og hlaupa í burtu flissandi).
Frábært framtak hjá skemmtinefndinni og á leiðinni heim var spurt hvenær við færum aftur í vinnuna til pabba ;)

fimmtudagur, júní 07, 2012

Fjarfyrirlestur


Við í Agilenetinu stóðum fyrir smá tilraun með fjarfyrirlestur og fengum Henrik Kniberg til að spjalla við okkur, þetta kom vel út og punktaði ég niður smá samantekt og fleira.

þriðjudagur, júní 05, 2012

Bjartur 8 ára


Hann var hæstánægður með að fá að halda afmælið sitt í Ævintýragarðinum með vinum sínum (bekknum, einum öðrum og svo fengu systkini hans að koma líka ;). Sem betur fer vorum við með kökur með okkur því þau hámuðu pizzurnar fljótt í sig, enda vel svöng eftir daginn. Síðan var hoppað, hlaupið, grátið, leikið og ég veit ekki hvað þarna út um allt.
Um kvöldið var hann svo þreyttur að hann lagist útaf á eldhúsbekkinn og steinsofnaði =)

mánudagur, júní 04, 2012

Austur með stelpunum


Þær eru miklar vinkonur þessar skvísur og rosalega duglegar. Þær fengu að fara með mér austur og hitta Helgömmu á meðan ég var á fermingarmóti og það fór nú ekki mikið fyrir þeim. Á leiðinni í vélinni hitti ég Tomma Tomm og spjallaði við hann alla leiðina á meðan stelpurnar dunduðu sér.
Á Seyðis voru þær bara í góðu yfirlæti hjá Helgu og hitti ég þær varla aftur fyrr en á sunnudagsmorgninum þegar þær báðu um leyfi til að fara út að hoppa. Komu reyndar strax aftur inn að klæða sig betur og ég fór nú einhverntíman fram og bað þær um að hafa ekki svona mikil læti (nágrannanna vegna) en þær hoppuðu fram að hádegi ;) Sunnu hafði tekist að suða trampólínið út daginn áður ;)
Ekki leiðinlegt fyrir þær báðar að eiga góða systur =) Vonandi haldast þessi vinabönd um ókomna tíð hjá þeim.
Nokkrar myndir náðust frá helginni.

sunnudagur, júní 03, 2012

Fermingarmót 2012


Í tilefni 20 ára fermingarafmælis var haldið bekkjamót hjá '78 árgangnum frá Seyðisfirði. 10 ár síðan við hittumst síðast og mest lítið breyst...nema við höfum elst um 10 ár, sumir með minna hár og meiri bumbur og margir orðnir hálf gráhærðir foreldrar ;)
Það var byrjað á því að hittast og skála á Öldunni á föstudeginum í sól og blíðu. Ánægjulegt að sjá fjörðinn í góðu veðri aftur...allt of langt síðan ég hef verið í sólinni þar. Um kvöldið var grillað hjá Ólu Lomm og tekið á því fram eftir nóttu.
Á laugardaginn slepptum við róðrakeppninni og skellum okkur út á Skálanes sem var frábær ferð þar sem Hjalti mætti á rútunni og Óli var leiðsögumaður allan tímann og ánægjulegt að fatta loksins út á hvað þetta gengur hjá honum.
Síðan var það Sjómannadagsball og daginn eftir hittust þeir sem gátu í þynnkumat á sjoppunni áður en haldið var heim.
Frábær hópur og frábær helgi og vel við hæfi það var ákveðið að hittast næst eftir 5 ár svo það líði ekki of langt á milli og við verðum ekki jafn vör við að hversu mikið við höfum elst í hvert skipti...þó svo að við sem vorum þarna tókum reyndar ekkert eftir því en aðrir sem heima sátu og skoðuðu myndir fannst við eitthvað ellileg...enda er heimasetufólkið allt sköllótt og með bumbu =)

sunnudagur, maí 27, 2012

Fjölskyldukort í Húsdýragarðinum


Það viðraði svo fínt á Hvítasunnudaginn að við skelltum okkur í Fjölskyldu- og Húsdýragarðinn og fengum okkur á árskort til að hafa góða ástæða til að kíkja nokkrum sinnum í garðinn í sumar og jafnvel yfir veturinn.
Stóru krakkarnir léku sér sjálfir og hlupu um á meðan við fylgdumst með þeim yngri. Sunna var ein í Krakkafossinum að fara hverja ferðina á eftir annari þannig að ég og Dagný fórum með henni. Það var hin mesta skemmtun og var Dagný alveg að missa sig úr spenningi því þetta þótti henni svo skemmtilegt.
Þannig að við eigum ábyggilega eftir að taka nokkrar ferðir í sumar og kíkja á dýrin og leiktækin ;)

föstudagur, maí 25, 2012

Sunna útskrifast af Víðivöllum


Sunna kláraði leikskólann í dag. Þá eru bara nokkrir dagar eftir fram að sumarfríi, þar á meðal útskriftarferð, vorhátið og fleira skemmtilegt og síðan tekur skólinn við hjá henni eftir sumarið. Hún er afskaplega dugleg og á ábyggilega eftir að standa sig með prýði í því verkefni =)

miðvikudagur, maí 16, 2012

Bjórskólinn


Fór með frábæru fólki í bjórskólann og er búinn að bíða þess lengi að setjast á þennan skólabekk. Ég byrjaði reyndar að spyrja kennarann út í ýmsar staðreyndir sem ég þekki varðandi framleiðsluna hjá Borg. Þegar ég spurði hvort við fengjum Snorra leiðrétti kennarinn mig að það væri Sumarliði sem væri á leiðinni. En þegar ljóst var að Snorri lá einnig á tönkum endaði það þannig að ég fékk viðurnefnið Snorri það kvöldið svona fyrir að vera "besserwisserinn" í bekknum ;)
Eftir skólann fórum við í bæinn að fræðast meira og nýta okkur þann lærdóm sem við meðtókum. Frábært kvöld með frábæru fólki og hin mesta skemmtun. Ég er klár á því að ég muni þurfa að fara í endurmenntun við tækifæri ;)

þriðjudagur, maí 01, 2012

Sunna í Borgarleikhúsinu


Sunna kláraði ballettinn í dag með sýningu í Borgarleikhúsinu ásamt stórum hóp nemenda í Listdandsskóla Hafnarfjarðar.
Hún var rosalega flott og vorum við afskaplega stolt af stóru stelpunni sem stóð sig með prýði og var rosalega dugleg í öllum undirbúningum og æfingum undanfarið og í dag.
Sindri "litli" fékk að vera heima hjá Svölu, Lilju og Ásthildi en Bekka amma kom í hans stað með okkur að horfa.
Bjartur var nú ekki að nenna þegar við lögum af stað en hann hafði rosalega gaman að kynninum og ekki síður öllum atriðunum. Dagný var ekkert smá spennt að sjá systur sína á sviðinu og veifaði henni og kallaði þegar hún loksins sá hana. Spurði Sunnu í kvöld hvort hún hefði séð okkur og hún sagðist hafa séð höndina hennar Dagný vera að veifa sér ;).
Eftir sýningu afhenti Bjartur henni rauða rós frá okkur til að fagna þessari fyrstu alvöru sýningu hjá ballerínunni. Eftir var svo haldið uppá frammistöðuna með ísbíltúr ;)

sunnudagur, apríl 22, 2012

Stelpurnar í búðarferð


Systurnar voru í búðarferð með mér. Dagný vildi endilega halda á pokanum en það reyndist ekki jafn auðvelt og hjá pabbanum þannig að Sunna kom til hjálpar og voru þær mjög uppteknar af því að vera að sjá um þetta sjálfar =)

föstudagur, apríl 20, 2012

Vatnaveröld


Það er góð fjölskylduferð að skella sér í bílinn, keyra inn í Reykjanesbæ, sund í Vantaveröld og borðað á KFC á eftir...þetta höfum við gert nokkru sinnum og gerðum um daginn.
Vatnaveröld er mjög hentugur sundstaður þegar börnin eru lítil og geta þau haft endalaust gaman að. Reyndar lenti Sunna í að fá sund-körfluboltaspjald ofan á sig og hefði getað endað illa, en ég var sem betur fer nærri og allt fór vel...starfsmaður kom um leið og sagði að þetta gerðist þar sem að botnin sem að hélt spjaldinu læki. Ég var of upptekinn til að benda viðkomandi á að fjarlægja þetta á meðan það væri gert við þetta..
En það voru allir sáttir við ferðina og ekki síður sáttir við að fara á KFC sem hefur RISA stórar klifur- og rennibrautarsvæði sem að verður reynar oft til þess að lítil eirð er að sitja og borða...en það skemmta sér allir vel ;)

fimmtudagur, apríl 19, 2012

Sumardagurinn fyrsti


Fyrsti sumardagur var tekinn snemma þegar að yngsti fjölskyldumeðlimurinn vildi ekkert vera að eyða "morgninum" í eitthvað hangs í rúmminu. Hann fékk nú samt að liggja aðeins uppí þangað til að Dagný mætti og þá var ekkert annað að gera en að byrja daginn með hafgragraut.
Restin skreið svo á fætur á aðeins eðlilegri tíma og síðan var haldið niður á Víðistaðatún þar sem eldri krakkarnir fóru í víðavangshlaup. Stelpurnar hlupu saman og passaði Sunna vel uppá litlu systur: leiddi hana allan tímann og hjálpaði henni upp þegar hún datt. Það var ekkert verið að stressa sig yfir að vera fyrstar heldur bara að vera saman.
Bjartur hljóp svo aðeins lengri leið og þar var takmarkið bara að komast á leiðarenda. Ég var með myndavélina á lofti og hafði gaman að því að heyra hann á spjallinu við bekkjarbróður sinn...það voru engar áhyggjur af því að vera í forystu, enda var hann alveg með það á hreinu að hann var 4 síðasti og sáttur við með sitt.
Ég hafði nú ekki vit á því að klæða mig í hlaupagallann og taka 2km hlaup...kannski á næsta ári ;)

Smá slökun fram eftir degi og fórum svo í kaffi til Bödda&Bekku þar sem ég hlýddi Bjarti og fór í sófann eins og ég geri ALLTAF að hans sögn...sem er jafnvel rétt...en það bara svo rosalega gott að leggja sig í honum ;)

Út að borða og svo fengu allir ís...góður dagur, góð byrjun á sumri.

fimmtudagur, apríl 12, 2012

Svipaðar systur?


Ég get seint sagt að Sunna & Dagný séu mjög líkar...þó svo að margir segi það og hef meira að segja verið spurður hvort þær væru tvíburar...þá sé ég það ekki...en þegar ég tók þessa mynd af þeim út á svölum átti ég nú hálfgerðum vandræðum að sjá á milli hver væri hvor...en held að það sé nú bara hárið sem var að valda þessum vandræðum hjá mér ;)

mánudagur, apríl 09, 2012

Páskabörn


Það var fríður hópur sem hljóp um allt hús í morgun í leit að páskaeggjunum sínum. Bjartur & Sunna földu eggin og Dagný fékk að hjálpa til. Síðan fylgdi Sindri þeim hvert sem þau fóru og hafði ekki smá gaman af því að vera hluti af genginu.
Síðan var öllum stillt upp í ljósmyndatöku og eins og sjá má af myndinni hér fyrir ofan voru sumir alveg með'da ;)
Eggin voru svo opnuð og Sindri sat sem fastast kyrr þarna á gólfinu...enda hæstánægður að moka uppí sig súkkulaði. Hann sat þarna einn og yfirgefinn alveg þangað til að eggið hans var búið. Þá fór hann á stjá og byrjaði að betla súkkulaði af pabba sínum og stela af systkinum og var fljótur að koma sér af vettvangi áður en að nokkurt þeirra tók eftir því að hann náði sér í bita ;)

föstudagur, apríl 06, 2012

Páskabjórinn


Þó svo að Benedikt 9. frá Borg hafi verið rosalega góður þá var Páska Bock frá Víking var páskabjórinn hjá mér í ár. Einstaklega vel heppnaður fyrir mína bragðlauka: mildur, sætur og ögn af brenndu bragði en ekki of mikið...hreint sælgæti =)

mánudagur, apríl 02, 2012

Páskaeggjaleit


Það var góður hópur af krökkum sem leitaði að páskaeggjum í Hellisgerði eftir vinnu. Baldvin Hrafn og Gústaf Bjarni fóru snemma og földu eggin og síðan mættum við eftir vinnu og þó svo að ekki nema 4 vinkonurnar hittust voru 13 börn sem hlupu út um allt Hellisgerði í ágætis veðri og fundu öll eggin. Reyndar var lengi leitað að auka eggi þangað til að uppgötvaðist að Sindri var með það ;)

laugardagur, mars 24, 2012

Dagný ballerína


Dagný kláraði fyrsta dansárið í dag. Hún var rosalega flott og ekki nóg með að hún kunni og gerði allt heldur var hún einstaklega hjálpsöm og tók ákafan þátt í öllu ;)
Ég fór nú reyndar með hana í einn tíma í vetur og var ekki alveg það sama uppá teningnum þá...meira ekki neitt tekið þátt og endaði það með því að ég varð að lofa sjálfum mér að fara ekki með hana aftur þar sem líklega var það eitthvað undarlegt að hafa pabba allt í einu meðferðis og ekki mömmu.
Hún er yndislegt skrípó þessi stelpa og væri gaman að prófa að kíkja inní hugsanir hennar...dansandi um í sínum eigin heimi eins og sannkölluð ballerína og alltaf í stuði ;)

Borgarar


Eftir að ég fékk einn Surt frá Borg og nældi mér í síðustu 2 Úlfana í ríkinu fór ég að safna saman öllum bjórunum frá þeim. Þó svo að Skógarpúki sé ekki til var hann aðgengilegur í gegnum Þorragull. Stekkjastaurar eru enn til á heimilinu og Benna fékk ég með góðum fyrirvara. Október átti ég nú ekki von á að komast yfir en Rakel átti einn hjá sér þannig að þá var allt komið nema einn, þannig að 8/9 er ágætis árangur ;)
Valgeir & Þyrí komu heimsókn og tók bruggmeistarinn með sér jólabjórinn sinn og annan Surt svona til að halda hinum félagsskap ;) Jólabjórinn passaði vel í þennan hóp og gaman að smakka loksins vel á Surtinum sem stendur vel undir nafni og hefur mjög skemmtilega reykt bragð.
Borg bjórarnir eru hver öðrum betri og þegar þeir hittast allir saman verður úr stórveisla fyrir skynfærin.
Gott kvöld að baki og hlakka til að gera þetta aftur og verður gaman að sjá hvernig næsta Borg söfnun verður, en líklegast verða erlendu bjórarnir úr Kaupmannahafnarferðinni teknir fyrir næst ;)

þriðjudagur, mars 20, 2012

B&L 10 ára


Í tilefni af því að við erum 10 ára skelltum við okkur á gamla góða staðinn ;)
Erum komin með barnapíu þannig að nú verðum við jafnvel dugleg að skreppa út úr húsi...sérstaklega núna þegar við erum að halda uppá 10 ár samstarfsafmælið =)

þriðjudagur, mars 13, 2012

Flottir afmælisgestir


Þessi krakkahópur var hluti af afmælisgestum hjá Jönu Maríu & Emil Gauta í mars. Hef alltaf jafn gaman að því að horfa á þennan hóp saman =)

sunnudagur, mars 11, 2012

Gæðingar


Er búinn að vera að smakka gæðinga undanfarið og held ég sé sáttastur við Lagerinn frá þeim en Státinn finnst mér líka skemmtilegur og get verla gert uppá milli þeirra. Pale Ale-ið finnst mér ekki nógu góður...en verður spennandi að smakka aftur Jólabjórinn sem ég lofsamaði mjög þegar ég smakkaði þann fyrsta (og eina hingað til) rétt fyrir síðustu jól.

sunnudagur, mars 04, 2012

Flogin frá Köben


Vorum fyrr á ferðinni en við áttum von á og ferðalagið á flugvöllinn var auðvellt með Metro. Mjög skemmtilegt þetta Metro og samgöngukerfin í Köben virðast vera mjög framarlega, sérstaklega miðað við litla Ísland..
Tókum sleezy burger á flugvellinum, bara fyrir mig, og fengum svo að bíða í full langan tíma eftir að komast að öryggishliðinu...ekki það mest spennandi og aðeins meira að gerast á þessum flugvelli á sunnudegi miðað við Leifsstöð á miðvikudegi...kannski betra að reyna að flúga á virkum dögum næst ;)
Lögðum okkur í vélinni og brunuðum svo beint heim þar sem tekið var á móti okkur með smá veislu í faðmi fjölskyldunnar og skálað fyrir okkur brúðhjónunum ;)
Þannig að nú eigum við kampavínsglösin tilbúin fyrir brúðkaupsveisluna sem plönuð er síðar á árinu.
Fyrsta brúðkaupsferðin á enda og næsta er plönuð á 1. brúðkaupsafmælinu...eftir 4 ár ;)

laugardagur, mars 03, 2012

Týnd í Köben


Byrjuðum á að fara í verslunarferð, nú var verið að versla smá á mig og svo gjafir fyrir krakkaskarann. Við reyndum að hemja okkur í dótainnkaupum en náðum ekki strikið á enda því ég vildi endilega stoppa í bjór á Charlies bar þar sem við fengum pumpaðan bjór sem mér fannst mjög spennandi. Ég var nú á því að vera bara á barnum en ákváðum að fara í smá gönguferð upp Nörrebro og finna þar prinsessukjóla.
Ég ætla að kenna bjórnum um að áttavitinn í mér var ekki alveg réttur sem varð til þess að við enduðum uppá Österbro. Í Österbro stóðum við í strætóskýli eins og tvö spurningarmerki þar sem við vorum engan vegin því hvernig okkur tókst að fara svona út af áætlaðri leið. Þegar við fengum hjálp hvert við ættum að fara tókum við smá kraftgöngu því við vorum einnig í kappi við tímann...ef búðirnar skyldu loka eins og aðrar klukkan fjögur.
Allt hafðist þetta á endanum og þessi "smá" göngutúr var ekki bara til að ná af sér bjórnum heldur skildi hann á endanum einnig meira eftir sig en 2 gylltir prinsessukjólar fóru með okkur á hótelið =)
Þegar við komum á hótelið komum við við á Sushitreat sem er opið inná af hótelinu og tókum með okkur 20 bita uppá herbergi. Ég var rosalega ánægður að ná fá sushi og Bína smakkaði líka og líkaði bara vel þannig að það gæti tekist á endanum að koma henni uppá þetta ;)
Um kvöldið hittum við svo Hörpu&Guðjón á Reef 'n Beef þar sem við skemmtum okkur yfir drykkjum og gæddum okkur á krókódílum og kengúrum. Góður endir á góðri ferð í kóngins Köbenhaven með góðum vinum =)

föstudagur, mars 02, 2012

Túristar í Köben


Hófum daginn fyrr en áður og drifum okkur beint í dýragarðinn. Við vorum hæstánægð með garðinn og vörðum drjúgum tíma í að ganga um og sérstaklega að fylgjast með öpunum. Einnig var umgjörðin utan um fílana mjög skemmtileg og verður gaman að sjá þegar búið verður að klára að taka garðinn í gegn. Eftir margra tíma göngu með dýrunum fórum við aftur niðrí bæ og hafist handa við að fara í búðir. Bína lagði af stað í fyrstu búðina og eftir stutta stund var ég orðinn leiður og fór í bjórleiðangur. Hafði lofað Borg að fara með bjór fyrir þá í Ölbutikken þannig að ég sótti þá uppá hótel og skrapp með strætó þangað. Þó það hafi verið erfitt að skila af mér stóð ég mína pligt og keypti nokkra bjóra sem afgreiðslumaðurinn mælti með (meira um þá síðar þegar þeir verða opnaðir).
Ætlaði reyndar að kíja á Mikkeller bar á leiðinni til baka en fór upp ranga götu og fór á mis við hann (í þetta skiptið ;)
Nennti svo ekki að bíða eftir strætó og gekk til baka, enda ekki svo langt og þegar ég kom á Strikið var Bína enn í sömu búðinni. Henni hafði tekist að kaupa hálfa búðina og var bara nokkuð ánægð með sig og sátt við innkaupin, þannig að þá var sá hluti frá.
Nú var kominn tími til að fá sér eitthvað að borða og planið var að taka eitthvað "létt" og maula svo smá sushi seinna um kvöldið. Enduðum á Hereford village þar sem risaborgari, kjúklingasamloka og bjórar urðu aðeins meira en "létt" máltíð. Ég var næstum fallinn í yfirlið þegar þessu hafði öllu verði gerð skil og þurfti að hafa svoldið fyrir heimferðinni uppá hótel ;) Þannig að við vorum vel góð og ekkert var að sushi um kvöldið. En við tókum Skype heim til ormanna áður en við lögnuðumst útaf eftir annasaman dag sem túristar í Köben.

fimmtudagur, mars 01, 2012

Yeah baby (fyrsti dagurinn sem hjón)


Það var vel áliðið á daginn þegar við komum okkur út af hótelinu og eins og allt fræga fólkið stungum við af og enginn vissi af því að við værum að gifta okkur ;)
Gengum beint niður í áttina að Ráðhústorgi en beygðum beint inná Vesúvíó þar sem við gæddum okkur á tvemur stórum og ljúffengum pizzum Berglind&Nonni mæltu með að tékka á þessum og stað og það var vel þess virði...sérstaklega hvítlauskolían...eða hvítlauksmaukið ;)
Södd og sæl gengum við uppá Strikið og enduðum svo í smá verslunarferð í H&M en þegar komið var að kassanum kom babb í bátinn. Auðvitað var kortið komið í "botn" þar sem það er aldrei skuldfært hjá mér fyrr en 2. hvers mánaðar. Ég var nú viðbúinn því og nýbúinn að fá mér Aukakrónukort en þá vildi ekki betur en svo til að ég mundi ekki PIN númerið á því...og númerið á debetkortinu er mér löngu gleymt. Þannig að við stóðum þarna eins og algjörir túristar með enga peninga og létum okkur hverfa =)
Áttum nú samt nóga inneign fyrir klippikorti í strætó þannig að við áttum öruggt far uppí Nörrebro um kvöldið að hitta Hörpu&Guðjón. Áður en við heldum þangað fór ég nú í bankann í tölvunni og fann rétt PIN númer svo við gætum nú reddað okkur.
Við tókum strætó beint fyrir utan hótelið og vorum sem sardínur í dós með öllum hinum farþegunum þegar allt í einu vagnstjórinn tilkynnti að ekki væri keyrt uppá Nörrebro. Þá varð uppi fótur og fit um borð og allir fóru nema við og eldri kona sem stóð hjá vagnstjóranum og tuðaði nokkrar stoppistöðvar. Ég náði svo loksins tali af honum og endaði það með því hann sagði okkur að fara út og ganga bara beint af augum...ég skildi hann varla og grunaði að hann skildi mig ekki heldur en hlýddum bara og gengum og gengum...
Þegar við að lokum fundum Norrebrogötu voru komnir lögrelumenn á mótorhjólum og þyrla sveimandi yfir og augljóst að eitthvað var að gerast. En við gengum rakleitt á áfangastað til Hörpu&Guðjóns. Þar kom í ljós að mótværi voru vegna ungsdómshússins sem var rifið fyrir mörgum árum og skýrði breytingar á leiðakerfinu sem við hittum einmitt á.
H&G buðu uppá local kebab sem við sóttum á stappaðan kebabstað sem virtist vera það heitasta heitt í Norrebro (og er víst alltaf pakkaður og alltaf röð út úr dyrum). Gæddum okkur á kebabinu heima fyrir yfir dýrindis bjórum. Þar var Jakobsen drukkinn yfir matnum sem mér fannst einstaklega sumarlegur og skemmtilegur. Síðan var opnaður Ørbæk Fynsk Forår sem ég var rosalega hrifinn af. Ég var hæstánægður að fá að smakka góða bjóra, aldrei nóg af þeim og alltaf gott að drekka bjór í góðum félagsskap =)
Áður en dagurinn var allur þökkuðum við fyrir okkur og kvöddum H&G&Úlf og fundum strætó-inn okkar sem fór rétta leið í þetta sinn og skilaði okkur fyrir utan hótelið.

miðvikudagur, febrúar 29, 2012

Ferðalag til Köben


Eftir brúðkaupskossinn skelltum við okkur uppá flugvöll þar sem við gæddum okkur á Humarpizzu í rólegheitunum ásamt hvítvíni og bjór...þetta hjónaband gat ekki byrjað betur ;)
Afskaplega notalegt að fljúga seinnipart í miðri viku og hafa næstum flugstöðina alveg út af fyrir okkur.
Þegar við lentum í Kaupmannahöfn tókum við Metro beint niðrí bæ á Nörreport og gengum niðra á Fox hótel. Ég hafði skoðað leiðina á Google maps kvöldið áður og séð að það var 7eleven á leiðinni sem við stoppuðum í og keyptum smá snarl í morgunmat. Þegar við tékkuðum okkur inná Fox mundi hressi þjónninn allt í einu eftir því að við áttu eitthvað hjá honum og sagði að við ættum góða vini...vitir menn, kampavínsflaska með kveðju frá Hörpu&Guggz =)
Klukkan var farin að nálgast fimmtudag þegar við komum uppá 4 hæð í japanskt þemaða herbergið.

Gift & farin í brúðkaupsferð


Í tilefni þess að við erum búin að ná 10 árum ákváðum við að láta loksins verða af því að ganga í það heilaga. Skelltum okkur til sýslumanns eftir hádegið og brunuðum svo beint út á flugvöll og verðum úr landi í nokkra daga ;)

Eftir trúlofunina vildi Bína nú gera þetta sem fyrst en ég hafði nú alltaf séð fyrir mér 2010 eða 2012. En óléttur komu í veg fyrir 2008 og 2010 þannig að ég fékk mínu framgengt ;)
Vorum búin að velta mikil fyrir okkur hvar við ætluðum að halda brúðkaup og hvenær. Bína kom um daginn með þá hugmynd að gifta okkur 29. febrúar og fara þá í brúðkaupsafmælisferð á 4ra ára fresti...mér leist vel á það og enduðum við á að bóka flug og athöfn fyrir 2 vikum =)


Það er stefnt á brúðkaupsveislu síðar á árinu þar sem við munum safna fólki saman og halda vel uppá þetta við tækifæri með vinum & vandamönnum...en ætlum að byrja á að njóta þessa bara tvö ;)

miðvikudagur, febrúar 22, 2012

Öskudagur 2012


Nornin, Ninjan, Ljónið & Fíllinn tilbúin í daginn.

mánudagur, febrúar 20, 2012

Þorralok


Þá er komið að Þorralokum og búið að drekka aðeins í sig þorrann ;) Íslensk bjórframleiðsla er orðin mjög skemmtileg þessi síðustu ár og ákaflega gaman að fá breiða flóru við hvaða tilefni sem er til að drekka í sig =)

sunnudagur, febrúar 19, 2012

Konudagur


Mikið búið að vera að gera undanfarnar vikur að passa veik börn og bætti ekki úr skák þegar ég náði í þessa pest líka. Þannig að í tilefni konudags tók ég upp símann og pantaði 10 rauðar rósir sem voru keyrðar heim um hæl. Þessi síðustu 10 ár með Bínu hafa bara verið æði og ég hlakka til að sjá hvað næstu 10 bera í skauti sér með Bínu mér við hlið =)

fimmtudagur, febrúar 16, 2012

Þyrniblóm


Bangsadeild var með sýningu í dag þar sem var sungið og dansað fyrir fullan sal af brosandi foreldrum. Dagný og Skógarálfarnir stigu dans og Sunna var í hlutverki Þyrniblómar í frumsömdu leikriti Álfanna sem var hin mesta skemmtun og var hún alveg að lifa sig inní hlutverkið og stóð sig rosalega vel þessi litla álfamær ;)

fimmtudagur, febrúar 09, 2012

Páskanir koma snemma í ár


Benedikt hinn 9. er kominn í hús þökk sé Prinsinum í Borg sem ég hitti í gær. Það var ánægjuleg heimsókn að sjá hvaðan allur þessi góði bjór sem ég hef verið að drekka er kominn. Ég lærði margt fróðlegt og þessi heimsókn jók til muna áhuga minn á framleiðslunni frá Borg sem var þó nokkuð mikill fyrir =)
Ekki verra að fá smá forskot á páskauppskeruna þannig að páskarnir koma snemma í ár ;)
Benni fellur vel að mínum bragðlaukum eins og allir Borgbjórarnir virðast gera. Finnst hann vera mjög skyldur Úlfi (náskyldur ættingi) en mun mildari og eitthvað "auðveldari" í aðkomu...sú lýsing verður að duga eftir fyrstu flösku ;)

sunnudagur, febrúar 05, 2012

Fjölskyldumatur


Rakel (og Snorri & Elísabet) buðu í mat sem var vel þegið eftir leikhúsferð að sjá Litla skrímsli & Stóra skrímsli. Það er alltaf ævintýri fyrir krakkana að hlaupa um í garðinum þar sem þau búa og stundum erfitt að ná þeim inn. Allt of langt síðan við höfum hitt þau og Gauta og co. enda búið að vera eitthvað mikið að gera í þessum "vetri" =)

föstudagur, febrúar 03, 2012

Pókerárið langt komið hjá Bjólfi


Þá eru fyrstu tvemur mótaröðunum á þessu pókerári hjá Bjólfi lokið.

Þrátt fyrir slæma byrjun á fyrsta kvöldi fyrsta móts tókst mér að vinna mig uppí annað sætið í því móti og ná hluta af lokapottinum og ágætis stöðu í Bjólfsmeistaranum 2012. Mót 2 tók smá dýfu á 2 kvöldi þegar ég datt snemma út en með sigri á síðasta kvöldi tókst mér að ná 3ja sætinu á því móti og aftur næla í smá hluta af lokapottinum auk þess að vera jafn í baráttunni um meistaratitilinn með Mikkalingnum og Eiki Bót er fast á hæla okkar. Mér tókst að taka tvo góða potta með algjöra hunda á hendi þegar ég fékk menn til að pakka á móti mér (þoli ekki þegar ég ákveð að reyna þetta...en það er í lagi á meðan þetta gengur upp) og síðan náði ég góðum potti af Mikkalingnum þegar ég var með nuts en hann hélt ég væri að blöffa sem varð honum dýrkeypt.

Einnig náði ég einu priki í 7-2 keppninni, þannig að ég er aðeins einu priki á eftir Pusa sem heldur áfram að leiða þá keppni eins og í fyrra.

Iðnaðarmaðurinn bauð heim á síðasta kvöld og ekki nóg með það heldur tók hann upp Surt frá Borg sem ég er búinn að gera dauðaleit að. Þannig að ég fékk 2 sopa af þessum sterkasta bjór Íslandssögunnar (12%) sem mér fannst ákaflega ljúfir og þykir mér verst að eiga ekki nokkrar flöskur til að geta notið og geymt jafnvel því hann er áætlaður bestur 2022. En ég á von á að fá eina, þarf síðan að velja mér góðan tíma til að drekka hann...en þangað til er ég enn að klára Stekkjastaurana sem ég fékk frá Bjólfsfélögunum =)

Aðeins lokamótið eftir sem er einu kvöldi lengra og lýkur með bústaðaferð sem mikil eftirvænting er fyrir allt árið. Næstu 4 kvöld eiga eftir að verða spennandi & skemmtileg eins og alltaf og gaman að setjast með félögunum yfir spil mánaðarlega ...og ekki verra ef góður bjór er við höndina ;)

sunnudagur, janúar 29, 2012

Bína sæta


Allt of sjaldan gefst mér tími til að njóta þess að horfa á Bínu mína...ætli þetta verði ekki árið sem við látum loksins verða af því að gifta okkur. Þegar við trúlofuðumst var ég á því að gera þetta 2012 en hún ætlaði nú ekki að vera svo lengi trúlofuð...en barneignir hafa tafið þetta...nú eru þær víst ekki lengur afsökun þannig að það er best að koma þessu í farveg ;)

mánudagur, janúar 23, 2012

Karate-Bjartur


Bjartur kláraði fyrstu gráðunina sína í karate á síðasta ári. Það var rosalega gaman að sjá hvað krakkarnir voru flottir og samstilltir. Hann segist nú aðeins vilja vera í þessu til að fá fjólubláa beltið (uppáhalds liturinn)...en það er svo sem jafn góð ástæða og hver önnur. Á meðan hann mætir og hefur gaman að þessu er það bara besta mál. Fékk svo galla á nýju ári þannig sem hann tekur sig rosalega vel út í og verður gaman að sjá hvernig karateiðkun hans verður. Hann er flottur þegar hann klæðir sig heima og tekur æfingar, þannig að ég bíð bara spenntur eftir næstu gráðun að sjá hann.

sunnudagur, janúar 22, 2012

Keiluferð


Skelltum okkur öll saman í keilu í dag. Alltaf á dagskrá að nýta helgarnar betur og gera eitthvað meira saman. Þetta var liður í því og þó okkur hafi nú ekki tekist að klára heilan leik var þetta mjög skemmtilegt. Hjálpaði mikið til þegar að fjölskyldan á næstu braut benti okkur á rennur sem krakkarnir gátu notað til að koma kúlunum áfram en fram að því vorum við að hjálpa þeim með að kasta...sem var líka bara gaman =)

laugardagur, janúar 21, 2012

Handmálað veggfóður


Bína tók sig til um daginn og ákvað að mála vegginn yfir eldhúsborðinu. Hún ákvað að handmála veggfóður á hann sem mér leist nú ekkert á. Hún var mjög bjartsýn á hvað hún ætlaði að vera fljót að þessu og dróst það aðeins. En útkoman er æðislegt...ég veit ekki hvað ég var að tuða yfir þessu...hún er með mun betra auga fyrir þessu og það er einstaklega notaleg tilfinning að sitja inní eldhúsi núna. Eigum bara eftir að finna til ramm&myndir og setja á veginn...en það er fínt að njóta nektar hans aðeins =)

fimmtudagur, janúar 19, 2012

Nóg að gera á nýju ári


Árið fór af stað á þvi að allir fóru til vinnu. Bína sneri aftur eftir árs frí og Sindri byrjaði á sama tíma í leikskólanum. Það eru víst einu fríðindin við að vera leikskólakennari að koma krakka fyrr að...þó það sé ekki einu sinni leyfilegt, en ekki hefur leikskólinn lengur kjör fram yfir kennara eða afslátt af skólagjöldum :|
Það tók Sindra nokkra daga að venjast en lítur bara mjög vel út og verður gaman að sjá hvernig hann tekur í að vera allan daginn.
Okkur tókst að leggjast í veikindi við upphaf árs. Áttum von á því að Sindri myndi taka allt inná sig við að byrja í leikskólanum en þá var það Bína sem lagðist fyrir. Á saman tíma náði ég mér í einhverja flensu og var það ekkert grín að vera bæði veik með 4 börn...en sem betur fer tókst mér að hrista það fljótt af mér og fenguð við hjálp hjá nærstöddum með krakkana sem reddaði okkur alveg.
Vetur hefur verið þónokkur (svona miðað við það sem ég hef séð á þessum landshluta) og nokkur kuldi...fátt betra en að vera inni eftir sleðaferð með nýbakaða snúða sem Bína kann svo sannarlega að gera =)
Þannig að árið byrjar eins og oft áður að ég sé engan vegin hvernig ég að gera allt sem mig langar til að gera miðað við allt sem ég þarf að gera ;)

miðvikudagur, janúar 18, 2012

Óheilsa


Veikur! Var slappur á mánudagskvöldið en náði nú vinnu í gær en handónýtur í dag. Ekki sáttur við að hafa ekki verið búinn að að taka ólífulauf síðustu vikur...vonandi var það ástæða þess að líkaminn réð ekki við þetta. Nokkrir mánuðir síðan ég var síðast frá vegna veikinda, þannig að teljarinn aftur núllstilltur...og búið að kaupa ólífulauf ;)

laugardagur, desember 31, 2011

Annáll 2011


Árið byrjaði á því að við komum okkur saman um nafn á Sindra og var þetta erfiðasta nafnasamningaviðræðan…og sú síðasta ;) Strákurinn átti bara fínasta fyrsta árið og hélt uppá það í kringjum jólin með einhverjum veikindum líka en ekkert alvarlegt.

Sunna 5 ára stóð sig eins og hetja í hálskirtlatöku og hélt áfram að dansa ballet og er búin að kenna sér sjálf að lesa (eins og margt annað sem hún kennir sér sjálf).

Bjartur "tannlaus" var í körfubolta og skipti svo yfir í karate sem virðist eiga betur við þennan 7 ára gutta. Hálf-gult belti í höfn en þó er hann segist aðalega vera í þessu til að fá fjólubláa beltið sem er uppáhlalds liturinn ;)

Dagný byrjaði í ballet. Hún hætti á ungadeild og fór yfir á Bangsadeild. Finnst ekkert leiðinlegt að vera með stóru systir, enda eru þær einstaklega góðar saman ;) Tókst svo að hætta með duddu í lok árs sem var ekkert auðvelt fyrir 3ja ára duddustelpu ;)

Ég og Bína urðum 9 ára og eins og oft áður kíktum við nokkrum sinnum á uppáhalds veitingastaðinn ;)
Annars reynum við nú bara að njóta lífsins með þessu yndislega fólki okkar =)

Bónerhópurinn skrapp í sushi í byrjun árs og síðan var góð óvissuferð sem gæti orðið erfitt að toppa.

Ég náði hálfu ári betur en 2ja ára veikindaleysi þegar ég nældi mér í pest sem tók mig nokkrar vikur að ná úr mér. Nú er bara að byrja aftur að safna í nýtt met ;) Síðan er alltaf tekið á því í bandý-inu þó svo það sé farið að fækka óþarflega í hópnum...

Póker hefur komið skemmtilega inn á árinu og ánægjulegt hvað þetta áhugamál hefur komið sér inn hjá mér og maður reynir að sinna því. Náði Bjólfsmeistaranum 2011, það gæti orðið erfitt að toppa það ;) Bónermenn hafa líka tekið upp regluleg spil og síðan tókst mér að ná spili með Monsa á sitt hvorum landshlutanum.

Í sumar fórum við á Seyðis og á heljarinnar ættarmót.
Náðum að skreppa í bústað einnig voru ströndin og húsdýragarðurinn nýtt

Í vinnunni hefur verið mikið að gera og margt gott verið gert fyrir utan vinnuna. Ég færði mig úr forritun yfir í ScrumMaster hlutverk og sinnti tveimur teymum en mun færa mig yfir í annað teymi eftir áramót. Það er nóg sem býður og margt sem þarf að gera og hefur Agile orðið stærri hluti af áhugasviðinu en ég átti upphaflega von á.

Pizzugerðin heldur áfram og myndi ég frekar kaupa Logapizzur heldur en margt annað sem hægt er að borga fyrir í dag ;)

Tónlistin var fyrirferðalítil á árinu en þó héldu Kónuglærnar uppá 15 ára starfsafmæli og ánægjulegt að við náum þó þessari einu spilahelgi á árinu og einnig ánægjulegt að þaka þátt í steggjun og brúðkaupi hjá Bjözza.

Jólin voru svo yfirfull af ánægjulegum fjölskyldugjörningum og Bína mín hugsaði vel um mig.

Enduðum árið í Sævangnum hjá Möllu&Þresti og co. þar sem árið var sprengt í tætlur. Þegar líða fór á nýja árið yfirgáfum við svæðið með hálf sofandi og uppgefinn barnaskara eftir æðislega samveru í upphafi nýs árs sem lofar bara góðu =)

laugardagur, desember 24, 2011

Gullkorn krakkanna (2004-2011)

Bína hefur verið mjög dugleg að safna saman gullkornum krakkanna á síðunni þeirra og þegar komst upp um daginn að Balli afi hafði ekki séð neitt af þessu skelltum við þeim saman í eina "bók" sem er hægt að sækja og glugga í yfir hátíðirnar ;)

föstudagur, desember 23, 2011

Gleðilega hátíð

Árlega jólakveðja á netinu er tilbúin, hafið það gott og takk fyrir það sem er að liðna.